तीन दिन ६ फिल्म

कान्तिपुर संवाददाता

काठमाडौँ — चिनियाँ समाज र संस्कृति बुझन् फिल्म सशक्त माध्यम हुन सक्छ । यही ध्येय बोकेर हरेक वर्ष हुँदै आएको चिनियाँ फिल्म महोत्सव यसपटक आउँदो साता राजधानीमा हुँदै छ ।

मंगलबारदेखि जमलस्थित राष्ट्रिय नाचघरमा हुने तीनदिने महोत्सवमा ६ वटा चिनियाँ फिल्म प्रदर्शन हुँदै छ ।

नेपालस्थित चिनियाँ सांस्कृतिक केन्द्र र वर्ल्ड कल्चरल नेटले गर्न लागेको महोसत्वमा यसपटक चिनियाँ फिल्म ग्रुप कर्पोरेसनको पनि सहभागिता रहने छ । महोत्सवअन्तर्गत नै यस वर्ष पेकिङ युनिभर्सिटीको आर्ट इन्स्टिच्युटका प्रोफेसर चेन सुगुआङसँग विशेष अन्तरसंवाद पनि हुने नेटका अध्यक्ष दीपक सरकारले बताए ।

‘यो अन्तरसंवादले नेपाली चलचित्रकर्मीहरूलाई चिनियाँ कला र फिल्मबारे बुझ्न सजिलो हुने छ,’, उनले भने । महोत्सवमा यसपटक चर्चित निर्देशक वङ्गकार वाईको निर्देशन रहेको ‘द ग्रान्डमास्टर ’, दाँते लामको निर्देशन रहेको ‘अपरेसन मेकङ’, जा ज्याक्युज अनौदको निर्देशन रहेको ‘वुल्फ टोटेम’, लेस्त चेनको निर्देशन रहेको ‘ब्याटल अफ मेमोरिज’, हान यानको निर्देशन रहेको ‘गो अवे मिस्टर ट्युमर’ र हाई चोङको निर्देशन रहेको फिल्म ‘रनिङ लाइक विन्ड’ देखाइने छ ।

हरेक दिन २ वटा फिल्म प्रदर्शन गरिने उक्त महोत्सवमा प्रवेश निःशुल्क रहने महोत्सव संयोजक राजेन्द्र रिमालले जनाए ।

प्रकाशित : भाद्र २६, २०७६ १०:१२
प्रतिक्रिया
पठाउनुहोस्

होलेरीमा “पानी फोटो”

काशीराम डाँगी

रोल्पा — केही वर्ष यता रोल्पाको होलेरीमा शान्ति केन्द्रित गतिविधि वृद्धि भएका छन् । अहिले यहाँ बम र बारुदको गन्ध विल्कुल छैन । सशस्त्र द्वन्द्वकालीन पीडा भुल्दै होलेरी मात्र होइन, पूरै रोल्पाले शान्तिकालीन श्वास फेरिरहेको छ ।

त्यसैले बम र बारुदको बादल फाट्दै यति बेला रोल्पा र होलेरीमा शान्ति, समृद्धि र प्रगतिको आकाश फराकिलो बनिरहेको छ । कुनै बेलाको द्वन्द्वग्रस्त यो भूमिमा यति बेला फिल्मकर्मीहरू आइपुगेका छन् । खगेन्द्र लामिछानेको निर्देशन रहेको फिल्म ‘पानी फोटो’ को होलेरीमा धमाधम छायांकन भइरहेको छ ।

‘पशुपति प्रसाद’ र ‘धनपति’ जस्ता सामाजिक धारका फिल्म निर्माण गरिसकेको टुकी आर्टस्ले द्वन्द्वकालकै कथामा ‘पानी फोटो’ लाई यहाँ छायांकन थालेको हो । यसअघि नाटकको रूपमा मञ्चन भइसकेको ‘पानी फोटो’ को लेखन निर्देशक स्वयंले गरेका छन् । ‘विगतको सशस्त्र द्वन्द्वको प्रभाव देखाउन खोजेको हुँ,’ लामिछानेले बताए ।

उनका अनुसार उक्त फिल्ममा पन्ध्र वर्षअघि द्वन्द्वका कारण बेपत्ता भएको व्यक्तिको बाबुआमाको कथा समेटिएको छ । छायांकन गर्दा फिल्मको कथाजस्तै रोल्पाको गाउँ, बस्ती र पाखा पखेरा समेटिने उनले बताए । सशस्त्र द्वन्द्वका कारण परिवारको प्रिय व्यक्ति लामो समय बेपत्ता हुँदा परिवारमा कस्तो अवस्था आइपर्छ ? परिवारले के भोगेको हुन्छ ? त्यसबाट समाजमा कस्तो प्रभाव पर्छ ? फिल्मले खोतल्ने छ ।

