परिणीतिको खराब डेढ वर्ष 

कान्तिपुर संवाददाता

काठमाडौँ — फिल्म ‘लेडिज भर्सेस रिक्की वहल’ बाट सन् २०११ मा अभिनेत्रीका रूपमा डेब्यु गरेकी परिणीति चोपडाले सुरुवातमै सफलता चाखिन् । त्यसपछि उनले ‘ईशकजादे’ र ‘शुद्ध देशी रोमान्स’ बाट सफलताको हृयाट्रिक नै मारिन् । तर २०१४ का आखिरी केही महिनादेखि उनले असफलता अनुभव गर्न पाइन् । 

सन् २०१४ मा आएका ‘दावत–ए–ईश्क’ र ‘किल दिल’ दुवै फिल्मले परिणीतिलाई असफलता मात्रै दिलाए । हैदरावादको मध्यम वर्गीय परिवारकी एक सेल्सगर्लको भूमिका निर्वाह गरेकी परिणीतिलाई फिल्ममा आदित्यरोय कपुर र अनुपम खेरले साथ दिएका थिए । समीक्षामा त चोपडाले तारिफ नै बटुलिन् तर बक्सअफिसले पैसा भने बटुल्न सकेन । अझ रनवीर सिंह र गोविन्दासँगै खेलेको क्राइम फिल्म ‘किल दिल’ ले त न समीक्षात्मक न त बक्सअफिसबाट नै खुसी दिन सक्यो ।

परिणीतिले जसरी ब्याक टु ब्याक सफलता चाखिन्, त्यसैगरी असफलता पनि । दुई फिल्मको असफलताले उनले आफूलाई बाहिरी दुनियाँबाट सम्बन्धविच्छेद नै गराइन् । यतिबेला अभिनेत्रीले विगतका आफ्ना काला दिनको स्मरण गरेकी छन् । ‘त्यो मेरो जीवनको अति खराब समय थियो ।

सायद अन्तिम पनि त्यही होस्,’ अभिनेत्री चोपडाले भनेकी छन्, ‘मलाई फिल्म असफल हुँदा पहिलो पटक आफू अस्वीकृत भएको महसुस भयो । त्यो बेला मलाई परिवारको खुब ठूलो आवश्यकता थियो ।’ यतिबेला ‘जाबरिया जोडी’ को प्रमोसनमा व्यस्त अभिनेत्रीले आफ्ना लागि डेढ वर्ष अति नै दुःखदायी रहेको स्मरण गर्दै भन्छिन्, ‘त्यो डेढ वर्षमा मेरा दुई फिल्मले कुनै चमत्कार गर्न सकेनन् । घर किनेर त्यसमा ठूलो लगानी गरेकै बेलामा जीवनकै ठूलो हर्टब्रेक भयो ।

दुई सातामा एकपटक मात्रै घरका मान्छेसँग भेट्थें । म त त्यो समय विशुद्ध फिल्मी खालको डिप्रेस्ड गर्ल नै भएकी थिएँ ।’ उनले छ महिना मिडियासँग पनि कुरा नगरेको बताइन् । धन्न अभिनेत्री चोपडालाई डिप्रेसनको अवस्थाबाट बाहिर ल्याउने काम भाई सहेजले गरे । उनले भनिन्, ‘उसैले कालो संसारबाट बाहिर निकाल्यो । अनि त्यसमा सन्जनाले पनि सघाइन् ।’

प्रकाशित : श्रावण २१, २०७६ ०८:४४
प्रतिक्रिया
पठाउनुहोस्

निहारिकाका ‘४३ कथा’

कान्तिपुर संवाददाता

काठमाडौँ — आख्यानकार नीलम कार्की निहारिकाको कथाकृति ‘४३ कथा’ बजारमा आएको छ । नेपाल प्रज्ञा प्रतिष्ठानमा आयोजित एक समारोहमा आख्यानकारद्वय ध्रुवचन्द्र गौतम र माया ठकुरीले उनको कथाकृति लोर्कापण गरे ।

उपन्यास ‘योगमाया’ का लागि मदन पुरस्कार जितेकी स्रष्टा कार्कीले नयाँ–पुराना कथाहरू समेटेर कृति निकालेकी हुन् ।
यसअघि प्रकाशित ‘हवन’, ‘कागजमा दस्तखत’ र ‘बेली’ कथा संग्रहका कथासहित केही नयाँ थपेर कृति निकालिएको कार्कीले बताइन् ।

आख्यानकार गौतमले कार्कीको लेखन शैली र विषयको संयोजन लोभलाग्दो रहेको भन्दै प्रशंसा गरे । ‘बेली’ मा समेटिएका कथाहरूमाथि बोल्दै समालोचक ज्ञानु अधिकारीले बालबालिका र किशोरकिशोरीको मनोविज्ञान अभिव्यक्त हुने कथाहरूले सबैलाई आफ्नो पुरानो समयमा फर्काउने दाबी गरिन् ।

कथाकार ध्रुव सापकोटाले कार्कीले कथा लेखनमार्फत ‘पुराना सीमा भत्काएर नवीनता दिने प्रयास गरेको’ बताए । ‘कागजमा दस्तखत’ का कथामाथि भने सावित्री कक्षपतीले चर्चा गरेकी थिइन् ।

प्रकाशित : श्रावण २१, २०७६ ०८:४३
पूरा पढ्नुहोस्
प्रतिक्रिया
पठाउनुहोस्