दम्पतीकै कृति

पाण्डे दम्पतीको संयुक्त कृति ‘रहस्यः जीवन र प्रेम’ एवं नम्रता एक्लैको ‘ऊर्जा’ वाङ्मय शताब्दी पुरुष सत्यमोहन जोशी र नेपाल विद्युत् प्राधिकरणका कार्यकारी निर्देशक कुलमान घिसिङले लोकार्पण गरे । समसामयिक एवं सामाजिक विषयवस्तु केन्द्रित ‘ऊर्जा’ मा ४७ निबन्ध छन् ।

व्यक्तिमा रहेको ऊर्जालाई जागृत गरेर समाजका विभिन्न क्षेत्रमा फैलाउने कोसिस गरे सत्कर्मका माध्यमबाट सबैतिर प्रकाशमय बनाउन सकिने लेखकद्वयको विश्वास छ । आफूभित्रको ऊर्जा पहिचान गरी निरन्तर लगनशील र इमानदारीपूर्वक कर्म गरे जीवनमा सकारात्मक रूपान्तरण ल्याउन यो कृतिले केही मात्रामा भए पनि मद्दत गर्ने विश्वास उनीहरूले लिएका छन् ।

‘जीवन वास्तवमै रहस्यमय छ र रहस्य जहिले पनि सानो कुरामा छिपेको हुन्छ । प्रेम त्यो रहस्यलाई उजागर गर्ने एउटा सशक्त माध्यम हो,’ प्रद्युम्नले भने । पुस्तकमाथि समालोचक डा. रामप्रसाद ज्ञवाली, डा. लेखप्रसाद निरौला, दायित्व वाङ्मय प्रतिष्ठान नेपालका अध्यक्ष रामप्रसाद पन्तलगायतले प्रकाश पारे ।