चेपाङ बस्ती र हेलम्बुमा मिस वर्ल्ड

मिस वर्ल्डमा नेपालबाट प्रतिनिधित्व गरेकी खतिवडाले ‘ब्युटी अफ पर्पज’ यही स्वास्थ्य चौकीको सामाग्री प्रस्तुत गरेर जितेकी थिइन् । शुक्रबार मिस वर्ल्ड र आयोजकलाई उनले आफ्नो काम अवलोकन गराएकी हुन् । चेपाङ बस्तीमा गत वर्ष निर्माण गरिएको स्वास्थ्य चौकीको अवलोकनपछि मिस वर्ल्डकी अध्यक्ष मोर्लेले बर्थिङ सेन्टर चलाउन आर्थिक सहयोग गर्ने प्रतिबद्धता गरेको गाउँपालिका अध्यक्ष टंकबहादुर मोक्तानले बताए । विश्व सुन्दरी हेर्नेका लागि स्थानीयवासी टाढाटाढाबाट आएका थिए । कार्यक्रममा वाग्मती प्रदेश सांसद मुनु सिग्देल, सभासद गोविन्दराम चेपाङ, हेटौंडा उपमहानगरपालिकाकी उपमेयर मीनाकुमारी लामालगायतको सहभागिता थियो ।

यसैगरी, सिन्धुपाल्चोकको हेलम्बुको हिमाली क्षेत्र घोप्टेघ्याङमा निर्माणाधीन ६० किलोमिटर ग्रेट ट्रेलको छेउमा विश्व सुन्दरी सिंह पुगेलगत्तै उनलाई हेर्ने र सेल्फी खिच्नेको लर्कोले एकैपटक छोप्यो । विश्वकै अग्लो चीनको ग्रेटवालको अनुसरण गरेर बौद्ध परम्पराको धर्मचक्र पर्खालअनुरूप सम्भवतः विश्वकै दोस्रो ग्रेटवाल गुरु रेन्पोछे ‘हिमालयन ग्रेट ट्रेल’ मा पुगेर उनले वरिपरिको दृश्य ध्यानपूर्वक हेरिन् । ग्रेट ट्रेलको १ सय १० मिटरको संरचना हेरेपछि उनले हृयोल्मो बौद्धधर्म परम्पराअनुसार रेन्पोछे र गुरुहरूबाट अभिषेक छेजु आशिष लिइन् ।

मिस वर्ल्डले खाइन् ढिँडो

हेलम्बु–७ स्थित साबिक इचोकको सुरर्सिङमा पुगेर त्यहाँको स्थानीय महाकालेश्वरी आधारभूत विद्यालयका बालबालिकालाई भेट्दै काखमा लिएर स्नेह देखाइन् । शुक्रबार बिहानै मिस वर्ल्ड सीईओ जुलियो मोर्ले, मिस वर्ल्ड डाइरेक्टर स्टिभ डगलेससहित मिस नेपाल अनुष्का र पूर्व मिस नेपाल शृंखलालगायत १५ जनाको टोलीसहित आयो । ३ वटा एभरेस्ट हेलिकप्टरबाट घोप्टेघ्याङ र बौद्ध लामा गुरुसँगै एभरेस्ट हेलिकप्टरमा आएकी टोनीले हिमाली गाउँ सुरर्सिङको स्थानीयको घरमा ह्योल्मो परिकार चिया, ढिँडो र साग चाखिन् ।

मिस नेपाल अनुष्काले हेलम्बु—७ इचोकको सुरर्सिङमा चलाएको परियोजना हेरेर उनले तानमै बसेर गलैँचा बुन्न सिकाइरहँदा स्थानीय झनै दंग देखिए । त्यहाँ बालबालिका र महिलाको हितमा धुप र गलैँचाजस्ता सीपमूलक अनेक तालिम दिँदै आएको नेपाल सुन्दरी अनुष्काले सञ्चारकर्मीलाई जानकारी दिइन् । यहाँको अवस्थाबारे भिडियो र सूचना दिएर ब्युटी प्रपोज प्रतियोगिता गाउँक्षेत्रको प्रस्तुतिले जितेपछि विश्वसुन्दरी हेलम्बुमा आएको उनको कथन छ । नेपाल सुन्दरी श्रेष्ठको परियोजनाअन्तर्गतको बौद्धधर्ममा अपरिहार्य मानिने धुप उत्पादन गर्ने मेसिन र गलैँचा बुन्ने तान अवलोकन गरेपछि अतिथिलाई बिदा गरिएको हेलम्बु गाउँपालिकाका प्रमुख निमाग्याल्जेन शेर्पाले बताए ।

ग्रेट ट्रेलमा सुन्दरीको प्रतिबद्धता

हेलम्बुलाई पर्यटनमा अब्बल बनाउन ठडिएको ह्योल्मो धर्मचक्र पर्खालअनुसारको ‘हिमालयन ग्रेट ट्रेल’ लाई सय मिटर बनाउने पूर्व मिस नेपाल शृंखलाले प्रतिबद्धता व्यक्त गरिन् । टोनीले हेलम्बु–७ स्थित सुरर्सिङको आयमूलक कार्यक्रम ‘ब्युटी प्रपोज’ का लागि २० हजार डलर सहयोग गर्ने प्रतिबद्धता गरेकी छन् ।