सापकोटाको ‘समीकरण जिन्दगीको’ सार्वजनिक

कान्तिपुर संवाददाता

काठमाडौँ — कवि ध्रुवकुमार सापकोटाको कविता संग्रह बजारमा आएको छ ।  ‘समीकरण जिन्दगीको’ नेपाल प्रज्ञा प्रतिष्ठानमा शुक्रबार आयोजित समारोहमा कवि तुलसी दिवस, गीतकार रत्नशमशेर थापा, कथाकार प्राज्ञ माया ठकुरी, कवि प्राज्ञ विवश पोखरेल लगायतले सार्वजनिक गरे ।

ZenTravel

Meroghar

विराटनगरबाट काव्यिक सृजन यात्रा थालेका सापकोटा हाल निदरल्यान्डमा बसोबास गर्छन् । उनको यो पहिलो कविताकृति हो, जसमा विविध विषयका ४५ सृजना छन् । ‘बाहिर बसे पनि सापकोटाका सृजनामा देशकै चिन्ता देखिन्छ,’ कवि प्रमोद प्रधानले टिप्पणी गरे, ‘तर तिनमा अहिलेका आम नेपाली कवितामा जस्तो राजनीतिक सन्दर्भ नगण्य छन् ।’

कवि मञ्जु काँचुलीले सापकोटाका कविता भावना र अनुभूतिले धनी पाएको सुनाइन् भने साहित्यिक पत्रकार रोचक घिमिरेले ती सरल भएर पनि गम्भीर अर्थ दिने खालको रहेको उल्लेख गरे । अर्का साहित्यिक पत्रकार नगेन्द्रराज शर्माले संग्रहका धेरै कविता प्रतीकात्मक र व्यंग्यात्मक रहेको बताए ।

कवि सापकोटाले बाहिर बसे पनि आफूले देशलाई सधैं ‘मिस’ गर्ने गरेको र आफ्ना सृजनामा त्यही भावना प्रतिविम्बित हुने गरेको सुनाए ।

समारोहमा कवि गोकुल अधिकारी र सापकोटाले संग्रहका केही कविता वाचन समेत गरेका थिए । उक्त कृति जनता प्रकाशनले छापेको हो ।

प्रकाशित : कार्तिक १६, २०७६ २१:१३
ADVERTISEMENT
प्रतिक्रिया
पठाउनुहोस्

बंगलादेशका राष्ट्रपति कात्तिक २६ मा आउने

कान्तिपुर संवाददाता

काठमाडौँ — बंगलादेशका राष्ट्रपति अब्दुल हमिद चारदिने भ्रमणका लागि कात्तिक २६ मा नेपाल आउने भएका छन् । बंगलादेशको उच्च कूटनीतिक स्रोतबाट प्राप्त जानकारीअनुसार भ्रमणको मिति तय भइसके पनि दुवै देशले सार्वजनिक गरेका छैनन् ।

हमिदको भ्रमणबारे सबैभन्दा पहिले बंगलादेशका विदेश सचिव साहिदुल हगले कात्तिक ९ मा आयोजित पत्रकार सम्मेलनमा जानकारी दिएका थिए । बंगलादेशको अंग्रेजी दैनिक ‘द डेली स्टार’ का अनुसार विदेश सचिव हगले केही समयअघि अजरबैजानको बाकुमा सम्पन्न असंलग्न अभियानको १८ औं शिखर सम्मेलनलगत्तै गरिएको पत्रकार सम्मेलनमा हमिदले नेपाल भ्रमण गर्ने जानकारी दिएका हुन् ।

हमिदको नेपाल भ्रमणक्रममा दुई पक्षबीच बीबीआईएन (बंगलादेश, भुटान, भारत र नेपाल) बीच हुने भनिएको मोटर भेहिकल सम्झौता र ऊर्जा व्यापार सम्झौता (पीटीए) हुने सम्भावना छ ।

सचिव हगले राष्ट्रपति हमिदको नेपाल भ्रमणका दौरान ती विषयमा सकारात्मक छलफल हुने बताएका छन् । उनले बीबीआईएनअन्तर्गत रहेर हुने भनिएको मोटर भेहिकल सम्झौताबाट भुटान पछि हटे पनि बाँकी तीन देश मिलेर अघि बढ्न सकिने बताएका थिए ।

नेपाल–भारत–भुटान र बंगलादेशबीच सीधा बस सेवा सञ्चालन गर्ने भनिए पनि भुटानले नमानेकाले हालसम्म उक्त काम अघि बढ्न सकेको छैन । अहिले नेपाल र भारतबीच मात्र सिधा बस सेवा सञ्चालनमा छ ।

प्रकाशित : कार्तिक १६, २०७६ २०:४२
पूरा पढ्नुहोस्
ADVERTISEMENT
प्रतिक्रिया
पठाउनुहोस्
×