रंगियो कर्णाली

कान्तिपुर संवाददाता

(सुर्खेत) — खुलामञ्चमा भरिभराउ दर्शक । कलाकारको स्वागतका लागि जब उद्घोषकले नाम लिए, दर्शकको हुटिङ निरन्तर भइरह्यो । सुरुमै मञ्चमा बोलाइएका अभिनेता राजेश हमाल आकर्षणको केन्द्र बने । 

कर्णाली प्रदेशको राजधानी वीरेन्द्रनगरमा बिहीबार आयोजित ‘सप्तरंग–२’ को सांगीतिक माहोल लोभलाग्दो थियो । कर्णालीबासीले विभिन्न विधाका कलाकारको प्रस्तुतिमार्फत् मनोरञ्जन लिए । वीरेन्द्रनगर–६ की मनीषा राईले कार्यक्रमले सबैलाई भरपुर मनोरञ्जन दिएको बताइन् । ‘सबै कलाकारको प्रस्तुति एउटै मञ्चबाट हेर्न पाइयो,’ उनले भनिन्, ‘सायद वीरेन्द्रनगरमा यति भव्य सांगीतिक कार्यक्रम भएको थिएन ।’ मुगुका उज्ज्वल शाहीले कार्यक्रमले सबैलाई सकारात्मक सन्देश प्रवाह गरेको बताए । उनले कलाकारका सन्देशसहितका प्रस्तुति सबैका लागि प्रेरणादायी बनेको सुनाए ।

कलाकारलाई स्वागत गर्दै कर्णालीका मुख्यमन्त्री महेन्द्रबहादुर शाहीले यस्ता कार्यक्रमले मनोरञ्जनसँगै सबैलाई सामाजिक सचेतना प्रदान गरेको बताए । ‘कर्णालीको पर्यटन प्रवर्द्धनका लागिसमेत कार्यक्रमको विशेष महत्त्व छ,’ उनले भने, ‘कर्णाली नेपाली भाषा र संस्कृतिको उद्गमथलो भएको सन्देश पनि सप्तरंगमार्फत् प्रस्तुत भएको छ, सबै विधाका ख्यातिप्राप्त कलाकारले एकै ठाउँमा संयुक्त प्रस्तुति दिनु नौलो र उदाहरणीय छ ।’ समाजमा कला र संगीतमार्फत् शान्ति र सद्भावको सन्देश दिन जरुरी रहेको उनले सुनाए ।

सद्भाव र्‍यालीसहित सप्तरंग समूह कार्यक्रमस्थल पुगेको थियो । ‘कलाले सबैको भावना बोक्छ, सबैको भाषा बोल्छ र हामीलाई एकसूत्रमा बाध्छ,’ अभिनेता हमालले भने । कर्णाली विकासमा पछाडि भए पनि कला, संस्कृति, पर्यटन र अथाह सम्भावनाले भरिपूर्ण भएको उनको भनाइ थियो । ‘राइझुमा...’ गाउँदै स्टेज प्रवेश गरेका जितु नेपालले देशको परिस्थिति र विभिन्न विसंगतिविरुद्ध व्यंग्य प्रस्तुत गरे । उनले पारिवारिक विखण्डनदेखि देशको समसामयिक परिस्थितिको चिरफार गरे । देउडासँगै केही पुराना कलाकारका गीत गाएका रवि ओड पनि युवापुस्ताको रोजाइमा परे । प्रकाश सपुत, सुगम पोखरेल, मेलिना राई र हिमाल सागरले पनि गीत गाए । जितुले सुदूरपश्चिमको लयमा गाएको ‘कर्णाली’ गीतले पनि दर्शकको मन तान्यो ।

प्रकाशित : कार्तिक २९, २०७६ ०८:५५
ADVERTISEMENT
प्रतिक्रिया
पठाउनुहोस्
ADVERTISEMENT

बालकक्षा शिक्षकको तलब ‘दोब्बर’

गणेश राई

काठमाडौँ — सामुदायिक विद्यालयका प्रारम्भिक बालकक्षामा पढाउने शिक्षकको तलब दोब्बर हुने भएको छ । उनीहरूले मासिक ६ हजार रुपैयाँ मात्र पाउँदै आएकामा हालै सार्वजनिक राष्ट्रिय शिक्षा नीति, २०७६ मा प्रारम्भिक बालकक्षामा अध्यापन गर्ने शिक्षक र विद्यालय कर्मचारीलाई श्रम ऐनले तोकबमोजिम न्यूनतम पारिश्रमिक उपलब्ध गराउने उल्लेख छ । श्रम ऐनमा न्यूनतम पारिश्रमिक मासिक १३ हजार ४ सय ५० तोकिएको छ । 

