ब्याकस्ट्रिट ब्वाइजको पुनरागमन

नयाँ एल्बम डीएनएका लागि नयाँ नै रणनीति अपनाएका छन् । अरु नाम चलेका केही ब्यान्डले जस्तै आफ्नो पछिल्लो एल्बमलाई टुरको टिकटसँग उपलब्ध गराएका छन् ।
कान्तिपुर संवाददाता

काठमाडौँ — व्याकस्ट्रिट ब्वाइजले यो उपलब्धिका लागि साँच्चै २० वर्ष कुर्नुपर्‍यो, तर यो ब्यान्डको पुनरागमन आपैंmमा अद्वितीय भने छ ।

अहिले चारैतर्फ यही ब्वाई ब्यान्डको चर्चा छ । अब पनि यसलाई ब्वाई ब्यान्ड भन्न मिल्ला र ? पक्कै पनि ब्यान्डका सदस्यहरू पहिले जस्तो कहाँ कलिला युवा रहे र ? तर पनि ब्यान्डका गीत भने उस्तै छन्, युवा पुस्तामा केन्द्रित ।


कुनै समय थियो, जति बेला ब्याकस्ट्रिट ब्वाइजले खुबै तहल्का मच्चाएको थियो । फेरि यस्तै तहल्का मच्चाइरहेको छ । ब्यान्डले केही समय भयो, आफ्नो नयाँ एल्बम निकालेको, ‘डीएनए’ को नाममा । अहिले यही एल्बमले भर्खरै बिलबोर्ड चार्ट्समा नम्बर १ स्थान कब्जा गरेको छ । सन् २००० मा ब्यान्डको त्यति बेलाको एल्बम ‘ब्ल्याक एन्ड ब्लु’ यसरी नै नम्बर १ स्थानमा पुगेको थियो । आरसीआर रेकर्डले निकालेको अहिलेको एल्बम यो साताको सबैभन्दा बढी बिक्री हुनेमा पनि परेको छ । फेरि एकपल्ट अहिलेको युवा पुस्ताले पनि ब्यान्डप्रति उस्तै माया देखाएको छ ।


ब्याकस्ट्रिट ब्वाइज अर्थात् अमेरिकाको त्यो भोकल ग्रुप हो, जसका सदस्य हुन्, एज म्याकलिन, हो डोरोग, निक कार्टर, केभिन रिचर्डसन र ब्रायन लिटरेल । सन् १९९३ मा ब्यान्डको स्थापना भएको थियो, फ्लोरिडाको ओरलान्डोमा । यो कति पुरानो कुरा हो भने जति बेला ब्यान्ड बन्यो, त्यति बेला आई ट्युन्स भन्ने थिएन । हुँदा हुँदा अमेरिकन आइडल पनि सुरु भएको थिएन । ब्यान्ड बनेको दुई वर्षपछि त यो कार्यक्रम सुरु भएको थियो ।


अनि जति बेला ‘ब्ल्याक एन्ड ब्लु’ नम्बर १ भएको थियो, त्यति बेला भर्खरै सीडीको जमाना चलिरहेको थियो । सीडीकै बिक्रीको आधारमा त्यो एल्बम शीर्ष स्थानमा पुगेको थियो । अहिले नम्बर १ चयन गर्ने चलन पनि नयाँ भइसकेको छ । अहिले बिलबोर्डले स्ट्रिमिङ सर्भिसमा जुन गीत बढी क्लिक हुन्छ, त्यही अगाडि हुन्छ । यस्तोमा ब्याकस्ट्रिट ब्वाइजले आफ्नै आँखा गाडी ठूलै कालखण्डको यात्रा तय गरेको छ । समयको आधारमा यो कमै होला पनि ।


तर प्रविधिको आधारमा धेरै । ब्यान्डका पाँचै सदस्य अहिले ४० वर्षको हाराहारीमा पुगिसकेका छन् । उनीहरू पनि नयाँ एल्बम डीएनएका लागि नयाँ नै रणनीति अपनाएका छन् । बन जोभी र अरू नाम चलेका केही ब्यान्डले जस्तै ब्याकस्ट्रिट ब्वाइजले पनिआफ्नो पछिल्लो एल्बमलाई टुरको टिकटसँग उपलब्ध गराएका छन् । अर्थात् ब्यान्ड अहिले टुरमा निस्कने क्रममा छ । जसले त्यो टुरको एउटा टिकट किन्यो, उसले अब एल्बम पनि पायो ।


