प्रतिष्ठा ‘पब्लिसिटी क्विन’

कान्तिपुर संवाददाता

लन्डन — प्रतिष्ठा ‘तृष’ राउत बेलायतको एउटा प्रतिष्ठित सौन्दर्य प्रतिस्पर्धा ‘मिस इंग्ल्यान्ड’ को फाइनल प्रवेश गरेकी छन् । बेलायत अल्डरसट निवासी २६ वर्षीया प्रतिष्ठा शुक्रबार लेस्टर टाइगर स्टेडियममा भएको सेमिफाइनलबाट अन्तिम प्रतिस्पर्धाका लागि ४० मध्ये छानिएकी हुन् । उनी फोटो हिट चरण पार गरेर सेमिफाइनल पुगेकी थिइन् । 

प्रतिस्पर्धामा भाग लिन करिब २० हजारले आवेदन दिएका थिए । सेमिफाइनलमा इको ड्रेस राउन्ड, लिटल ब्ल्याक ड्रेस राउन्ड र ब्युटी विथ पर्पोज गरी ३ राउन्ड भएको थियो । पब्लिक भोटले उनलाई ‘पब्लिसिटी क्विन’ उपाधि दिलाएको छ । ‘सबैको भोटले उपाधि जितेकामा ज्यादै प्रसन्न छु,’ उनले भनिन्, ‘ती सहयोगी र प्रायोजकप्रति म कृतज्ञ छु ।’

प्रतिष्ठाले यस खालका प्रतियोगिताले महिलाको आत्मविश्वास अभिवृद्धिसाथै समुदायमा एक रोल मोडल भूमिका, च्यारिटी एवं महिला सशक्तीकरणमा लाग्न उत्प्रेरित गर्ने बताइन् । प्रतिष्ठाले यही सिलसिलामा एक च्यारिटीका लागि १४ सय पाउन्डसमेत संकलन गरेकी छन् र उठ्ने क्रम जारी छ । हङकङमा जन्मिएकी प्रतिष्ठा ५ वर्षको उमेरदेखि बेलायत बस्छिन् । भूपू ब्रिटिस गोर्खा प्रकाश राउत र मीना राउतकी एक्ली छोरी उनले १६ वर्षमै मोडलिङ थालेकी थिइन् ।

युनिभर्सिटी अफ ब्राइटनबाट इन्टेरियर आर्किटेक्चरमा ब्याचलर उत्तीर्ण प्रतिष्ठा पेसाले प्लोर प्लान आर्किटेक्ट हुन् । उनले गत वर्ष बेलायतको चर्चित फार्नबोरो एयर शोको फलोर प्लान गरेकी थिइन् । छिट्टै रेजिडेन्सियल हाउजिङ आर्किटेक्ट फर्म खोल्ने र मोडलिङ पनि एकसाथ अगाडि बढाउने सोच उनको छ ।

मिस इंग्ल्यान्ड विजेताले टाइटिलसहित २५ हजार पाउन्ड पुरस्कार, मिस वर्ल्डमा सहभागिता र विभिन्न च्यारिटी कार्यमा आबद्ध हुन मौका पाउने आयोजकले जनाएका छन् । अन्तिम प्रतिस्पर्धा समरमा हुने बताइए पनि विस्तृत विवरण आउन बाँकी छ ।

प्रकाशित : जेष्ठ २०, २०७६ ०८:०२
प्रतिक्रिया
पठाउनुहोस्

बेलायत भ्रमणअगावै ट्रम्प विवादित 

प्रधानमन्त्री तथा सत्तारूढ दलको नेतामा बोरिस जोन्सन उत्तम रहेको दाबी गरे
नवीन पोखरेल

लन्डन — अमेरिकी राष्ट्रपति डोनाल्ड ट्रम्पले बेलायतको सत्तारूढ दल कन्जरभेटिभको नयाँ नेताका लागि पूर्वविदेशमन्त्री ‘बोरिस जोन्सन उत्तम विकल्प भएको’ बताएका छन् । 

बेलायती पूर्वविदेशमन्त्री बोरिस जोन्सन र अमेरिकी राष्ट्रपति डोनाल्ड ट्रम्प

प्रधानमन्त्री टेरेजा मेले आउँदो जुन ७ देखि लागू हुने गरी दलको नेता तथा प्रधानमन्त्री पदबाट राजीनामा घोषणा गरिसकेकी छन् । कन्जरभेटिभको नयाँ नेता नै देशको आगामी प्रधानमन्त्री हुनेछन् । त्यस अर्थमा ट्रम्पले बोरिसलाई नयाँ प्रधानमन्त्रीमा सिफारिस गरेका हुन् । कन्जरभेटिभले आगामी जुलाई अन्त्यसम्म नयाँ नेता चयन भइसक्ने जनाएको छ ।

