२४.१२°C काठमाडौं
काठमाडौंमा वायुको गुणस्तर: १९७

इकोनोमिक्स ओलम्पियाडका लागि ५ विद्यार्थी छानिए

कान्तिपुर संवाददाता

काठमाडौँ — नेपालबाट अन्तर्राष्ट्रिय इकोनोमिक्स ओलम्पियाडमा भाग लिने पाँच विद्यार्थीको टुंगो लागेको छ । ललितपुरमा आइतबार सम्पन्न नेपाल इकोनोमिक्स ओलम्पियाड (नियो) मा गोल्ड मेडल जित्ने ५ जना विद्यार्थी अन्तर्राष्ट्रिय प्रतिस्पर्धाका लागि छानिएका हुन् । 

इकोनोमिक्स ओलम्पियाडका लागि ५ विद्यार्थी छानिए

बूढानीलकण्ठ स्कुलका भार्गभ चटौत र भिक्टर हमाल, लिटिल एन्जल्सका द्रयुश यादव, ट्रिनिटीका मयंक शंकर झा र सेन्ट जेभियरका अनुभव ढुंगाना ओलम्पियाडका लागि छानिएका नियोले जनाएको छ । प्लस टु तहमा व्यवस्थापन संकाय अध्ययनरत ८० मध्येबाट ओलम्पियाडका लागि ५ विद्यार्थी छानिएका हुन् । क्षेत्रीय प्रतिस्पर्धामा भने देशभरका १६२ कलेजका एक हजारभन्दा बढी विद्यार्थीहरू सहभागी थिए । तीमध्येबाट उत्कृष्ट ७५ जना र सिधै छनोटमा परेका ५ जनाले राष्ट्रिय ओलम्पियाडमा प्रतिस्पर्धा गरेका थिए ।

नियोले प्रतिस्पर्धामा सहभागी विद्यार्थीलाई बिजनेस केस एनलाइसिस, सिमुलेसन र अर्थशास्त्र विषयसँग सम्बन्धित प्रश्न समेटिएको ३ घण्टाको लिखित परीक्षा लिएर उत्कृष्ट ५ जना छनोट गरेको हो । यसअघिका ओलम्पियाडमा नेपाली विद्यार्थीले तेस्रो स्थान हासिल गरेका थिए । तर यसपालि गोल्ड मेडल जित्ने लक्ष्य राखेको नियोका साझेदारी निर्देशक दीपक भण्डारीले बताए ।

प्रकाशित : फाल्गुन ९, २०७९ ०७:४८
प्रतिक्रिया
पठाउनुहोस्
जनताको राय

कांग्रेसले 'वेल' घेरेर नाराबाजी गरिरहेका बेला प्रधानमन्त्रीले प्रतिनिधिसभामा विश्वासको मत लिएको घटनालाई कसरी लिनु भएको छ ?