डीएनए आपैंmमा भने ब्यान्डको सातौं स्टुडियो एल्बम हो । रिलिज भएको दिन पनि भर्खरै भने हुन्छ, २५ जनवरी । एल्बमका प्रमुख गीतहरू ‘डन्ट गो ब्रेकिङ माइ हार्ट्स’, ‘चान्सेस’ र ‘नो प्लेस’ अहिले खुबै लोकप्रिय भएका छन् । ब्यान्डले आफ्नो टुर भने मे महिनाबाट सुरु गर्दैछ र पहिलो गन्तव्य रहेको छ, पोर्चुगलको लिस्वन । एल्बममा कुल १२ गीत छन् । टुरका क्रममा ब्यान्ड अझ चर्चामा रहनेछ र एल्बम फेरि बिक्रीमा अगाडि पर्नेछ । यो ब्यान्डको महान्् पुनरागमन नै हुनेछ ।
–हिमेश

प्रकाशित : माघ २५, २०७५ ११:४१
प्रतिक्रिया
पठाउनुहोस्

इन्स्टाको फोटो...’ चोरिएकै हो त ?

अचेल भाइरल बनेको गीत ‘इन्स्टाको फोटो...’ लाई कार्ला बु्रनीको फ्रेन्च गीतबाट कपी गरिएको आरोप लागेको छ । यसबारे कम्पोजर/गायक कालीप्रसाद बाँस्कोटा के भन्छन् त ?
गोकर्ण गौतम

काठमाडौँ — नेपालको युट्युब ट्रेन्डिङमा तीन सातादेखि एउटा गीत चम्किरहेको छ, ‘इन्स्टाको फोटो...’ ।

केही दिन एक नम्बरमै बस्यो । आशिफ शाह र र रेश्मा घिमिरे फिचरिङ गरिएको यसको भिडियो पनि स्तरीय छ । यही गीतको जवाफ दिँदै इलिना चौहानले गाइन् । यसले पनि लोकप्रियता कमाइरहेको छ । इलिनाको सुमधुर स्वरले साँच्चै मन्त्रमुग्ध बनाउँछ । यही बेला फेसबुक गु्रपमा ‘इन्स्टाको फोटो...’ को प्यारोडी भाइरल भइरहेको छ । उस्तै लयमा गाइएको गीतको शब्दले भन्छ :


चोर्छौ रे अझै पनि
उसैगरी गीतलाई
गाको जस्तो गर्छौ रे तिमी
देखाउनलाई...


अब भन्नु नपर्ला, ‘इन्स्टाको फोटो...’ लाई चोरीको आरोप लागेको छ । युट्युबमा ५० लाख भ्युज बटुल्नुमा यो विवादको भूमिकालाई पनि नकार्न सकिन्न । चोरी पनि हिन्दी वा अंग्रेजी होइन, फ्रेन्चबाट । गीत हो, कार्ला बु्रनीको ‘केल्क्याँ...’ । यसलाई अंग्रेजीमा सबटाइटल गरिएको भिडियो युट्युबमा खुब खोजी हुन थालेको छ । त्यसमा एउटा लाइन छ, ‘यु स्टिल लभ्ड मी’ । अनि, ‘इन्स्टाको गीत...’ मा पनि गायकले दोहोर्‍याइरहन्छन्, ‘अझै मलाई माया गर्छेउ रे ।’ अर्थात्, गीतको लय मात्र होइन, ‘थिम’ पनि मिल्दोजुल्दो छ ।


अब भनिहालौं, ‘इन्स्टाको फोटो...’ को गायक, संगीतकार र गीतकार अरू कोही नभएर कालीप्रसाद बाँस्कोटा हुन् । जो फिल्म संगीत र पाश्र्व गायनमा केही समययता शिखरमा छन् । तर यसपटकको चोरीको लफडाले बाँस्कोटाको विश्वसनीयता र साखमाथि कठोर प्रश्न खडा
गरेको छ ।


इटालियन–फ्रेन्च कार्ला बु्रनी गायिकामात्र होइन, ख्यातिप्राप्त गीत लेखक र सुपरमोडल पनि हुन् । उनी फ्रान्सका पूर्वराष्ट्रपति निकोलस सार्कोजीकी तेस्रो पत्नी हुन् । आमश्रोताले उनका गीत नसुने पनि नेपाली संगीतकर्मीमाझ कार्ला परिचित छिन् । ‘केल्क्याँ...’ सन् २००२ मा रिलिज भएको थियो । शब्द एकातिर पन्छाउने हो भने पनि यो गीत र ‘इन्स्टाको फोटो...’ सुन्दा उस्तै–उस्तै लाग्छ । यद्यपि कतिपयले चोरिएको भन्न नमिल्ने बताएका छन् । संगीत क्षेत्रकै दिग्गजहरू कपी गरिएको दाबी गर्छन् । तीनैमध्येका एक हुन्, चर्चित पपगायक सञ्जय श्रेष्ठ । ‘माया मेरो माया...’ का यी गायक भन्छन्, ‘कर्ड प्रोग्रेसन र मेलोडी स्टाइल मिल्छ । त्यसैले गीत चोरिएकै हो ।’ यो वास्तविकता बाहिरिएसँगै सामाजिक सञ्जालमा बाँस्कोटाको चर्को आलोचना भइरहेको छ ।


