महामारीबीच घरमै इद- समाचार - कान्तिपुर समाचार
कान्तिपुर वेबसाईट
AdvertisementAdvertisement

महामारीबीच घरमै इद

मनोज पौडेल, सन्जु पौडेल

कपिलवस्तु, रुपन्देही — जैतुन निशाले इमाम अहमद बिन हम्बल (बड्की मस्जिद) पुगेर नमाज नपढेको दुई वर्ष भयो । यस पटक भने परिवारसँगै घरमै बसेर नमाज पढिन् । अल्लाहसँग छिटो कोरोना संक्रमण अन्त्यको कामना गरिन् । ‘अर्को वर्ष सद्भाव साटेर मनाउन पाइयोस् भनेर प्रार्थना पनि गरें,’ कपिलवस्तु–५ की उनले सुनाइन् । 

कपिलवस्तुको कृष्णनगर नगरपालिकास्थित एक घरमा बुधबार नमाज पढिँदै। तस्बिर : मनोज पौडेल/कान्तिपुर

कृष्णनगर–३ लक्ष्मीनगरकी फातमा मिर्जालाई घर सुनसान हुँदा खल्लो लाग्छ । कोरोना महामारीले दुई वर्षदेखि चाडमा कसैलाई बोलाउन पाएकी छैनन् । संक्रमण छल्न परिवारसँग बसेरै अल्लाहसँग छिटो महामारी रोकियोस् भनेर कामना गरेको उनले बताइन् ।

मुलुककै दोस्रो मुस्लिम बहुल जिल्ला कपिलवस्तुमा मुस्लिम समुदायका व्यक्तिले घरभित्रै नमाज पढेका छन् । पहिलो दिन बिहान नुहाइधुवाइ गरी नयाँ कपडा लगाए । बास्नादार अत्तर छर्के । घरमै विशेष नमाज पाठ गरेपछि अभिभावकसँग आशीर्वाद लिए । अँगालोमा बेरिएर शुभकामना आदानप्रदान गरे । दोस्रो ठूलो पर्व इद–उल–अजहा (बकर इद) मा इदगाह, मस्जिदमा उनीहरू सामूहिक नमाज पढ्न गएनन् । जिल्लामा भीडभाड गर्न नपाउने गरी निषेधाज्ञा जारी छ ।

रूपन्देहीको सिद्धार्थनगर–९ का ५० वर्षीय फजिज अहमद पर्वका दिन बिहानै उठेर इदगाहमा नमाज पढ्थे । यस पटक उनी त्यहाँ जान पाएनन् । वर्षको दुई पटक पर्ने ठूला इदमा मस्जिद वा इदगाहा जान नपाउनु मुस्लिम धर्मावलम्बीका लागि पीडाको विषय भएको उनले बताए । ‘सामूहिक नमाज वाचन र भोजन गरी हर्षोल्लासका साथ पर्व मनाउँथ्यौं,’ उनले भने, ‘दुई वर्ष भयो, घरमै नमाज पढ्ने र परिवारसँग रमाउने ।’

अल्लाहको आदेशमा इब्राहिमले छोरा इस्माइललाई बलिदान गर्न तयार भएको सम्झनामा यो पर्व मनाइन्छ । धार्मिक मान्यताअनुसार अल्लाहका नवी (दूत) इब्राहिम अलि सलामले ९० वर्षको उमेरमा पत्नी हाजराबाट प्राप्त गरेको सन्तान इस्माइललाई कुर्बानी गर्नॅपर्ने आदेश प्राप्त भयो । जसलाई पालना गर्दा अल्लाह प्रसन्न भएर इस्माइलको कुर्बानी नभएर स्वर्ग (जन्नत) मा पालिएका दुम्बाको कुर्बानी भएको धार्मिक मान्यता छ । यसै कारण अहिलेसम्म कुर्बानी गर्ने प्रचलनलाई कायम राखेको मुस्लिम धर्मावलम्बीको भनाइ छ ।

कोरोनाको डरले मस्जिदमा जम्मा भई नमाज पढ्न नपाएपछि घरमै नमाज पढ्दै बुटवलका मुस्लिम धर्मावलम्बी । तस्बिर : सन्जु/कान्तिपुर

इद–उल–फित्रको ठीक २ महिना १० दिनमा मनाइने पर्वको ठूलो महत्त्व भएको राष्ट्रिय मुस्लिम आयोग सदस्य हाजी मिर्जा अरशद बेगले बताए । अरू दिन फजिर, जोहर, अस्र, मग्रिव र इसाका नामबाट पाँच पटक नमाज पढिन्छ । तर, बकर इदको दिन पाँच पटकमा एउटा थप वाजिव नमाज पनि पढेर मुसलमान समुदायले आ–आफ्नो घरमा खसी, राँगा र भेंडा बलि दिई खुसियाली मनाउने उनले बताए । कुर्बानीको मासु तीन भागमा छुट्याई वितरण गरिन्छ । एक भाग गरिब एवं विपन्न परिवारलाई, अर्को भाग इष्टमित्रलाई र तेस्रो भाग आफैंले खानुपर्ने चलन छ ।