शिक्षा नीतिले प्रारम्भिक बालकक्षा पढाउने शिक्षकको योग्यता एसईई पास तोकेको छ । ‘प्रारम्भिक बालकक्षा तथा बाल विकास केन्द्रहरूमा अध्यापन गर्ने शिक्षक हुन माध्यमिक शिक्षा परीक्षा (कक्षा १०) वा सो सरहको योग्यता हुनुपर्ने,’ शिक्षा मन्त्रालयले सार्वजनिक गरेको नीतिमा भनिएको छ । नीतिमा हाल कार्यरतलाई योग्यता हासिल गर्न अवसर प्रदान गरिने पनि भनिएको छ । सरकारले बालविकासदेखि कक्षा १२ सम्म विद्यालय तह कायम गरिएपछि बाल विकास तहमा अध्यापन गर्ने शिक्षकको योग्यता तोकेको हो ।

४ वर्ष उमेर पूरा नगरेका बालबालिकालाई विद्यालय पढाइ तथा सामाजिकीकरण अभ्यास गराउने अवधारणाअनुसार सरकारले बाल विकास केन्द्रको व्यवस्था गरेको हो । देशभरिमा ३० हजार ४ सय ४८ सामुदायिक बाल विकास केन्द्र छन् । संस्थागत (निजी) तर्फ ६ हजार १ सय २० पूर्वप्राथमिक शिक्षा (मन्टेसरी) छन् । सरकारको अनुदानमा सामुदायिक बाल विकास केन्द्र सञ्चालन गरिएका हुन् । शिक्षा विकास तथा मानव स्रोत केन्द्र (साबिक शिक्षा विभाग) को तथ्यांकअनुसार सामुदायिक र निजी बाल विकास केन्द्रमा ९ लाख ५८ हजार १ सय २७ बालबालिका पढ्छन् ।

आर्थिक वर्ष २०५६/५७ मा सामुदायिक बाल विकास केन्द्रको औपचारिक सुरुवात भएको हो । पढाउन खटाइएका व्यक्तिलाई ‘सहयोगी कार्यकर्ता’ भनिन्थ्यो । अहिले बाल विकास शिक्षक नामकरण गरिएको छ । प्रत्येक केन्द्रमा एक जना शिक्षक व्यवस्था गरिएको छ । उनीहरूले मासिक ६ हजार रुपैयाँ पारिश्रमिकसँगै थप एक महिनाको चाडपर्व खर्च पाउँदै आएका छन् । बाल विकास शिक्षकको पारिश्रमिकमा वार्षिक २ अर्ब ३७ करोड रुपैयाँभन्दा बढी खर्च हुँदै आएको छ । बालबालिका सिकाइ सामग्रीका निम्ति प्रतिविद्यार्थी पाँच सय रुपैयाँ खर्च हुने गरेको छ । त्यसमा बजेट ४७ करोड ९० लाख रुपैयाँभन्दा बढी हुने केन्द्रले जनाएको छ ।

विभागअन्तर्गत प्रारम्भिक बाल विकास शाखाका अधिकृत धनसूदन चौलागाईंले नीतिअनुसार ऐन बनेर आएपछि नयाँ व्यवस्था लागू हुन सक्ने बताए । ‘अहिले नै लागू हुने/नहुनेबारे कुनै परिपत्र भएको छैन,’ उनले भने । चौलागाईंले चालु आर्थिक वर्षबाट बाल विकास केन्द्रमा पढाउने शिक्षकलाई पोसाक भत्तासमेत उपलब्ध गराइएको जानकारी दिए । विद्यालय सञ्चालन निर्देशिका, २०६१ अनुसार बाल विकास केन्द्रमा विद्यालय व्यवस्थापन समितिअन्तर्गतको उपसमितिले प्रतिस्पर्धाका आधारमा शिक्षक नियुक्त गर्छ ।

प्रकाशित : कार्तिक २९, २०७६ ०८:४९
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
×