फिल्ममा हिजो आजका कुरा 

कान्तिपुर संवाददाता

काठमाडौँ — नेपाल टेलिभिजनमा २०५२ सालदेखि लगातार १८ वर्षसम्म समसामयिक सामाजिक, राजनीतिक घटनाक्रमलाई समेटेर हास्यकलाकार सन्तोष पन्तले ‘हिजो आजका कुरा’ चलाए । यही टेलिशृखंलाले नै पन्तलाई हास्यअभिनयको क्षेत्रमा स्थापित गरायो ।

तर शृंखला बन्द भएपछि भने उनी निष्क्रियजस्तै रहे । अब भने पन्तले सोही नाममा फिल्म बनाउने भएका छन् । छोरा साकारको निर्देशनमा पन्तले शुक्रबार फिल्म ‘हिजो आजका कुरा’ निर्माणकोघोषणा गरे ।

‘त्यसबेला टेलिशृंखलामा पनि हिन्दी सिरियलको ठूलो प्रभाव थियो । मैले ‘हिजो आजका कुरा’ सुरु गर्दा केही थाहा थिएन । तर त्यहींबाट सिक्दै गएँ । मध्यमवर्गलाई लक्षित गरी तीज, दसैं, माघेसंक्रान्तिका कथादेखि नेपालीकै व्यथालाई समेटेर हास्यरसमा कार्यक्रम पस्कन थालेको हुँ,’ कार्यक्रममा विगत सम्झँदै पन्तले भने, ‘अब फिल्ममा पनि अहिलेकै समस्यालाई समेटेर बनाउने प्रयास गरेको छु । पक्कै पनि दर्शकलाई रुचिकर लाग्ला ।’ पन्तकै कथालाई सन्दीप किस्नाले तयार पारेको पटकथामा काठमाडौंका चार परिवारको समस्या र संघर्षलाई देखाउन खोजिएको छ । जसमा विदेश सपनालाई फिल्मको मुख्य विषय बनाइएको बताइएको छ ।

पहिलो पटक फिल्म निर्देशन गर्न लागेका साकारले फिल्म पनि टेलिशृंखला ‘हिजो आजका कुरा’ कै धार र नाममा आधारित रहेर बन्ने प्रस्ट्याउँदै थप्छन्, ‘सामाजिक विकृतिलाई कसरी सही ढंगले लैजान सकिन्छ भन्ने सन्देश पनि फिल्मले दिनेछ ।’ उनले ‘हिजो आजका कुरा’ पन्त फिल्म प्रोडक्सनको लिगेसी भएको जिकिर गर्दै फिल्म कमेडी जनरामा नै बन्ने बताए ।

फिल्ममा पनि टेलिशृंखलाकै जोडी सन्तोष पन्त र रमा थपलिया मुख्य भूमिकामा हुनेछन् भने नितेशराज पन्त, ऋचा शर्मा, केकी अधिकारी, रिमा विश्वकर्मा, जेबिका कार्की, रमेश अधिकारी, सविन शाक्य, विनायक कुइँकेल, अनुष्का अधिकारीलगायत कलाकारले अभिनय गर्ने भएका छन् । रवि सायमीको छायांकन रहने फिल्मको सम्पादन विनय कंसाकारले गर्नेछन् भने गीत, संगीत हर्क्युलिस बस्नेतको रहने उल्लेख गरिएको छ ।

प्रकाशित : कार्तिक ३, २०७६ ०९:२२
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

बलिउडमा बायोपिकको बाढी

कान्तिपुर संवाददाता

काठमाडौँ — प्राय: फिल्मले दर्शकलाई काल्पनिक संसारमा लगेर यसका चरित्र र घटनासँग साक्षात्कार गराउँछन् । त्यसैले पनि फिल्मलाई सृजनात्मक माध्यम मानिन्छ । तर कहिलेकाहीं फिल्मले वास्तविक घटना वा चरित्रका कथा पनि भन्ने गर्छ । जसलाई बायोपिक भन्ने गरिन्छ । बलिउडमा यतिबेला बायोपिकमार्फत् खेलाडी, कलाकार, नेता वा कुनै सहासिक, अप्रत्याशित घटनाबारेमा कथा भन्ने चलन बढेर गएको छ । सन् २०१९ सकिँदासम्म बलिउडमा एक दर्जन बायोपिक रिलिज हुने भएका छन् ।

