ट्रेन्डिङमा ‘कृ’

कान्तिपुर संवाददाता

काठमाडौँ — युट्युबको नेपाल ट्रेन्डिङमा प्राय: दक्षिण भारतीय फिल्म वा विभिन्न ‘काण्ड’ का भिडियोले नै वर्चस्व जमाउने ट्रेन्ड देखिने गरेको छ ।

सनसनीपूर्ण शीर्षक राखिएका अतिरञ्जित काण्डवाला भिडियोलाई समेत पछि पार्दै यति बेला नेपाली फिल्म ‘कृ’ युट्युबको नेपाल ट्रेन्डिङको पहिलो स्थानमा आएको छ । हाई लाइटस् नेपाल च्यानलबाट चार दिन अपलोड गरिएको ‘कृ’ ले मंगलबार साँझसम्म ३७ लाख २५ हजार भन्दा बढी भ्युज पाइसकेको छ । नौ हजार बढी कमेन्टस् आएका छन् ।

सुरेन्द्र पौडेल निर्देशित उक्त फिल्ममा अनमोल केसी, अदिति बुढाथोकी, अनुपविक्रम शाहीलगायतको मुख्य भूमिका रहेको छ । बुढाथोकीले यसै फिल्मबाट नेपाली रजतपटमा नायिकाका रूपमा डेब्यु गरेकी हुन् । बक्सअफिसमा मध्यम व्यापार गरेको फिल्मलाई युट्युब दर्शकले मिश्रित प्रतिक्रिया दिएका छन् । अधिकांश प्रतिक्रिया अनमोलका फ्यान र हेटर्सले दिएका छन् । प्रतिक्रियामा सुरज विक लेख्छन्, ‘फिल्मको स्टोरी राम्रै भए पनि फिल्मभित्र कथाले मागेको डायलग, फाइट अनि अभिनय खास आउन सकेन । अनमोल केसीको भ्वाइसलाई एक्सन मुभी सुहाउँदो रहेनछ ।’ भगवान् घिमिरे नामबाट अर्काले पनि झन्डै यस्तै प्रतिक्रिया दिएका छन् । उनले अनमोलको फिगर, फेस र डायलग बोल्ने शैली सबै कुरा हेर्दा एक्सन फिल्ममा नभई लभस्टोरीमै खेल्न सुहाउने धारणा राखेका छन् । घिमिरे लेख्छन्, ‘एक्सनका लागि हिरो अलिक बोल्ड नै हुनुपर्छ । हुन त साउथ इन्डियन फिल्ममा लुरे हिरोहरू पनि एक्सन फिल्म खेल्छन्, के भनौं खै । समग्रमा फिल्म वाह भन्नुभन्दा पनि औसत नै लाग्यो ।’

यसै सातादेखि सुरु भएको टेलिभिजन सिगिंङ रियालिटी सो ‘द भ्वाइस अफ नेपाल’ को दोस्रो सिजन सुरु भएको छ । चार दिनअघि दोस्रो सिजनको पहिलो भाग द भ्वाइस अफ नेपालकै च्यानलबाट युट्युबमा अपलोड गरिएको थियो । जुन यतिबेला नेपाल ट्रेन्डिङको दोस्रो स्थानमा आइपुगेको छ । उक्त कार्यक्रमलाई झन्डै २४ लाख पटक हेरिइएको छ भने ७५ हजार बढीले ‘लाइक’ गरेका छन् । झन्डै आठ हजार प्रतिक्रिया आएका छन् । प्रतिक्रिया प्रतियोगीले भन्दा बढी यसका कोचहरूले बटुलेका छन् । अघिल्लो सिजनका प्रमोद खरेल र दीप श्रेष्ठसहित यस पटकदेखि राजु लामा र आस्था राउत नयाँ सदस्यका रूपमा भित्रिएका हुन् । अधिकांश सुखद प्रतिक्रियाहरू कोच राजुप्रति आएका छन् । त्यसपछि प्रमोदलाई पनि रुचाइएको प्रतिक्रिया दिइएको छ । कतिपयले नयाँ कोचका रूपमा आस्था भित्रिएकोमा खुसी व्यक्त गरेका छन् । तर कार्यक्रममा लोक गीत गाएका प्रतिस्पर्धी छनोट हुन नसकेकोमा निराश एम कल्पना नामक एक लेख्छिन्, ‘रिस उठ्यो बेस्सरी । लोक गीतलाई पनि प्राथमिकता दिनुपर्‍यो । अब लोक गायकलाई पनि कोच राख्नुपर्‍यो ।’

