बिनासुनुवाइ ४० वर्षदेखि भारतीय जेलमा रहेका दीपक छुट्न अझै केही दिन लाग्ने
नयाँदिल्ली — चालिस वर्षदेखि भारतको जेलमा रहेका दीपक जोशी (तिमिल्सिना) जेल मुक्त हुन अझै केही दिन लाग्ने भएको छ । बिना सुनुवाइ चालिस वर्षदेखि भारतका विभिन्न जेलमा रहेका जोशी सोमबार रिहा हुने बताइएको थियो । तर, कोलकाता उच्च अदालतको सोमबार इजलासमा दीपकको मुद्दाको सुनुवाइ भए पनि मुख्य न्यायाधीश थोट्टाथिल बी राधाकृष्णन र न्यायाधीश अनिरुद्ध रोयले फैसला भने सुनाएनन् ।
कोलकातास्थित महावाणिज्य दूतावासका तर्फबाट दीपकको मुद्दाका सम्बन्धमा रिहाइको पहलका लागि आवश्यक समन्वय गर्न खटाइएका सतिश थापाले मुद्दाको अन्तिम सुनुवाइ भए पनि न्यायाधीशहरुले फैसला आउन केही दिन लाग्ने बताए । थापाका अनुसार न्यायाधीशहरुले भारतका अन्य जेलमा रहेका मानसिक अवस्था कमजोर भएका कैदीहरु सबैलाई ध्यानमा राख्दै केही दिनभित्रै फैसला सुनाउने बताएका छन् ।
‘दीपकजस्तै मानिसक अवस्था कमजोर भएका अन्य जेलमा रहेका कैदीहरुलाई समेत ध्यानमा राख्दै दुई तीन दिनभित्रै निकै महत्त्वपूर्ण फैसला सुनाउने बताउनु भएको छ,’ थापाले कान्तिपुरसँग भने । थापाका अनुसार चिकित्सकहरुले आफ्नो रिपोर्ट दीपकको मानसिक अवस्था सानो बालकको जस्तो रहेको उल्लेख गरेका छन् । त्यसैका आधारमा न्यायाधीशहरुले दीपकको मानसिक अवस्थालाई समेत ध्यानमा राख्दै फैसला दिने बताएको थापाले कान्तिपुरलाई जानकारी दिए ।
इलाम घर भएका दीपक जोशी कामको खोजीमा चालिस वर्षअघि दार्जीलिङ पुगेका थिए । अदालतमा पेश गरिएका कागजातहरुका अनुसार उनीमाथि दार्जीलिङमा एक जनाको हत्याको आरोप लगाइएको छ । १२ मे १९८० मा पक्राउ परेका तिमिल्सिनाको मुद्दाको चालिस वर्षसम्म पनि कुनै पनि सुनुवाइ भएको थिएन । तिमिल्सिनाका बारेमा उनको परिवार पनि पूरै बेखबर रह्यो ।
तर, गत असोजमा उनीसँगै कारगारमा लामो समय बसेका भारतीय नागरिक राधेश्याम दास छुटेपछि मात्र तिमिल्सिनाबारे खुलेको हो । उनै दासले स्थनीय वेस्ट बंगाल रेडियो क्लबलाई तिमिल्सिनाका बारेमा खबर गरेका थिए । त्यसपछि इलामका रहेका परिवार र आफन्तले पनि खबर गरिएको थियो । त्यसपछि मात्र उनको रिहाइको पहल सुरु भएको हो । त्यसपछि मात्र अदालतमा उनको मुद्दाको सुुरु भयो ।
उनको रिहाइका लागि क्लब, कोलकातास्थित नेपाली महावाणिज्य दूतावास, पूर्वन्यायाधीश विदुरविक्रम थापा, वरिष्ठ अधिवक्ता सतिशकृष्ण खरेलहरुको विशेष पहल गर्दै आएका छन् ।
प्रकाशित : चैत्र २, २०७७ १५:१०