सन् २०११ को अन्त्यतिर सिल्क स्मिथाको जीवनीमा आधारित फिल्म द डर्टी पिक्चर हिट भएपछि बायोपिकको पछिल्लो लहर बढेको मानिन्छ । विद्या वालन स्टारर डर्टी पिक्चरले बक्सअफिसमा पैसा मात्रै कमाएन, तीनवटा नेसनल अवार्डसमेत जितेको थियो । त्यसपछि २०१२ मा आएको अर्को बायोपिक पानसिंह तोमरले पनि त्यस्तै सफलता चाख्यो । २०१६ मा आउँदासम्म दंगल, एम एस धोनी : द अनटोल्ड स्टोरी, सर्वजित, निरजा गरी आधा दर्जनभन्दा बढी बायोपिकले नाम र दाम कमाए । गतवर्ष पनि बायोपिकको दबदबालाई कायम राख्दै प्याडम्यान, सञ्जु, गोल्डजस्ता फिल्म आए ।

यस वर्ष बायोपिकको लहर बलिउडमा झन् बढेर गएको छ । तर नतिजा भने मिश्रित देखिएको छ । वर्षको सुरुवात नै भारतीय पूर्वप्रम मनमोहन सिंहमाथि बनेको बायोपिक द एक्सिडेन्टल प्राइमिनिस्टर र गुन्डा नाइके बाल ठाकरेमाथि आधारित फिल्म ठाकरे दुवैले आशातीत सफलता पाउन सकेनन् । त्यसैगरी पीएम नरेन्द्र मोदी र द स्काई इज पिंक पनि फ्लप बायोपिकको सूचीमा परे । धन्न, मणिकर्णिका : द क्विन अफ झाँसी, सुपर ३०, गल्ली ब्वाई, मिसन मंगल, बाटला हाउस, उरी : द सर्जिकल स्ट्राइक, केशरीले बायोपिकको इज्जतलाई धाने । साँडकी आँख, पानीपत अझै रिलिज क्रममा छन् ।

द डर्टी पिक्चरका निर्देशक मिलन लुथरिया अहिलेका दर्शकले फिल्ममा पनि वास्तविकता हेर्न चाहेको बताउँछन् । भन्छन्, ‘दर्शकहरू त्यस्ता वास्तविक घटना वा चरित्रलाई हेरेर आफैं महसुस गर्न थालेका छन् ।’ तर फिल्म समीक्षक अजय ब्रहात्मज अहिले खासगरी खेल र व्यक्तिमाथि बनिरहेका बायोपिकप्रति खासै खुसी छैनन् । उनी भन्छन्, ‘खास अर्थमा बायोपिक बनेकै छैनन् । भीडले जे खोज्छ, त्यसैको पछि लागेर बायोपिकको नाममा मसला फिल्म बनाइरहेका छन् ।’

पुराना पत्रकार जयप्रकाश चौकसी पनि बायोपिक बनाउँदा वास्तविक कथासँग थोरै सम्झौता गरेर मसला हाल्नुपर्ने बाध्यता रहने बताउँछन् । उनले राजकुमार हिरानीले पनि सञ्जय दत्तको जीवनी भन्दै बनाएको सञ्जु सही अर्थमा बायोपिक नभई परीकथा भएको टिप्पणी गरे । चौकसीले यसरी फिल्म बनाएर बायोपिकमाथि अन्याय गरेको जिकिर गरे ।

प्रकाशित : कार्तिक ३, २०७६ ०९:२०
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्