बदलिँदै बलिउड

खास गरी स्टेरियोटाइपका मसलेदार फिल्मले बलिउड बदनाम हुँदै आइरहेको छ । बलिउड फिल्मले मुस्किलले विश्वका ठूला फिल्म अवार्ड जितेको छ । फिल्म हेर्ने संस्कृति भए पनि राम्रा फिल्म छानेर हेर्न नसक्ने आरोप बलिउड दर्शकलाई पनि लाग्ने गर्छ ।

तर अब यो आरोपलाई बिस्तारै झुटो साबित गर्ने दिशातर्फ बलिउड उन्मुख देखिन थालेको छ । एकदुई वर्षयता यस्तै छनक देखिइरहेको छ ।

वास्तविकता र समाजसँग नजिक रहेरभन्दा स्वप्नील संसार सिर्जेर रुवाइ र मारमुङग्रीमा बढी जोड दिनु बलिउड फिल्मको विशेषता हो । वर्चस्व यस्तै फिल्मको हुने गर्छ भने केहीअघिसम्म पनि यस्तै फिल्मले दर्शक तानिरहेका हुन्थे । तर पछिल्लो समय बलिउडका हस्ती मानिने कलाकारका फिल्म पनि धराशायी बनेका छन् र कम आँकिएका विषयप्रधान फिल्मले पैसा सोहोर्न थालेका छन् ।

यस्ता फिल्मले बलिउडका स्टेरियोटाइप फिल्मलाई पछिल्ला दिन ठूलै चुनौती दिइरहेका छन् ।

बलिउडमा यथार्थपरक विषयलाई आत्मसात् गरी बनेका केही फिल्मले ठूलो पर्दामा हस्तक्षेप बढाएका छन् । यस्ता फिल्मले दर्शक मात्रै तानेका छैनन्, समाजमा बहस पनि तताएका छन् ।

यसअघि हेलाझैँ गरिएका विषयले प्रमुखता पाइरहेका छन् । अक्षय कुमारको ‘प्याडम्यान,’ ‘अलिगढ’ र ‘विक्की डोनर’, घरभित्रै हुने महिला हिंसाको सवालमा बनेको ‘हाइवे’ यसका गतिला उदाहरण हुन् । ‘बधाई हो’, ‘अन्धाधून’, ‘स्त्री’, ‘उरी’, ‘न्युटन’ जस्ता मध्यमस्तरका कलाकारका फिल्मको उच्च स्तरको कमाइ पनि बलिउडको स्टेरियोटाइपका लागि चुनौती बन्दै गएको छ ।

यिनैको पंक्तिमा उभिन सक्ने सम्भावना देखाएको अर्को फिल्म ‘एक लडकी को देखा तो ऐसा लगा’ यही शुक्रबारदेखि प्रदर्शनमा आउँदै छ । राजकुमार रावदेखि सोनम कपुर, अनिल कपुरसम्मको अभिनय रहेको फिल्मले महिला समलिंगी सम्बन्धलाई दर्शकमाझ पस्किने जमर्को गरेको छ ।

रिलिजको पूर्वसन्ध्यामा मंगलबार सार्वजनिक गरिएको उक्त फिल्मको दोस्रो ट्रेलरले बलिउडको स्टेरियोटाइपलाई चुनौती दिने बलियो सम्भावना देखाएको छ । अनिल–सोनम बाबुछोरी पहिलो पटक एउटै फ्रेममा देखिँदै छन्, बाबुछोरी नै बनेर । वास्तविकतामा गर्व गर्न लायक छोरी रहेकी सोनम फिल्ममा भने उनको अन्तरसम्बन्धका कारण परम्परागत सोचका बाबुका लागि बोझिल बनेकी छन् ।

‘मैले आजसम्म कुनै पनि फिल्ममा विश्वसनीयता र आदर्शवाद देखेको थिइनँ,’ सोनमले ‘एक लडकी को देखा तो ऐसा लगा’ मा त्यसको छनक पाएको उल्लेख गर्दै भनेकी छन्, ‘मलाई यो फिल्म बुबा र मबाहेक कसैले गथ्र्यो जस्तो पनि लाग्दैन । निर्देशकले पनि उक्त भूमिकाका लागि सुरुमै हामी बाबुछोरीलाई छानेकामा खुसी छु ।’