मदनकृष्णलाई ‘सलाम’

कान्तिपुर संवाददाता

काठमाडौँ — हास्य अभिनयमा जस्तो छवि छ उनको, गायनमा पनि उस्तै । ‘खोलावारि खोलापारि पिपलु र बर...’ देखि ‘हे भगवान् मेरो खल्तीको घाउ...’ सम्मका दर्जनौं गीत चर्चित छन् ।

नेवारी गीत/संगीतमा समेत उल्लेख्य योगदान दिएका कलाकार मदनकृष्ण श्रेष्ठलाई शनिबार रेडियो कान्तिपुरले ‘सलाम ज्युँदो इतिहासलाई’ कार्यक्रममा प्रस्तुत गर्‍यो । अग्रज स्रष्टाको सम्मानमा चौध महिनादेखि हुँदै आएको कार्यक्रममा यसपटक मदनकृष्ण प्रस्तुत भएका हुन् ।

कार्यक्रममा अग्रजका सिर्जनालाई अग्रजकै अनुभव सुन्दै नयाँ पुस्ताका प्रतिभाले प्रत्यक्ष प्रस्तुत गर्दै आएका छन् । शनिबार मदनकृष्णका गायन सिर्जना प्रस्तुत गर्न शिव परियार, धर्मेन्द्र सेवाङ, किरण केसी, रोजी श्रेष्ठ, सरिता शाही, कपिल कसपालसँगै मदनकृष्णकै छोरा यमन र छोरी सराना श्रेष्ठ पनि पुल्चोकस्थित रेडियो कान्तिपुरको लाइभ स्टुडियोमा पुगेका थिए । उनीहरूले मदनकृष्णले विभिन्न कालखण्डमा गाएका १० गीत प्रस्तुत गरे ।

सांगीतिक प्रस्तुतिकै माझ मदनकृष्णले आफ्नो करिअरको सुरुवात, संगीत, अभिनय र कलाक्षेत्रको अनुभवसँगै आफ्नै जीवनको सुखदुःख साटेका थिए । रेडियो कान्तिपुरका स्टेसन म्यानेजर दिनेश डीसी, अभिनेता दीपकराज गिरी,रेडियोकर्मी रश्मिला प्रजापतिले विभिन्न चरणमा गरी चार घण्टा मदनकृष्णलाई स्टुडियोमा प्रस्तुत गरेका थिए ।

‘अग्रजहरूको योगदान र उनीहरूको मूल्यलाई नयाँ पुस्ताले भुल्नु हुन्न भन्ने मान्यतासहित यो अभियान सुरु गरेका हौं,’ कार्यक्रमका परिकल्पनाकारसमेत रहेका डीसीले भने, ‘अग्रजप्रतिको नयाँ पुस्ताको यो सम्मान हो ।’

प्रकाशित : श्रावण ६, २०७६ ०८:५४
प्रतिक्रिया
पठाउनुहोस्

प्रधानमन्त्रीसँग प्रितम र आयुष

कान्तिपुर संवाददाता

ललितपुर — भारतीय टेलिभिजन जी टीभीको रियालिटी शो ‘सारेगमा लिल च्याम्स २०१९’ को ग्रान्ड फिनालेमा तेस्रोभएका इटहरीका प्रितम आचार्य र चौथो बनेका सिन्धुपाल्चोक ठोकर्पाका आयुष केसीको व्यस्तता आइतबार लोभलाग्दो थियो ।

सारेगम लिल च्याम्प–२०१९ का तेस्रा प्रितम आचार्य र चौथो भएका आयुष केसीलाई बालुवाटारस्थित निवासमा भेट्दै प्रधानमन्त्री केपी ओली । 

ललितपुर झम्सीखेलमा एउटा सम्मान थाप्नेबित्तिकै उनीहरू प्रधानमन्त्री निवास बालुवाटारतिर सोझिए । त्यहाँ प्रधानमन्त्री केपी ओलीसँग आ–आफ्ना सफलताको कथा मात्रै सुनाएनन्, गीत पनि गाए । प्रधानमन्त्रीको बाल्यकाल पनि कोट्याउन भ्याए । छुट्टिने बेलामा प्रधानमन्त्रीको तर्फबाट छेवैको भाटभाटेनी सुपर मार्केट गए, किनमेल गरे ।

केही महिनाअघि मात्रै भारतमा प्रतिभा देखाएर फर्केका यी दुईले बालुवाटारमा भक्तराज आचार्यका ‘जहाँ छन् बुद्धका आँखा...’ लगायत केही गीतका अंश सुनाउँदै गर्दा प्रधानमन्त्रीले भने, ‘संगीतको चारैतिर प्रशंसा हुन्छ तर राजनीतिमा त्यसो हुन्न । आलोचना पनि खेप्नुपर्ने हुन्छ ।’ यसपछि आयुषले आफू भर्खर १३ वर्ष लाग्दै गरेको बताउँदै प्रधानमन्त्रीको १४ वर्षे जेलयात्रा सुन्न चाहेको बताए । प्रधानमन्त्रीले चाहिँ सानो छँदा धनी मान्छेहरूले हेपेको र भैंसीगोठालो गएको लगायत केही सम्झना सुनाए । प्रधानमन्त्री पत्नी राधिका शाक्य आफैले खाजा बनाएर खुवाइन् ।

कार्यक्रम संयोजन गरेका सञ्चारकर्मी एवं चलचित्रकर्मी दिनेश डीसीका अनुसार प्रधानमन्त्रीको तर्फबाट प्रितम र आयुषले भाटभटेनीमा सपिङ पनि गरे । उनीहरूले जुत्ता, पाइन्ट, ज्याकेटदेखि चस्मासम्म किने ।

आइतबारै सुरशाला म्युजिक एकेडेमीले यी दुईको सम्मान पनि गर्‍यो । गायक रामकृष्ण ढकाल, उद्यमी उपेन्द्र महतो, सुरशाला संस्थापक अमृत क्षत्रीलगायतले खादा, माला तथा प्रमाणपत्र हस्तान्तरण गरे । कार्यक्रममा आफूलाई सहयोग र समर्थन गर्ने सम्पूर्णमा आभार प्रकट गर्दै प्रितम र आयुष दुवैले सांगीतिक प्रस्तुतिसमेत दिए ।

दुवैले नेपाली र हिन्दी गरी चार गीत गाए । प्रितमले भक्तराज आचार्यका ‘जहाँ छन् बुद्धका आँखा...’ र हिन्दी गीत ‘सन्देशे आते हे...’ गाए भने आयुषले अमृत क्षत्रीको ‘म एउटा बालक...’ र हिन्दी फिल्म ‘जिरो’को ‘मेरे नाम तु...’ गाए । दुवैको स्वरको प्रशंसा गर्दै गायक ढकालले संगीतमा कसैको पोजिसनभन्दा पहिचान ठूलो हुने भएकाले दुवैलाई निरन्तरताको कामना गरे ।

प्रकाशित : श्रावण ६, २०७६ ०८:५४
पूरा पढ्नुहोस्
प्रतिक्रिया
पठाउनुहोस्