दामोदरको सम्पदा लेखन
काठमाडौँ — पत्रकार एवं स्रष्टा दामोदर न्यौपाने सातौं कृति ‘सम्पदा लडाइँ’ सहित आएका छन् । शनिबार राजधानीको वसन्तपुर डबलीमा वरिष्ठ कवि एवं गीतकार दुर्गालाल श्रेष्ठले कृति लोकार्पण गरे ।
पुरानो पुस्ताले समेत वास्ता गर्न छोडेको सांस्कृतिक सम्पदाको जगेर्नामा युवापुस्ता लाग्नु प्रशंसनीय भएको बताउँदै श्रेष्ठले न्यौपानेको पुस्तक सम्पदा मिच्नेहरुका लागि बलियो अस्त्र सावित हुने दाबी गरे ।
पुस्तकमाथि समीक्षा गर्दै समालोचक ज्ञानु अधिकारीले न्यौपानेको पुस्तकले इतिहासलाई बचाइराख्न सघाउने बताए । आत्मपरक शैलीमा लेखिएको भए पनि भाव र विचार बलियो रहेको उनको दाबी थियो । सम्पदाविद् रवीन्द्र पुरी, अधिवक्ता प्रकाशमणि शर्मालगायतले मासिन लागेका सम्पदा संरक्षणको दिशामा पुस्तकले ठूलो योगदान दिने बताए ।
लामो समयदेखि सम्पदा संरक्षणसम्बन्धी कलम चलाउँदै आएका कान्तिपुरकर्मी न्यौपाने मासिँदै गइरहेको उपत्यकाका सम्पदाको पछिल्लो अवस्थाले पुस्तक लेखनमा प्रेरणा मिलेको बताए । पुस्तक सांग्रिला प्रकाशनले छापेको हो ।
प्रकाशित : भाद्र २१, २०७६ २०:५९