ट्रेन्डिङको तेस्रो स्थानमा अर्को नेपाली फिल्म ‘ऐश्वर्य’ आएको छ । बुढासुब्बा डिजिटलले पाँच दिनअघि उक्त फिल्मलाई युट्युबमा राखेको थियो । २२ लाख ३० हजार पटक हेरिसकिएको उक्त फिल्मले ३६ सयभन्दा बढी कमेन्टस् बटुलिसकेको छ । कुनै समयका चकलेटी नायकका रूपमा दर्शक रिझाउन सफल रमेश उप्रेती करिअर छोडेर लामो समय विदेशमा बसे । फिल्म ‘चकलेट’ बाट अभिनेताका रूपमा असफल कमब्याक जनाएका उनलाई आफ्नै निर्माणको ‘ऐश्वर्य’ ले भने केही राहत दिएको थियो । कुशेन्द्र राई उप्रेतीबारे लेख्छन्, ‘आज धेरै खुसी छु म, पुरानो हिरोको यति प्रगति देख्दा । जे भए पनि पुरानो भनेको पुरानो नै हो । फिल्म पनि राम्रो नै लाग्यो ।’ दिवाकर भट्टराईको निर्देशन रहेको उक्त फिल्ममा रमेशसहित केकी अधिकारी र दीपिका प्रसार्इंको मुख्य भूमिका रहेको छ । फिल्मले बक्सअफिसमा मध्यम व्यापार गरेको थियो । सागर तामाङले भने मध्यान्तरपछि हुने केकीको इन्ट्रीपछि मात्रै फिल्म राम्रो लागेको धारणा राखेका छन् । उनले त्यसअघि भने फिल्म पट्ट्यारलाग्दो लागेको प्रतिक्रिया दिएका छन् । त्यसो त कतिपयले फिल्मभन्दा बढी विज्ञापन आएर झर्कोलाग्दो भएको टिप्पणी पनि गरेका छन् । पवन सिम्खडाले त व्यंग्य नै गरेका छन्, ‘विज्ञापन हेरेको अलिअलि फिल्म पनि रहेछ ।’

प्रकाशित : भाद्र ४, २०७६ ०८:५२
प्रतिक्रिया
पठाउनुहोस्

शोषणविरुद्ध “एक चिहान”

दीपक परियार

(पोखरा) — वृद्ध अष्टनारायणको परिवार खेतीमा निर्भर छ । श्रीमती, दुई छोरा, एक छोरी र एक बुहारी घरको कामसँगै खेतीमा रमाउँछन् । अष्टनारायण रोगले थलिन्छन् । उनको परिवार उनलाई ऋण, धन गरेर भए पनि उपचार गर्ने ध्याउन्नमा छ । उनी भने आफूलाई ‘साक्षात धन्वन्तरी भगवान् नै आए पनि बचाउन नसक्ने’ बताएर परिवारलाई खेतीपातीमा लाग्न भन्छन् । 

उनलाई उपचार गर्न खर्चको अभाव हुन्छ । उपचार गर्ने बहानामा डाक्टर गोदत्तप्रसाद अष्टनारायणकी जवान छोरी नानीथंकुसँग नजिकिन्छन् । तीन छोराछोरीका बुबा गोदत्तप्रसाद धनको तुजुकले नानीथंकुलाई आफ्नो बाहुपासमा बेर्न खोज्छन् । अष्टनारायण बितेपछि चाहिने काजकिरिया खर्चसमेत दिएर प्रभावित बनाउँछन् । अष्टनारायणका जेठा छोरा शिवनारायण भने बुबाको भनाइ सम्झेर डाक्टरलाई निको मान्दैनन् ।

