निर्मला कुर्मी बेपत्ता प्रकरण : करोडौं मूल्यको जग्गा हडपेको आरोपमा  ६ जना पक्राउ- समाचार - कान्तिपुर समाचार

निर्मला कुर्मी बेपत्ता प्रकरण : करोडौं मूल्यको जग्गा हडपेको आरोपमा  ६ जना पक्राउ

रुपा गहतराज

नेपालगन्ज — नेपालगन्जकी निर्मला कुर्मीलाई बेपत्ता पारी करोडौं मूल्यको जग्गा हडपेको आरोपमा बाँके प्रहरीले ६ जनालाई पक्राउ गरेको छ । निर्मलाको अपहरण गरी हत्या गरेको आरोपमा रमेश थापा, पार्वती बिष्ट, कृष्णमुरारी सिंह, उर्मिला कनोजिया, अमरलाल कुर्मी र धीरेन्द्र सिंह गरी  ६ जनालाई सोमबार पक्राउ गरिएको बाँकेका डीएसपी मधुसुदन न्यौपानेले बताए । 


आरोपीत कुवर बब्बन सिंहलाई ८० वर्ष भएकाले अदालतले उमेर हदम्यादका कारण साधारण तारेखमा छोडेको छ । अभियुक्तमध्ये पूर्वसांसद बादशाह कुर्मीले भदौमा आफैं जिल्ला प्रहरी कार्यालयमा आएर बयान दिएकाले हाजिरी जमानतमा छाडिएको थियो ।

‘अदालतले सात दिनको म्याद थप गरेकाले पक्राउ गरिएका ६ जनालाई हिरासतमा राखेर अनुसन्धान गर्छौं, ’ डीएसपी न्यौपानेले भने ,‘सादा तारेखमा छुटेका दुई जनामाथि पनि मुद्दा परेकाले उनीहरुमाथि पनि अनुसन्धान गर्छौं । ’

बाँके प्रहरीले निर्मला कुर्मीको भारतमा विवाह भएको र उनको विवाह दर्ता र मृत्यु दर्ता प्रमाणपत्रमाथि समेत अनुसान्धान गरिरहेको जनाएको छ । बाँकेकी निर्मला कुर्मी र नन्कुन्नी धोबी घटनामा छानबिन समितिले सरकारसमक्ष प्रतिवेदन बुझाएपछि आरोपितलाई प्रहरीले लामो समयपछि पक्राउ गरेको हो ।

नेपालगन्ज–१७ परस्पुरकी बेपत्ता निर्मलाको साढे ४ बिघा घरजग्गा भूमाफियाले किर्ते कागज, जालझेल गरी नामसारी गरेको तथ्य भेटिएपछि प्रतिवेदनमा दोषी पक्राउ गर्न सुझाव दिइएको थियो ।

गृह मन्त्रालयका सहसचिव हीरालाल रेग्मी नेतृत्वले गृहमन्त्री बालकृष्ण खाणसमक्ष प्रतिवेदन बुझाएको थियो। प्रतिवेदनमा निर्मलाको जग्गा भूमाफियाले चलखेल गरी हडपेको उल्लेख छ ।

२०६६ सालदेखि बेपत्ता भनिएकी निर्मलाको करोडौं पर्ने जग्गा हिनामिना भएको थियो । २०७७ मा महिला अधिकार मञ्चकी केन्द्रीय सदस्य मनकुमारी गुरतालका नामबाट धनसम्पत्तिका लागि निर्मलाको अपहरण गरी हत्या गरेको आरोपमा बादशाह कुर्मी,रमेश थापा, पार्वती बिष्ट, कृष्णमुरारी सिंह, कुवर बब्बन सिंह, उर्मिला कनोजिया, अमरलाल कुर्मी र धीरेन्द्र सिंह गरी ८ जनाविरुद्ध मुद्दा दायर गरिएको थियो ।

मुद्दा दर्ता भएको एक वर्षसम्म प्रहरीले अनुसन्धान प्रक्रिया अगाडि बढाएको थिएन । असार १३ मा कार्यवाहक सम्हालेलगत्तै एसपी श्यामकृष्ण अधिकारी र डीएसपी मधुसुधन न्यौपानेले निर्मलाको उजुरीमा प्रारम्भिक अध्ययन सुरु गरेको हो । दोषीलाई पक्राउ गर्न बलियो प्रमाण चाहिने हुँदा यसैको अध्ययनका लागि तीन धेरै समय लागेको डीएसपी न्यौपानेले बताए ।

भदौ ३ मा अदालतबाट ८ जना अभियुक्तलाई पक्राउ गर्न आदेश दिइएको थियो । गत भदौ १० मा पूर्वसांसद कुर्मीमात्रै प्रहरीसमक्ष उपस्थित भएर बयान दिएका थिए ।

प्रकाशित : कार्तिक २२, २०७८ १६:०५
प्रतिक्रिया
पठाउनुहोस्

सलमान खान जब फ्यानसँग रिसाए

एजेन्सी

मुम्बई — बलिउड स्टार सलमान खान हालै एक सार्वजनिक स्थलमा आफ्ना फ्यान (प्रशंसक)सँग रिसाए । आइतबार सलमान आफ्नो नयाँ फिल्म 'अन्तिम'को प्रचारका लागि जाँदै गर्दा सेल्फी लिन खोजेका आफ्ना फ्यानसँग रिसाएका हुन् । फ्यानसँग सलमानको अनौठो प्रतिक्रियाले यतिबेला बलिउडमा धेरैको ध्यान तानेको छ ।

भीडका बीच पापराजीले उनको तस्बिर खिचिरहेका थिए । त्यसै बेला सलमानसँग नजिकै आएर एक फ्यानले सेल्फी खिच्न खोजिरहेका थिए । सलमान भने बाध्य भएर केही बेर त सेल्फीका लागि पोज दिँदैथिए । सामाजिक सञ्जालमासमेत भाइरल बनेको तस्बिर र भिडियोमा देखिए अनुसार सलमान पापराजीका बीच फ्यानबाट उम्किन खोज्दा पनि सकिरहेका थिएनन् ।

त्यसै क्रममा सलमानले सुरुमा फ्यानलाई तस्बिर नखिच्न संकेत गर्दै पापराजीले तस्बिर खिचिरहेको भन्दै थिए । 'पापराजीहरूले फोटो खिचिरहेका छन्' उनले भनेका थिए । साथै पापराजीहरूले पनि ती फ्यानलाई फोटो खिच्नका लागि नछेकिदिन आग्रह गरेका थिए । यति भन्दा पनि फ्यानले आफ्नो मोबाइल नहटाएपछि रिसाउँदै सलमानले भने 'नाच्‍न बन्द गर' ।

सलमानले यसअघि पनि यस्तै भीडमा आएका फ्यानहरूप्रति आक्रोस पोख्ने गरेका थिए । बलिउडका स्टार खान यतिबेला नयाँ फिल्म 'अन्तिम' को प्रचारका लागि व्यस्त छन् । जुन फिल्म यसै महिनाको अन्तयतिर रिलिज हुने तयारी भएको बताइएको छ । महेश मन्जरेकरको निर्देशनमा रहेको उक्त फिल्ममा सलमानको मुख्य भूमिका रहनेछ ।

प्रकाशित : कार्तिक २२, २०७८ १५:२३
पूरा पढ्नुहोस्
प्रतिक्रिया
पठाउनुहोस्
x
×