यो पर्वमा कोही पनि मासु खानबाट वञ्चित नहोस् भन्ने मान्यता रहेको छ । बुटवलमा ७ सय मुस्लिम परिवार रहेको मदिन मदरसा मस्जिद प्रबन्ध परिषद् बुटवल–५ का सचिव जमिल मियाँले बताए । एक सय जना अटाउने क्षमता रहेको मस्जिदमा बुधबार २५ जना पदाधिकारी मात्र उपस्थित भई नमाज पढेर शुभकामना आदानप्रदान गरेको उनले बताए ।

प्रकाशित : श्रावण ७, २०७८ ०६:५४
प्रतिक्रिया
पठाउनुहोस्

घोषणा १३ सय मेगावाटको, थपियो ३ सय मात्रै

कोरोना महामारीका कारण धेरै आयोजनाको निर्माण तालिका प्रभावित हुँदा थोरै विद्युत् मात्रै राष्ट्रिय प्रणालीमा जोडिएको हो
विजय तिमल्सिना

काठमाडौँ — सरकारले गत आर्थिक वर्षमा १ हजार ३ सय मेगावाट विद्युत् राष्ट्रिय प्रणालीमा जोड्ने घोषणा गरेको भए पनि ३ सय मेगावाट विद्युत् मात्रै थपिएको छ ।

आर्थिक वर्ष २०७७/७८ को बजेट सार्वजनिक गर्दै तत्कालीन अर्थमन्त्री युवराज खतिवडाले १ हजार ३ सय मेगावाट विद्युत् राष्ट्रिय प्रणालीमा जोड्ने घोषणा गरेका थिए । तर नेपाल विद्युत् प्राधिकरणको तथ्यांकअनुसार गत वर्ष ३ सय १३ मेगावाट विद्युत् मात्रै राष्ट्रिय प्रणालीमा जोडिएको देखिन्छ । जसमा ३० मेगावाट हिस्सा सौर्य ऊर्जाको छ ।

अघिल्लो आर्थिक वर्षको असार मसान्तसम्ममा निजी क्षेत्रका आयोजनाबाट करिब ६ सय ९६ मेगावाट र प्र्राधिकरणका आयोजनाबाट ५ सय ८२ मेगावाट विद्युत् राष्ट्रिय प्रणालीमा जोडिएको थियो । तर गत आर्थिक वर्षमा भने हाँडीखोला १ मेगावाट, अपर रावाखोला ३ मेगावाट, नामार्जुन मादी १२ मेगावाट, घट्टेखोला ५ मेगावाट, विजयपुर दोस्रो ४.५ मेगावाट, अपर चाकु ‘ए’ २२ मेगावाट, मिस्त्रीखोला ४२ मेगावाट गरी ७ वटा आयोजना राष्ट्रिय प्रणालीमा जोडिएर व्यावसायिक उत्पादन गरिरहेका प्राधिकरणका प्रवक्ता मदन तिम्सिनाले जानकारी दिए ।

उनका अनुसार अन्य आधा दर्जन आयोजनाको पनि परीक्षण उत्पादन सुरु गरी राष्ट्रिय प्रणालीमा जोडिएको छ । जसमध्ये माइबेनी १० मेगावाट, सिंगटीखोला २५ मेगावाटले भर्खरै परीक्षण उत्पादन सुरु गरेका छन् । योबाहेक बुटवल सोलारको ८.५ मेगावाट, मिथिला सोलारको १० मेगावाट, प्राधिकरणको नुवाकोटस्थित सोलार आयोजनाबाट १२ मेगावाट गरी ३०.५ मेगावाट सौर्य ऊर्जा पनि राष्ट्रिय प्रणालीमा जोडिएको छ । दुईवटा चिनी मिलले उत्पादन गरेको ६ मेगावाट विद्युत् पनि गत आर्थिक वर्षमै राष्ट्रिय प्रणालीमा जोडिएको तिम्सिनाले जानकारी दिए । माथिल्लो तामाकोसीबाट उत्पादित विद्युत् पनि राष्ट्रिय प्रणालीमा जोडिएको छ ।

सरकारले माथिल्लो तामाकोसीको ४ सय ५६ मेगावाटसहित केही ठूला आयोजनाको निर्माण पूरा भएर राष्ट्रिय प्रणालीमा जोडिने अनुमानसहित गएको बजेटमा १ हजार ३ सय मेगावाट विद्युत् थपिने घोषणा गरेको थियो । तर कोरोना महामारीका कारण धेरै आयोजनाको निर्माण तालिका प्रभावित हुँदा थोरै विद्युत् मात्रै राष्ट्रिय प्रणालीमा जोडिएको हो ।

माथिल्लो तामाकोसीको दुई वटा युनिटबाट परीक्षणका रूपमा उत्पादन गरिएको विद्युत् राष्ट्रिय प्रणालीमा जोडिएको छ । तर परीक्षण थालिएको केही दिनमै प्राविधिक कमजोरी देखिएपछि पहिलो युनिटको विद्युत् उत्पादन परीक्षण तत्काललाई रोकिएको आयोजना स्रोतले जानकारी दियो । तत्कालीन प्रधानमन्त्री केपी शर्मा ओलीले गत असार २१ मा पहिलो युनिटबाट परीक्षण उत्पादनको थालनी गरेका थिए । आयोजनाको दोस्रो युनिटबाट उत्पादित ७६ मेगावाट विद्युत् भने राष्ट्रिय प्रणालीमा जोडिएको छ ।

प्रकाशित : श्रावण ७, २०७८ ०६:५३
पूरा पढ्नुहोस्
प्रतिक्रिया
पठाउनुहोस्
×