टुँडिखेललाई मास्न नदिन आग्रह गर्दै प्रमुख जिल्ला अधिकारीलाई ज्ञापनपत्र
![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/mastercreativegif900x100-0952024115624.gif)
काठमाडौँ — खुला मञ्चको संरक्षण र संवर्दनको माग गर्दै अभियन्ताहरूले सोमबार काठमाडौंका प्रमुख जिल्ला अधिकारी जितेन्द्र बस्नेतलाई ज्ञापनपत्र बुझाएका छन् । टुँडिखेलको अभिन्न अंगका रूपमा रहेको खुला मञ्चलाई संरक्षण गर्नुपर्ने भन्दै मुक्त टुँडिखेल(अकुपाई टुँडिखेल) का अभियन्ताहरूले प्रमुख जिल्ला अधिकारलाई ज्ञापनपत्र बुझाएका हुन् ।
![](https://assets-cdn.ekantipur.com/uploads/source/ads/reward-900x100-pxl-2462024072414.gif)
![टुँडिखेललाई मास्न नदिन आग्रह गर्दै प्रमुख जिल्ला अधिकारीलाई ज्ञापनपत्र](https://assets-cdn-api.ekantipur.com/thumb.php?src=https://assets-cdn.ekantipur.com/uploads/source/news/kantipur/2024/third-party/mukta-tundikhel-2912024050600-1000x0.jpg&w=1001&h=0)
![](https://assets-cdn.ekantipur.com/uploads/source/ads/sathi-deposit-900-100-1262024124333.gif)
काठमाडौं महानगरपालिकाले खुला मञ्चलाई खेलमैदान बनाउन लागेको भन्दै अभियन्ताहरूले जनताले ऐतिहासिक कालखण्डदेखि आफ्ना हकअधिकारका लागि आवाज राख्ने ठाउँलाई नमास्न आग्रह गरेका हुन् ।
'खेलमैदान काठमाडौंको आवश्यकता हो यसमा कसैको दुईमत रहन सक्दैन तर खुला मञ्चको आफ्नै सांस्कृतिक, ऐतिहासिक, प्राकृतिक महत्त्व छ । खुला मञ्च सभा सम्मेलन गरी आएको ऐतिहासिक क्षेत्र हो भने हाल रहेको लोकतान्त्रिक गणतन्त्र नेपाल प्राप्तिका लागि महत्त्वपूर्ण क्षेत्र तथा जीवनदायिनीसमेत हो । दुईवटा फुटबल ग्राउन्ड निर्माण हुँदा यहाँ अन्य कार्यहरू हुन नसक्ने र सो क्षेत्रको अनुकूल उपयोगसमेत नहुने स्थिति देखिन्छ,' ज्ञापनपत्रमा भनिएको छ ।
'स्वच्छ, खुला टुँडिखेलका लागि नागरिक सचेतना तथा जनदबाब अभियान' का संयोजक विजय श्रेष्ठले टुँडिखेल अतिक्रमण हुने क्रममा रहेकाले पनि आफूहरूले विभिन्न समयमा यसविरुद्ध आवाज उठाउँदै आएको बताएका छन् ।
सन् १९६७ मा ५२ प्रतिशत सार्वजनिक खुला क्षेत्र भएको टुँडिखेलको भूभाग क्रमशः सन् १९९० मा ३३ प्रतिशत, सन् २००० मा २५ प्रतिशत र सन् २०१७ सम्म आइपुग्दा १४ प्रतिशतमा खुम्चन पुगेको छ, र हाल यसको अतिक्रमण हुने क्रम बढ्दो छ । सोमबार ज्ञापनपत्र बुझाउने क्रममा काठमाडौं क्षेत्र नम्बर ६ का पूर्वसांसद भीमसेनदास प्रधान पनि उपस्थित थिए ।
![](https://assets-cdn.ekantipur.com/uploads/source/ads/900-x-100-0172024023126.gif)