तर बाँस्कोटा मौन छन् । खासमा नेपाल आइडल सिजन २ सकिएको केही दिनमै उनी अमेरिका उडेका थिए । ‘इन्स्टाको फोटो...’ आउँदा पनि उतै थिए । अहिले पनि उतै छन् । फोन सम्पर्कमा बाँस्कोटाले ‘कपी’ वा ‘चोरी’ शब्द त प्रयोग गरेनन् । यत्ति स्विकारे, ‘हो, म कार्लाको गीतबाट धेरै प्रभावित भएको छु ।’


बाँस्कोटालाई एकजना दाइले त्यो गीत सुनाएका रहेछन् । अर्थ नबुझे पनि उनलाई मेलोडी मन परेछ । पछि त्यही दाइको माध्यमबाट थाहा पाएछन्, यसको मुख्य लाइनले ‘तिमी मलाई अझै माया गर्छौ’ भन्ने अर्थ दिन्छ । बाँस्कोटा भन्छन्, ‘मेरो गीतको शब्दमा यही लाइनमात्र मिल्छ, अरू मिल्दैन ।’ ‘इन्स्टाको फोटो...’ कम्पोज गर्दा उनको दिमागमा त्यही गीत खेलिरहेको थियो । त्यसैले त्यसको चर्को प्रभावबाट बच्न सकेनन् । उनी थप्छन्, ‘कम्पोज गरेर साथीहरूलाई सुनाएँ । उनीहरूले मिल्दैन, केही फरक पर्दैन भने । सायद त्यो बेला म ‘मिस गाइड’ भएँ ।’ तर उनको यो व्यथा आफैंमा तर्कसंगत छैन । कारण, उनीजस्ता गिनेचुनेका संगीतकारलाई लय मिले/नमिलेको आफैं थाहा हुन्छ/हुनुपर्छ ।


बाँस्कोटाप्रति ‘सफ्ट कर्नर’ राख्न सकिने एउटा बहाना मिलेको छ । त्यो भनेको, उनमा गल्ती बोध भएको छ । भन्छन्, ‘मैले कम्तीमा कार्ला ब्रुनीको गीतबाट प्रभावित भनेर क्रेडिट दिनुपथ्र्यो । तर दिइनँ । त्यसमा मैले इमानदारिता देखाउन नसकेकै हो ।’ यति गरेको हुँदो हो त अहिले गीत हिट भइरहँदा विवादमा फसेर तनाव झेल्नु पर्थेन, खुसियाली मनाउने माहोल मिल्थ्यो ।


छुटाउनै नहुने अर्को एउटा प्रसंग अहिले बाँस्कोटाप्रति संगीतप्रेमी आक्रोशित हुनुको कारण ‘इन्स्टाको फोटो...’ विवादमात्र होइन । यसअघि पनि उनले गीत कपी गरेका थिए । जस्तो : ‘मञ्जरी’ फिल्मको ‘मन यो मेरो हजुर...’ गीत सुन्नुस्, हिन्दी फिल्म ‘शोर इन सिटी’ को ‘सैबो...’ सँग हुबहु मिल्छ । त्यति बेला उनले अब यस्तो हँुदैन भन्ने आशयको अभिव्यक्ति दिएका थिए । तर त्यसपछि पनि त्यो प्रवृत्ति त्यागेनन् ।
उनको अर्को हिट गीत ‘ठमेल बजार...’ पनि विवादमुक्त हुन सकेन । अघिल्लो वर्ष फिल्म ‘डमरुको डन्डीबियो’ का लागि ‘तितेपाती तितेपाती...’ कम्पोज गरे । तर यसलाई आफ्नो गीतबाट कपी गरिएको आरोप लगाए, अर्का गायक प्रकाश पौडेलले । उनका अनुसार ‘तितेपाती तितेपाती...’ बोलकोगीत २०५७ सालमा रेकर्ड भएर अर्को वर्ष नै सार्वजनिक भएको थियो ।एकातिर बाँस्कोटा हिट छन्, अर्कातिर बारम्बार चोरीको आरोप खेप्नुपरेको छ । चर्चाको लासला र बजारको माग थेग्न नसकेर सिर्जना र साधनाभन्दा तानतुन पार्ने ‘सजिलो बाटो’ मा रमाउन थालेका त हैनन् ?

gokarna.gtm@gmail.com

प्रकाशित : माघ २५, २०७५ ११:३९
पूरा पढ्नुहोस्
प्रतिक्रिया
पठाउनुहोस्