ओलीलाई वाग्लेको सुझाव- न्यायालयप्रतिको भूमिका बिर्सिने हो भने नारायणीबाटै देवघाट जानुस्- समाचार - कान्तिपुर समाचार
कान्तिपुर वेबसाईट
AdvertisementAdvertisement

ओलीलाई वाग्लेको सुझाव- न्यायालयप्रतिको भूमिका बिर्सिने हो भने नारायणीबाटै देवघाट जानुस्

कान्तिपुर संवाददाता

काठमाडौँ — नागरिक अभियन्ता नारायण वाग्लेले न्यायालयप्रतिको धारणा नसच्याए पूर्वप्रधानमन्त्री एव् नेकपा (एमाले) अध्यक्ष केपी शर्मा ओलीलाई नारायण किनारबाट देवघाट जान सुझाव दिएका छन् । 

प्रधानन्यायाधीश चोलेन्द्रशमशेर जबरालाई महाअभियोग लगाउन र न्याय क्षेत्रको शुद्धीकरणका लागि भन्दै बिहीबार विभिन्न पेसागत संगठनहरुले सर्वोच्च अदालत-बालुवाटार न्यायमार्चपछि सम्बोधन गर्दै न्यायालयको समस्याप्रति जवाफदेही नहुने हो भने काठमाडौं नफर्की देवघाट जान भनेका हुन् ।

'लाखौं कार्यकर्ताका साथ अहिले नारायणी किनारमा हुनुहुन्छ । यदि न्यायापालिकाप्रति, अहिलेको भ्रष्टाचार, बिचौलिया न्यायको बारेमा । न्याय भन्ने तत्व नै नरहेको जिनिस बनाइसक्दा पनि, मुद्दाहरु सडकमा छरपस्ट भइसक्दा पनि फैसला गर्ने सबैले राजीनामा दिउन् भन्दै न्यायालयप्रति आफ्नो जवाफदेहिता, भूमिका बिर्सिएरका नेतालाई म भन्न चाहन्छु,' उनको भनाइ थियो, 'तपाईं काठमाडौं नफर्किए हुन्छ यही सोच्ने हो भने । नजिकै देवघाट छ । नारायणी किनारबाट तपाईं देवघाट जानुस् । पाँच लाख कार्यकर्ताले १/१ रुपैयाँ उठाएर पनि तपाईंलाई सुनको कमण्डलु किन्न पुग्छ ।'

उनले नेकपा (माओवादी केन्द्र) का अध्यक्ष पुष्पकमल दाहालको पनि चर्को आलोचना गरेका छन् । राजनीति गर्ने, देश बनाउँछु भन्नेले न्यायापालिका बनाउनु पर्छ कि पर्दैन भन्ने प्रश्न गरेका छन् ।

'हिजो क्रान्ति गरेको गफ गर्नुहुन्छ । तर आजभोलि दैनिक रुवाबासीको भाषण गर्नुहुन्छ । म उहाँलाई जिम्मेवारीबोध गर्न दबाब दिन्छु,' उनको प्रश्न थियो, 'नेपालको राजनीतिक रुपान्तरणमा हिजो जस्ताको तस्तै छोडिएको न्यायपालिका । राजनीति गर्छु देश बनाउँछु भन्ने न्यायापालिका बदल्नु पर्छ कि पर्दैन ?

सम्बन्धित समाचार

प्रकाशित : मंसिर ९, २०७८ १८:१२
प्रतिक्रिया
पठाउनुहोस्

पहिले सभापति उठेका नेताहरू अब विश्राम लिनुस् : निधि

कान्तिपुर संवाददाता

काठमाडौँ — कांग्रेस उपसभापति विमलेन्द्र निधिले १३ औँ महाधिवेशनमै सभापतिमा प्रतिष्पर्धा गरेका नेताहरूलाई अब विश्राम लिन आग्रह गरेका छन् । उनले सभापति शेरबहादुर देउवा र वरिष्ठ नेता रामचन्द्र पौडेललाई पार्टीको सर्वोच्च नेता भएर बस्न आग्रह गरे ।

आसन्न महाधिवेशनमा सभापतिमा उम्मेदवारी दिने घोषणा गरेका निधिले बिहीबार आफ्ना प्रतिवद्वता र योजनाहरु सार्वजनिक गर्दै अब पार्टीको नेतृत्व गर्न दोस्रो पुस्ता सक्षम रहेको बताएका हुन् ।

उनले महाधिवेशनमा समीकरण बनाएर मिलेर अघि बढ्ने विषयमा सबै नेताहरूसँग छलफल भइरहेको बताए ।

‘म समीकरण बनाउनका लागि प्रकाशमानजी, शशांकजी र शेखरजीहरूसँग निरन्तर संवादमा छु । गम्भीर र सकारात्मक संवाद भइरहेको छ । १३ औँ महाधिवेशनमा जो-जो सभापतिको प्रत्यासी हुनुहुन्थ्यो, उहाँहरूले अब १४ औँ महाधिवेशनमा फेरि त्यही पदमा चुनाव नलड्नुस् भन्ने हाम्रो साझा धारणा हो,’ निधिले भने, ‘यसमा हामी चारै जनाको सैद्धान्तिक सहमति छ ।’

उपसभापति निधिले अब पनि आफूले सभापतिको उम्मेदवारीबाट पछि हट्छ कि भनेर शंका नगर्न आग्रह गरे । ‘म सभापतिको उम्मेदवार छु, मैले घोषणा पत्र पनि सार्वजनिक गरिसकेँ । अब २१ गते सभापति पदमा उम्मेदवारी दर्ता गराउँछु । यसमा तपाईहरू ढुक्क हुनुस्,’ निधिले भने ।

उनले पार्टीको नेतृत्वमा पहिलो पुस्ताले त्याग गरेपनि उनीहरूलाई पार्टीको सर्वोच्च नेताकारुपमा सम्मान दिन आफूहरू तयार रहेको बताए ।

‘शेरबहादुरजी, रामचन्द्रजीहरूलाई हामी कांग्रेसको सबैभन्दा सर्वोच्च नेताका रुपमा राख्छौँ, जसरी गणेशमानजी र किसुनजीहरू हुनुहुन्थ्यो, त्यस्तै सम्मान दिन चाहान्छौँ,’ निधिले भने, ‘हामीले छलफल गरिरहेका छौँ । पार्टीको नेतृत्व एकातिर छ, राज्यको फरक भूमिका छ । उहाँहरू राज्यको पदहरूमा बस्न सक्नुहुन्छ । उहाँहरूले गाइड गर्नुहुन्छ, हामी पार्टी चलाउँछौँ । उहाँहरूसँग सल्लाह र परामर्श गरेर नै हामी उहाँहरूको उचित भूमिका तय गर्छौँ । यो ठूलो समस्या होइन, हुँदैन ।’

उनले सबै नेताहरूलाई आफूलाई सहयोग गर्न आग्रह र संवाद गरिरहेको बताए । ‘म उम्मेदवार छु, रहन्छु । म सबैभन्दा पहिले शेरबहादुरजीकै समर्थन चाहन्छु । रामचन्द्रजी, शेखरजी, प्रकाशमानजी र शशांकजीहरू सबैको समर्थन चाहन्छु,’ उनले भने ।

प्रकाशित : मंसिर ९, २०७८ १८:०८
पूरा पढ्नुहोस्
प्रतिक्रिया
पठाउनुहोस्
×