लुम्बिनी प्रदेशसभाका कांग्रेस उम्मेदवार कुर्मीविरुद्ध निर्वाचन कार्यालयमा उजुरी

मधु शाही

काठमाडौँ — निर्वाचन अधिकृतको कार्यालय बाँके निर्वाचन क्षेत्र नम्बर ३ को कार्यालयमा कांग्रेसका लुम्बिनी प्रदेशसभा उम्मेदवार बादशाह कुर्मीविरुद्ध उजुरी दर्ता भएको छ । उम्मेदवारी खारेजीको माग गर्दै बाँके निर्वाचन क्षेत्र नम्बर ३ (२) का कांग्रेस उम्मेदवार कुर्मीविरुद्ध उजुरी परेको हो ।

लुम्बिनी प्रदेशसभाका कांग्रेस उम्मेदवार कुर्मीविरुद्ध निर्वाचन कार्यालयमा उजुरी

महिला अधिकार मञ्चले कांग्रेसबाट लुम्बिनी प्रदेशसभाका उम्मेदवार कुर्मीको उम्मेदवारी खारेजीको माग गर्दै निर्वाचन कार्यालयमा उजुरी पेस गरेको थियो । उक्त उजुरी कात्तिक २९ गते दर्ता भएको निर्वाचन कार्यालय बाँके-३ की प्रमुख रमा पन्तले जानकारी दिइन् ।

कांग्रेस नेता एवं संविधानसभा सदस्यसमेत रहेका कुर्मीमाथि छिमेकी एकल महिला निर्मला कुर्मीलाई जग्गा हडप्ने उद्देश्यले बेपत्ता पारी अपहरण गरेको आरोप छ । उक्त घटनामा बादशाह कुर्मीको संलग्नता रहेको भन्दै प्रहरी प्रशासनले छानबिन गरिरहेको छ । मञ्चकी अध्यक्ष खानले भनिन्, 'सरकारले घटनामा संलग्न भनेर शंका गरेको आरोपित व्यक्ति कसरी उम्मेदवार हुनसक्छ ? त्यसैले पनि मञ्चले बादशाह कुर्मीविरुद्ध उजुरी दिएको हो‚ जुन निर्वाचन अधिकृतको कार्यालयले दर्ता गरेको छ ।'

नेपालगञ्ज उपमहानगरपालिका परस्पुर-१७ की निर्मला कुर्मी हाल बेपत्ता छन् । जिल्ला प्रहरी प्रशासन बाँकेले निर्मलाको कालगतिले भारतमा मृत्यु भएको दाबी गर्दै आए पनि अनुसन्धानले आधिकारिक पुष्टि गर्न सकेको छैन । अधिकारकर्मी खानलगायतका स्थानीयले उक्त घटनाको छानबिन हुनपर्ने माग गर्दै आन्दोलन गरेपछि निर्मला बेपत्ता प्रकरण सार्वजनिक भएको हो । अधिकारकर्मीले काठमाडौंमा आएर आन्दोलन गरेपछि सरकाले छानबिन गर्न समिति गठन गरेको थियो ।

गृह मन्त्रालयले सहसचिव हिरालाल रेग्मीको संयोजकत्वमा २०७८ कात्तिक २ मा गठन गरेको छानबिन समितिले उक्त प्रकरणमा संलग्न कांग्रेस नेता बादशाह कुर्मीलगायत ८ जनाविरुद्ध अनुसन्धान गर्न सिफारिस गरेको थियो । हत्या र सम्पत्ति हिनामिनाको आरोपमा अनुसन्धानमा रहेका व्यक्तिलाई कानुनी कारबाही गर्नुको सट्टा सत्तारुढ दलले नै उम्मेदवार बनाएर प्रोत्साहन गरेको भन्दै अधिकारर्मीले उजुरी दिएका हुन् ।

निर्मला बेपत्ता भएपछि २०७७ चैत २० मा कांग्रेस नेता बादशाह कुर्मीसहित रमेश थापा, पार्वती विष्ट, कृष्णमुरारी सिंह, कुँवर बबनसिंह ठकुरी, उर्मीला कनोजिया, अमरलाल कुर्मी, धीरेन्द्रसिंह गिरिसहित ८ जनाविरुद्ध जिल्ला प्रहरी कार्यालय बाँकेमा जाहेरी परेका थियो ।

२०६६ कार्तिकमा निर्मलाका श्रीमान् महालु कुर्मीको कालगतिले निधन भएको थियो । त्यपछि निर्मला दुई छोरा १८ वर्षका रामसार र १४ वर्षीय सुरेशका साथ बस्दै आएकी थिइन् । निर्मलाका दुवै छोराको २०६८ मा २ साताको अन्तरालमा शंकास्पद मृत्यु भएको थियो । त्यसपछि बेसहारा बनेकी निर्मलाको घर र साढे ४ बिघा जग्गा हडप्न गिरोह सक्रिय बनेको थियो । २०७५ पछि निर्मला सम्पर्कविहीन भएकी थिइन् ।

प्रहरीले भारतमा कालगतिले मृत्यु भएको भने पनि हालसम्म उनको मृत्यु भएको हो वा हत्या भन्ने पुष्टि हुन सकेको छैन । अहिले उनको साढे ४ बिघा जग्गा भूमाफियाको कब्जामा छ ।

सम्बन्धित समाचारः

प्रकाशित : मंसिर १, २०७९ १४:४१
प्रतिक्रिया
पठाउनुहोस्
जनताको राय

छ वर्षअघि अन्त्य भइसकेको यातायात क्षेत्रको सिन्डिकेट ब्युँताउने चलखेल सुरू भएको छ । तपाईंको के राय छ ?