सभामुख र चिनियाँ राजदूतबीच भेटवार्ता
काठमाडौँ — नेपालका लागि चीनका राजदूत छन् सोङले सभामुख देवराज घिमिरेसँग बुधबार शिष्टाचार भेट गरेका छन् ।सिंहदरबारस्थित सभामुखको कार्यालयमा भएको भेटमा दुईपक्षीय मैत्रीपूर्ण सम्बन्ध, संसदीय आदानप्रदानलगायत विषयमा छलफल भएको छ ।
सभामुखको सचिवालयका अनुसार चिनियाँ राजदूतले चीनको राष्ट्रिय जनकांग्रेस, स्थायी समितिका अध्यक्ष ली चान्सुले घिमिरेलाई पठाएको शुभकामना सन्देश हस्तान्तरण गरेका थिए ।
घिमिरे माघ ५ गते प्रतिनिधिसभाको सभामुख निर्वाचित भएका थिए । सभामुख घिमिरेले नेपालको राष्ट्रियता, सार्वभौमसत्ता र अखण्डतामा चीनले इतिहासदेखि नै देखाउँदै आएको नीतिको सराहना गर्दै ‘एक चीन नीति’ प्रति नेपाल दृढ रहेको, नेपाली भूमि चीनविरुद्ध प्रयोग हुन नदिने र चीनको सार्वभौमसत्ता र राष्ट्रिय अखण्डतालाई उच्च महत्त्व दिने उल्लेख गरे । उनले कोभिड महामारीमा चीनले स्वास्थ्य सामग्री र खोपका लागि पुर्याएको सहयोगको प्रशंसा गरे ।
भूकम्पपछिको पुनर्निर्माणमा चीनबाट भएको सहयोग स्मरणीय रहेको बताउँदै सभामुख घिमिरेले दुई देशका नाकाहरू क्रमशः खुलाउन सहयोग हुने विश्वास व्यक्त गरे ।
भेटमा सभामुख घिमिरेले चीनको राष्ट्रिय जनकांग्रेस, स्थायी समितिका अध्यक्ष ली चान्सुले गत भदौमा गरेको नेपाल भ्रमणमा भएको अन्तरसंसदीय सहकार्य सम्बन्धी समझदारी कार्यान्वयन गर्न संघीय संसद् सचिवालयले कार्यारम्भ गरेको जानकारी दिए ।
राजदूत छन् सोङले चिनियाँ राष्ट्रपतिको तीन वर्षअघि भएको भ्रमणपछि नेपालमा पूर्वाधारलगायत क्षेत्रमा चीनले ठूलो लगानी गरेको बताउँदै आगामी दिनमा पनि निरन्तरता दिने उल्लेख गरे ।
प्रकाशित : माघ २५, २०७९ १४:१४