यति बेला फिल्म युनिट दक्षिण रोल्पाको रुन्टिगढी गाउँपालिका आइपुगेको छ । केही दिन यहीँ रहेर युनिटले रुन्टिगढीभित्र पर्ने होलेरी बजार, खस्रे डाँडा, सैबाङ क्षेत्र, जौंलीपोखरी, दहवन, भांगोबारी क्षेत्रमा छायांकन गर्ने छ । सुन्दर प्राकृतिक क्षेत्रलाई चलचित्रमा समेटिए पनि कथा भने दुःखदायी हुने बताइएको छ । कथा तत्कालीन माओवादीले २०५२ फागुन १ बाट रोल्पाको होलेरीबाट सुरु गरेको सशस्त्र द्वन्द्व र त्यसको प्रभाव सेरोफेरोमै केन्द्रित हुने छ ।

फिल्ममा अनुप बराल, मेनुका प्रधान, मलिका महत, खगेन्द्र लामिछानेलगायत मुख्य भूमिकामा छन् । प्रकाश घिमिरे, माओत्से गुरुङ, बुद्धि तामाङ, अजस्र ढुंगाना, कमलमणि नेपाल, आशान्त शर्मा, राधा श्रेष्ठ, श्यामकुमार खड्का, कमल देवकोटा, अनोज पाण्डे, अनिल पाण्डेलगायतको पनि अभिनय रहने छ ।

दीपक वज्राचार्य छायांकनमा व्यस्त छन् । निर्माण टोलीले दुईपटक आएर रोल्पामै छायांकन स्थलको सुनिश्चितता गरेका हुन् । कथाअनुसारको छायांकन स्थल र छायांकन स्थलअनुसारको कथा तयार गरिएकाले समय लागेको निर्देशक लामिछानेले बताए । उनले यस फिल्मले वास्तविक समाजको ऐना सार्वजनिक गर्ने विश्वास व्यक्त गरे ।

छायांकन स्थल रोल्पामा छनोट गर्नुको कारणबारे लामिछाने भने, ‘सशस्त्र द्वन्द्वको सुरुवात पनि रोल्पाबाट भएकाले छायांकन अन्यत्र गर्नुको खासै अर्थ छैन । त्यसैले हामी यहाँ आयौं ।’ फिल्ममा स्थानीय मगर समुदाय, उनीहरूको लय, भाका र भेषभूषा र संगीतलाई पनि समेटिने उनले बताए । स्थानीय संस्कृतिलाई फिल्ममार्फत् राष्ट्रियकरण गर्न सकिने उनको मत छ ।

गाउँमै छायांकन गर्न आँगनमै कलाकार आएपछि स्थानीय खुसी छन् । कलाकारलाई आफ्नैअघि भेटेका गाउँपालिकाका प्रमुख बालाराम बुढाले खुसी व्यक्त गर्दै होलेरीले शान्ति र प्रगतिको सन्देश प्रवाह गरेको दाबी गरे । भने, ‘तत्कालीन सशस्त्र द्वन्द्वका बेलामा होलेरीमा कोही आउन सक्ने अवस्था थिएन । सबै डराउँथे । तर अहिले राष्ट्रिय कलाकारलाई ल्याउन सक्यौं ।’

यसअघि गाउँपालिकाकै आयोजनामा होलेरीमा बेग्लाबेग्लै समयमा विकास र अक्षर सम्मेलन सम्पन्न गरेका उनले शान्ति प्रक्रियापछि विकासले गति लिन थालेको बताए । फिल्मले होलेरी क्षेत्रलाई पनि चिनाउने गाउँपालिकाका प्रमुख प्रशासकीय अधिकृत चिरञ्जीवी जीएमले बताए ।

द्वन्द्व र होलेरी
दक्षिण रोल्पामा अवस्थित होलेरी तत्कालीन सशस्त्र द्वन्द्वको पहिलो निसाना गरिएको मुख्य स्थल हो । त्यसैले द्वन्द्वपछिको राजनैतिक चर्चासँगै होलेरीको चर्चा राष्ट्रिय र अन्तर्राष्ट्रिय रूपमा भएको थियो । २०५२ फागुन १ मा तत्कालीन माओवादीले होलेरी प्रहरी चौकीमाथि पहिलोपटक आक्रमण गरेपछि चर्चा चुलिएको हो ।

विद्रोहीले पुनः २०५८ मा होलेरी प्रहरी चौकीमाथि आक्रमण गरेका थिए । त्यस क्रममा एक प्रहरीको हत्या गरिएको थियो भने करिब ७२ प्रहरी विद्रोहीको नियन्त्रणमा पुर्‍याइएका थिए । उक्त घटनालगत्तै सेना परिचालन गर्न खोज्दा तत्कालीन प्रधानमन्त्री गिरिजाप्रसाद कोइरालाले राजीनामा दिनुपरेको थियो । सेना परिचालन गर्न गरेको प्रयासमा तत्कालीन राजा वीरेन्द्रले समर्थन नदिँदा कोइराला प्रधानमन्त्रीबाट हट्नु परेको थियो ।

प्रकाशित : भाद्र २६, २०७६ १०:११
पूरा पढ्नुहोस्
प्रतिक्रिया
पठाउनुहोस्