सामान्यतया विदेशी नेताले अर्को देशको आन्तरिक राजनीतिबारे टिप्पणी गर्नु कूटनीतिक वृत्तमा राम्रो मानिँदैन तर बेलायत भ्रमणमा आउनुअघि एक बेलायती अखबारसँग कुरा गर्दै ट्रम्पले त्यस्तो बताएका हुन् । ‘द सन्’ सँग कुरा गर्दै ट्रम्पले भने, ‘मेरो विचारमा बोरिसले निकै राम्रो काम गर्नेछन् ।’ कन्जरभेटिभ दलका अन्य नेताले पनि आफ्नो समर्थन चाहेको ट्रम्पले दाबी गरे । उनले भने, ‘मैले चाहेँ भने जसलाई पनि समर्थन गर्न सक्छु ।’

यसैबीच, बकिङहम दरबारले राष्ट्रपति ट्रम्पको तीनदिने राजकीय भ्रमण तालिका सार्वजनिक गरेको छ । भ्रमणको पहिलो दिन सोमबार ट्रम्प र फस्ट लेडी मेलानियालाई बेलायती महारानी, राजकुमार चार्ल्स र उनकी धर्मपत्नी क्यामिलाले लन्डन बकिङगम राजदरबारमा औपचारिक स्वागत गर्ने कार्यक्रम छ । प्यालेस गार्डेनमा ‘सेरेमोनियल’ स्वागतपछि ट्रम्प दम्पतीले गार्ड अफ अनर अवलोकन गर्नेछन् ।

त्यसपछि रानी, उनका नाति राजकुमार हयारीले अतिथिहरूलाई चित्रकला प्रदर्शनी कक्ष लानुअघि दिवाभोज आयोजना गर्ने तय भएको छ । प्रदर्शनी कक्षमा अमेरिका र बेलायती राजदरबारबीचको ऐतिहासिक सम्बन्धबारे संकलित चित्र समावेश हुनेछन् । दिउँसो ट्रम्प, मेलानिया र डुक अफ योर्क एन्ड्रियु सहिदप्रति श्रद्धाञ्जली दिने तथा विश्व सम्पदा सूचीका धरोहर घुम्ने जनाइएको छ ।

भ्रमणको पहिलो दिन राजदरबारमा व्यस्त भए पनि दोस्रो दिन मंगलबार भने ट्रम्प दम्पती राजनीतिक भेटघाटमा व्यस्त रहनेछन् । त्यस दिन बेलायती प्रधानमन्त्री टेरेजा मेसँग ब्रेकफास्ट बैठकपछि सेन्ट जेम्स प्यालेसमा डुक अफ योर्कसँग बैठक तय भएको छ । ट्रम्पले अन्य बेलायती तथा अमेरिकी व्यापारीसँग समेत भेट्ने कार्यक्रम छ । दिउँसो ट्रम्प प्रधानमन्त्री मेसँग वार्ता र दिवाभोजका लागि सरकारी निवास डाऊनिङ स्ट्रिट जाने कार्यक्रम छ । त्यही त्रममा पत्रकार सम्मेलन पनि हुनेछ ।

भ्रमणको अन्तिम दिन ५ जुनमा महारानी एलिजाबेथ द्वितीय र युवराज चार्ल्ससँगै राष्ट्रपति ट्रम्प पोर्टसमथमा आयोजित ‘डि डे स्मृति समारोह’ मा भाग लिनेछन् । उता, ट्रम्पको राजकीय भ्रमणबारे विभिन्न राजनीतिक टीकाटिप्पणीसमेत भएको छ ।

बेलायतको प्रमुख प्रतिपक्षी दलका नेता जेरमी कोर्बिनले राष्ट्रपति ट्रम्पसँग हुने रात्रिभोज बहिष्कार गर्ने जनाएका छन् भने लन्डनका मेयर सादिक खानले उनलाई फासिस्टको संज्ञा दिँदै चर्को आलोचना गरेका छन् । बेलायती अखबार ‘द अब्जर्भर’ मा प्रकाशित लेखमा मेयर खानले ट्रम्पले अँगालेको नीति रंगभेद तथा सभ्य समाजका लागि अनुपयुक्त भएको खरो टिप्पणी गरेका छन् ।

प्रकाशित : जेष्ठ २०, २०७६ ०८:००
पूरा पढ्नुहोस्
प्रतिक्रिया
पठाउनुहोस्