नानीथंकुलाई आँखा गाड्नेमा सुरमान सुब्बा पनि हुन्छन् । ५७ वर्षीय उनी आफ्ना कारिन्दा रामबहादुरमार्फत १७ वर्षीय नानीथंकुसँग बिहे गर्ने कुरा चलाउँछन् । ब्याज मिनाहा गर्ने, आधुनिक तान उपहार दिने गरेर उनी नानीथंकुलाई फकाउँछन् । अष्टनारायण प्रगतिशील सोचका हुन्छन् । उनी सकेसम्म आफ्ना छोराछोरीको बिहे फरक भूगोल र समुदायकासँग गराउन चाहन्छन् । त्यही सम्झेर छोरा शिवनारायण गोदत्तप्रसाद र सुरमान साहुलाई दुत्कार्छन् ।
हृदयचन्द्रसिंह प्रधानको उपन्यास ‘एक चिहान’ को नाट्य रूपान्तरणले शोषणको कथा बोलेको छ । पोखरा थिएटरले तयार गरेको नाटक गन्धर्व नाटकघरमा मञ्चन भइरहेको छ । नाट्य रूपान्तरण र निर्देशन परिवर्तनले गरेका हुन् । दस जोड दुईको अनिवार्य नेपालीमा नाटक समावेश भएकोले विद्यार्थीले रुचि देखाएका छन् । २०११ सालतिरको निम्न वर्गीय जीवनको यथार्थलाइ नाटकमा प्रस्तुत गरिएको छ । नेपाली गरिब किसान र मजदुरको जीवनमा आधारित यो नाटक सामाजिक यथार्थवादी नाटक हो ।

काठमाडौं उपत्यकाका नेवारी समाजको यथार्थ प्रतिविम्बन नाटकले गरेको छ । ‘मेचीदेखि महाकालीसम्मका निम्न वर्गीय नेपाली किसान परिवारले भोग्नुपरेका यथार्थलाई प्रतिनिधिमूलक रूपमा देखाइएको छ,’ निर्देशक परिवर्तन भन्छन्, ‘तत्कालीन र समकालीन नेपाली समाजमा श्रमजीवी निम्न वर्ग र उच्च वर्गबीचको द्वन्द्वलाई प्रतिनिधिमूलक तरिकाले नाटकमा प्रस्तुत गरिएको छ ।’

गरिबी, बाध्यता र विवशताको परिवेशमा निम्न वर्गीय जीवनका जटिलता र संघर्ष नाटकमा देखाइएको छ । प्रजातन्त्र प्राप्तिपछि विस्तारै मौलाउँदै गएको प्रगतिशील सोचको परिवेश, सांस्कृतिक सम्मिश्रण, समावेशी र समानताका लागि आवश्यक परेको तथ्य, रुढिवादी र अन्धविश्वासले नेपाली समाजलाई नछाडेको वास्तविकता नाटकभित्र अनुकूल घटनाक्रम र स्वाभाविक पात्रको परिवेशबाट व्यक्त गरिएको छ । नाटकले नेपाली समाजमा जरा गाडेर बसेको अन्धविश्वास, कुसंस्कार र तिनले निम्न वर्गीय समुदायमा पारेको असर उतारेको छ । अनावश्यक तडकभडकलाई अस्वीकार गरी जीवनोपयोगी क्रियाकलाप र विचारलाई आत्मसात गर्नुपर्ने प्रगतिवादी मान्यता नाटकले प्रस्तुत गरेको छ ।

नाटकलाई परिपक्व बनाउन कलाकारले मिहिनेत गरेका छन् । झन्डै डेढ घण्टा लामो नाटकले दर्शकलाई घरी हसाउँछ, घरी रुवाउँछ । कतै कतै गम्भीर बनाउँछ । नाटकमा जनक पराजुली, प्रमिला तुलाचन, नवराज गिरी, सन्तोष पुन, सुविना श्रेष्ठ, सोनिया खत्री, सुदीप बाँस्तोला, अञ्जु दाहाल, सन्दिप ठाकुर, विष्णु तिमिल्सिना, सुमन तिमिल्सिना, ईश्वरी राना, आसिका केसी, नीतिशा बस्ताकोटीको अभिनय छ ।

नाटक भदौ १४ सम्म मञ्चन हुने छ । यसअघि राष्ट्रिय नाचघर र विराटनगरको आरोहण गुरुकुलले समेत ‘एक चिहान’ उपन्यासलाई नाटकमा उतारिसकेका छन् ।

प्रकाशित : भाद्र ४, २०७६ ०८:५०
पूरा पढ्नुहोस्
प्रतिक्रिया
पठाउनुहोस्