विश्वविद्यालयमा 'लाइभ पेन्टिङ'

कान्तिपुर संवाददाता

काठमाडौँ — केही विद्यार्थी मुहार चित्र बनाउँदै थिए, केही माटाका भाडा बनाउँदै त केही नाचगानमा व्यस्त । विभिन्न खेल र कला प्रदर्शनी पनि सँगसँगै भइरहेको थियो ।

काठमाडौं विश्वविद्यालयले आयोजना गरेको ुमिट एन्ड ग्रिट’ मा लाइभ पेन्टिङ गर्दै चित्रकार किरण मानन्धर । तस्बिर : कान्तिपुर

त्यत्तिकैमा चित्रकार किरण मानन्धर काठमाडौं विश्वविद्यालयअन्तर्गत स्कुल अफ आर्ट, सेन्ट जेभियर कलेज र नेसनलकलेजले नेपाल प्रज्ञा प्रतिष्ठानमा शुक्रबार आयोजना गरेको 'मिट एन्ड गि्रट' मा देखिए ।

उनलाई विश्वविद्यालयले 'लाइभ पेन्टिङ' को लागि निम्त्याएको थियो । विद्यार्थी उनको लाइभ पेन्टिङ हेर्न उत्सुक थिए । उनले क्यानभासमा रङ पोत्न थाले । हेर्दाहेर्दै एउटा स्त्री आकृति बन्यो । 'म केही पनि होइन,' चित्र बनाउनुअघि मानन्धरले भनेका थिए, 'जब क्यानभासमा छुन्छु, छुट्टै खालको तरंग उत्पन्न हुन्छ, ऊर्जा निस्कन्छ ।'

काठमाडौं विश्वविद्यालय स्कुल अफ आर्टका विद्यार्थी सञ्जु थापा मगरले 'वरिष्ठ' चित्रकारको काम प्रत्यक्ष हेर्दा चित्रमा देखाउन चाहेको भावभंगीअनुसारको रंगको प्रयोग कसरी गर्ने भन्ने सिक्न सकिने बताइन् ।

कार्यक्रममा विभिन्न विषयमाथि निर्माण गरिएको वृत्तचित्र र छोटा चलचित्र पनि प्रदर्शन गरिएको थियो । शैलेश आरसीको लेखन र विकास पोखरेलको निदेर्शनमा रहेको 'एट कलर इन द रेन्बो' फिल्मले नेपालको शिक्षा प्रणालीले सिर्जनात्मक क्षमता मारिरहेको सन्देश दिन खोजेको थियो । वृत्तचित्र 'सेल्टर' ले सुकुम्वासी समस्यालाई उठाएको थियो ।

विद्यार्थीले मानविकी शिक्षाको विषयमा छलफल कार्यक्रम पनि सञ्चालन गरेका थिए । उनीहरूले गीत गाए, नाचे, कविता वाचन गरे, नाटक देखाए, शैक्षिक प्रदर्शनी गरे । विद्यार्थी आफैंले तयार पारेका खाना र पेय पदार्थका विभिन्न परिकारको पनि स्टल राखिएको थियो । यस्ता कार्यक्रमले विद्यार्थीको कला र क्षमता अभिवृद्धि गर्न सहयोग पुग्ने विश्वविद्यालयले विश्वास व्यक्त गरेको छ ।

प्रकाशित : जेष्ठ ४, २०७६ ०८:४०
प्रतिक्रिया
पठाउनुहोस्

पुस्तकमा बेलायती वित्तीय परिवेश 

कान्तिपुर संवाददाता

काठमाडौँ — लामो समयदेखि बेलायतको अर्थतन्त्रसँग निकट रहेका कार्य गरेका अर्थ व्यवस्थापनविद् विकलचन्द्र आचार्यको नयाँ पुस्तक 'बेलायतको वित्तीय अबलोकन' छिट्टै पाठकसामु आउने भएको छ । 

पुस्तकमा बेलायतको वित्तीय सामर्थ, बैंकिङ इतिहास, बैंकको संरचना तथा कार्यविधि, पाउन्ड स्टर्लिङको अवस्था, सम्पत्ति शुद्धीकरण, बिमा, ब्रेक्जिट, औद्योगिक क्रान्तिको शिक्षा, लन्डन स्टक मार्केट लगायत वित्तीय क्षेत्रको विविध विषय समावेश छ ।

बेलायतको वित्तीय परिवेशबाट नेपालले नीतिगत रूपमा सिक्न सक्ने कुराहरू धेरै भएको र यसको लागि आफ्ना सुझावहरू पनि किताबमा लेखिएको कुरा लेखक आचार्यले बताए । विश्वको एक शक्तिशाली वित्तीय केन्द्र रहेको बेलायतको भित्री गहिराइमा पुगेर लेखिएको यस किताबले बेलायतको वास्तविक वित्तीय परिवेश बुझ्न सरल हुने पनि आचार्य बताउँछन् । बेलायतको वित्तीय क्षेत्रले संसारभरि प्रभाव पार्ने गरेकोले राजधानी लन्डन आर्थिक केन्द्र रहिआएको छ ।

बेलायतमा मात्रै दिनमा औसत करिब २.७३ टि्रलियन (२०७३ अर्ब) डलर बराबरको विदेशी विनिमयको कारोबार हुने गर्छ, जुन कुल विश्व कारोबारको ४०.९ प्रतिशत हो । अमेरिकाको डाओ जोन्स र नस्डाकपछि लन्डन स्टक मार्केट आउँछ ।

बेलायतको प्रतिष्ठित प्राइभेट स्कुल आर्डिंङलाए कलेजमा छात्रवृत्ति पाएर विसं २०५० मा बेलायत आएका हुन् । बेलायतमा उच्च शिक्षा अध्ययन गरेका आचार्यले शिक्षा, साहित्य तथा स्वास्थ्य क्षेत्रमा कलम चलाउँदै आएका छन् । उनका चार अरु पुस्तकहरू प्रकाशित भइसकेका छन् । गोरखा बजारमा ४५ वर्षअघि जन्मेका आचार्य सानै उमेरमा बेलायत आए पनि लेखनमा भने क्रियाशील छन् ।

प्रकाशित : जेष्ठ ४, २०७६ ०८:३८
पूरा पढ्नुहोस्
प्रतिक्रिया
पठाउनुहोस्