निर्वेदमा युवा जोगीको कथा
काठमाडौँ — गजल र समालोचनामा नाम बनाएका शैलेन्द्र अधिकारीले नयाँ कृति ल्याएका छन् ।
युवा जोगीको कथामा आधारित उपन्यास ‘निर्वेद’ को शनिबार राजधानीमा नेपाल प्रज्ञा प्रतिष्ठानका सदस्यसचिव प्रा. जगत्प्रसाद उपाध्याय ‘प्रेक्षित’, त्रिभुवन विश्वविद्यालयका उपप्राध्यापक सुदीप पोख्रेल, साहित्यकार रूपक अलङ्कारले सार्वजनिक गरे ।
आख्यानकार अधिकारीले साना कथाहरूका रूपमा पढ्न सकिने ससाना कथाहरूलाई उनेर उपन्यास बनाएका छन् । अलङ्कारले कृतिमाथि बोल्दै उपन्यासमा दार्शनिक पक्ष सशक्त रहेको दाबी गरे । दैनिक जीवन र लोकव्यवहारलाई पनि लेखकले उत्कृष्ट तरिकाले प्रस्तुत गरेको उनले दाबी गरे ।
उपप्राध्यापक पोख्रेलले कृतिमा एउटा युवकले आफ्नो बाल्यकाल वा भूतकालमा आफूले भोगेका अनुभव सम्झेर वैराग्यता महसुस गरेका प्रसंग सुन्दर रहेको औंल्याए । उपन्यासकार अधिकारीले अरू कसैले नलेखेको विषयमा जोखिम उठाएको दाबी गरे । कृति शिखा बुक्सले छापेको हो ।
प्रकाशित : आश्विन ५, २०७६ ०८:२८