प्रधानमन्त्री र सभापतिले अर्थमन्त्री बन भन्नुभएको छैन : थापा

रुपन्देही निर्वाचन क्षेत्र नम्बर ३ को कांग्रेस पार्टी कमिटीले शनिबार आयोजना गरेको कार्यक्रममा थापाले आफ्नो प्राथमिकता सरकारमा जाने भन्दा पनि पार्टीलाई बलियो बनाउने रहेको बताए । प्रधानमन्त्री दाहालले मन्त्रिपरिषद् विस्तारको तयारी गरिरहेको बेला कांग्रेस महामन्त्री थापाले आफूलाई अर्थमन्त्रीको प्रस्ताव आइनसकेको बताएका हुन् । उनले यसअघि मन्त्री नबन्ने अभिव्यक्ति दिएका थिए । बुटवलमा आयोजित कार्यक्रममा थापाले मन्त्री बन्नेबारे भने, 'मलाई प्रधानमन्त्रीले अर्थमन्त्री बन्न भन्नुभएको, सभापतिले बन्न भन्नुभएको हैन । मलाई कसैले केही भनेको छैन । भनेको तर भन्दाभन्दै पनि नमानेको जस्तो सन्देश गएको छ ।' आफ्नो चर्चा अर्थमन्त्रीका रूपमा भइरहेको बेला आफू मन्त्रिपरिषद्मा सहभागी नहुने थापाले अभिव्यक्ति दिएका हुन् ।

थापाले आफूलाई आजसम्म कसैले केही दिएर नभई लडेर उपलब्धि र पद प्राप्त गरेको पनि बताए । उनले पार्टीभित्र संघर्ष गरेर नै पार्टी महामन्त्रीसम्म पुगेको उनको भनाइ थियो । 'आजसम्म मलाई कसैले केही दिएको छैन, मैले जे पाएको छु लडेर पाएको छु ।'

आफ्नो प्राथमिकता कांग्रेसलाई स्थानीय तहबाट नै बलियो बनाउने र २०८४ को चुनावमा कसैसँग गठबन्धन गर्न नहुने अवस्था ल्याउने थापाले बताए । अहिले जनतामा असन्तुष्टी र छटपटी रहेको बताउँदै कांग्रेस त्यसलाई सम्बोधन हुने गरी सरकारमा जानुपर्ने पनि उनको भनाइ थियो । ‘सरकारले जनतालाई राहत महसुस गराउनुपर्छ । अहिलेभन्दा भोलिको अवस्था राम्रो हुँदै जान्छ भन्ने विश्वास दिलाउने गरी काम गर्नुपर्छ,’ उनले भने ।