शिक्षामन्त्री श्रेष्ठले पनि निर्वाचन आचारसंहिता उल्लंघन गरे

प्रधानमन्त्री ओलीले पनि बुधबार बिहान अपिल जारी गरेका थिए । निर्वाचन आयोगले मंगलबार रातिदेखि नै मौन अवधि सुरु भएको र प्रचारप्रसार गर्न नपाइने जनाएको थियो ।

शिक्षामन्त्री श्रेष्ठ एमालेको वाग्मति प्रदेश राष्ट्रिय सभा निर्वाचन परिचालन कमिटीका संयोजक समेत हुन् । उनले जारी गरिएको अपिलमा पार्टीका उमेद्वार थापालाई मत दिई विजय गराउन आग्रह गरिएको छ । ‘पार्टीको निर्देशन र ह्रिप विपरीत कोहि पनि मदताले निर्दलीय र स्वतन्त्र उमेद्वारको पक्षमा भोट दिनुहुँदैन भन्ने विश्वास लिएको छु’, अपिलमा भनिएको छ । पार्टीको निर्देशन विपरित निर्वाचनमा घात, अन्तर्घात नगर्न पनि सचेत गराइएको छ ।

निर्वाचन आयोगले मंगलबार राति १२ बजेदेखि मौन अवधिको आचारसंहिता लागू हुने भन्दै यसअवधिमा चुनाव प्रसारप्रसार गर्न र मत माग्न नपाइने तथा सामाजिक सञ्जाल र विद्युतीय माध्यमबाट पनि मत माग्न नपाइने जनाएको छ ।

आयोगले बुधबार दिउँसो समेत विज्ञप्ति प्रकाशित गरेर आचारसंहिता पालाना गर्न आग्रह गरेको प्रवक्ता राजकुमार श्रेष्ठले जानकारी दिए । मौन अवधिमा स्वयं उम्मेद्वारले समेत प्रचारप्रसार र आचारसंहिता विपरीतको गतिवधि गर्न नपाउने उनले प्रष्टाए ।

प्रधानमन्त्री ओलीले बिहान अपिल जारी गरेपछि दिउँसो आयोगको विज्ञप्ति आएको थियो । साँझ फेरि शिक्षामन्त्री श्रेष्ठले अर्को अपिल जारी गरेका हुन् । आयोगले मौन अवधिमा मत माग्दै जारी भएका विज्ञप्ति र समाचार सामग्रीप्रति गम्भीर ध्यानाकर्षण भएको जनाएको छ । ‘आचारसंहिता पालाना गर्नु सबैको कर्तव्य हो, आयोगमा उजुरी पनि आएको छ,’ प्रवक्ता श्रेष्ठले भने ।