लुम्बिनीका मुख्यमन्त्रीलाई राजीनामा दिन एमालेको आग्रह

पाटी तथा संसदीय दलको तर्फबाट प्रमुख सचेतक तुलसीप्रसाद चौधरीले केन्द्रमा कांग्रेस–एमालेबीच सत्ता गठबन्धन भैसकेकाले लुम्बिनीमा पनि केन्द्रकै अनुसार सरकार बनाउन मुख्यमन्त्रीलाई भेटेर राजीनामा दिन आफुले भनेको बताए ।

केन्द्रको ड्राफ अनुसार लुम्बिनीको मुख्यमन्त्री एमालेले पाउने भएको छ । नेतृत्वका लागि पूर्वमुख्यमन्त्री एवं एमाले संसदीय दलका नेता लिला गिरीले तयारी गर्न थालेका छन् । दल उपनेता एवं निवर्तमान आर्थिक मामिला तथा योजना मन्त्री चेतनारायण आचार्य पनि मुख्यमन्त्रीको लाइनमा छन् ।

एमाले–माओवादी गठबन्धन भएर पाँच दल र एक स्वतन्त्र सांसदको समर्थनमा महरा चैत २३ गते मुख्यमन्त्रीमा नियुक्त भएका थिए ।'ॅमैले मुख्यमन्त्रीलाई भेटेर पहिला एमाले–माओवादी गठबन्धन थियो, हामी तपाइको नेतृत्वको सरकारमा थियौं,’ उनले भने, 'अब केन्द्रमा कांग्रेस–एमालेको सत्ता सहकार्य भयो । अब हामी कांग्रेससँग मिलेर सरकार बनाउँछौं, तपाई अल्पमतमा पुर्नभयो । परिस्थिति परिवर्तन भएकाले राजीनामा दिएर राजनीति उचाई कायम राख्न भनेको छु ।’

राजीनामाको प्रस्तावमा मुख्यमन्त्री सकारात्मक देखिएपनि आर्थिक वर्षको अन्त्यतिर भएकाले सञ्चालित योजनाहरुको भुक्तानीको काम देखाएर अलमलको प्रतिक्रिया दिएको चौधरीले बताए ।

बिहीवार साँझ एमालेका पाँच जना मन्त्रीले पदबाट राजीनामा दिएर सरकारलाई दिएको समर्थन फिर्ता लिएका छन् । ८७ सदस्यीय सांसद रहेको लुम्बिनी प्रदेशसभामा आवश्यक बहुमतको लागि ४४ सांसद चाहिन्छ ।

एमालेका २९, माओवादी १०, नागरिक उन्मुक्ती पाटीका ४, जसपा ३, नेकपा एस एक र स्वतन्त्र सांसद खड्क बस्नेत गरी ४८ सांसदको महरा मुख्यमन्त्री बनेका थिए । यसअघि सरकारलाई समर्थन गरेको जसपा विभाजन भएपछि उपेन्द्र यादव नेतृत्वको जसपा नेपालतिर लागेकी अम्बिका काफ्लेले असार ९ गते नै समर्थन फिर्ता लिएका थिइन् ।

एमाले सरकारबाट बाहिरिएपछि अहिले मुख्यमन्त्रीसँग माओवादीका १०, नागरिक उन्मुक्ति पाटीका चार, अशोक राई नेतृत्वको जसपाका दुई, नेकपा एसको एक र स्वतन्त्र सांसद एक गरी १८ जना सांसद मात्रै रहेका छन् ।

लुम्बिनीमा एमाले २९ र कांग्रेस २७ गरी ५६ जना सांसद भएकाले सरकार बनाउन बहुमत पुग्छ ।