२६.१२°C काठमाडौं
काठमाडौंमा वायुको गुणस्तर: १५४

दस दिन बीस नाटक राष्ट्रिय बालनाटक महोत्सव 

काठमाडौँ — नेपाली रंगमञ्चमा बाल सहभागिता पछिल्लो समय लोभलाग्दो बन्दै गइरहेको छ । राजधानीको कमल पोखरीस्थित रूसी सांस्कृतिक केन्द्रमा जारी बाल नाटक महोत्सवको माहोलले पनि यसलाई पुष्टि गर्छ । महोत्सवको यो दसौं संस्करणमा दिनहुँ दुई नाटक मञ्चन भइरहेका छन् । 

दस दिन बीस नाटक राष्ट्रिय बालनाटक महोत्सव 

रूसी सांस्कृतिक केन्द्रसितको सहकार्यमा शैली थिएटर र इसान नेपालले गरेको महोत्सवमा अहिलेसम्म एक दर्जन नाटक मञ्चन भइसकेका छन् । माघ ८ गतेदेखि सुरु भएको दसदिने महोत्सवका लागि २० वटा नाटक छनोटमा परेका थिए । महोत्सवमा बालबालिकाको रुचि र अध्ययन, असल अभिभावकतत्त्व, बालबालिकामा हुने हिंसा, गरिबीको प्रभाव, बालश्रम, छाउ प्रथासँगै अशिक्षा, यौन दुव्र्यवहार लगायतका विषयवस्तुबारे चेतनामूलक र मनोरञ्जनमूलक नाटकहरू छानिएका आयोजक शैली थिएटरका अध्यक्ष नवराज बुढाथोकीले बताए । नाटक उत्पादन र प्रस्तुतिमा विभिन्न विद्यालयहरूको सहभागिता छ ।


बुढाथोकीका अनुसार अमर मावि, लमजुङको ‘लैंगिक हिंसा’, विद्यासागर स्कुल, काभ्रेको ‘अँध्यारो मन’, माउन्ट सेब स्कुल काठमाडौंको ‘भान्का’, क्रिएटिभ एकेडेमी कीर्तिपुरको ‘डम्बरी’, बालवाटिका स्कुल काठमाडौंको ‘आमा’, साम्तेन मेमोरियल स्कुल कपनको ‘पूर्णिमा सपना’, भक्तपुर निस्ट स्कुलको ‘मेनुका’, प्रज्ञा सदन स्कुल, काठमाडांैको ‘दोषी को हो ?’, सात कन्यामती मावि, सिन्धुपाल्चोकको ‘आशाको सपना’ लगायतका नाटकले महोत्सवमा भाग लिएका छन् ।


त्यस्तै, नेसनल पाइनियर स्कुल, चाबहिलका तर्फबाट ‘चित्कार’, होली एन्जल्स स्कुल आरुबारीको ‘ठूलो मान्छे’, एकता जेम्स स्कुल जोरपाटीको ‘परिवर्तित मन’, जेसिस इन्टरनेसनल स्कुल, सतुङ्गलको ‘गौलोचन’, एम्बेस्याडर एकेडेमी नारायणटारको ‘बालविवाह’, महेन्द्र आदर्श मावि, इमाडोलको ‘कुबुद्धिको फल’, बाघभैरव मावि, ललितपुरको ‘अशिक्षा र यसको चुनौती’, काठमाडौं विनायक शिक्षालय, सिनामंगलको ‘टाईको गाँठो’, रिडर्स इन्टरनेसनल मोडेल स्कुल गोकर्णेश्वरको ‘बलेको सपना’ र ब्राइट जोन इन्टरनेशनल स्कुल गोकर्णेश्वरकै ‘एउटा सपनाको अन्त्य’ पनि महोत्सवमा छनोटमा परेको छ ।


शैली थिएटरकै नाटक ‘माटोको फूल’ भने अप्रतियोगी रूपमा हरेक दिन मञ्चन भइरहेको छ । आयोजकका अनुसार प्रतियोगितात्मक महोत्सव भएकाले बालबालिका उत्साहित बनाउन पुरस्कारका विधा पनि छुटाएको छ । महोत्सव संयोजक सुवास सुवेदीका अनुसार बिहीबार समापन हुने महोत्सवमा ६ वटा पुरस्कारहरू दिइनेछ ।

प्रकाशित : माघ १६, २०७५ ०८:५३
प्रतिक्रिया
पठाउनुहोस्
जनताको राय

हदबन्दीमाथिको जग्गा सट्टापट्टा मात्र होइन, बिक्री नै गर्न पाइने विधेयक संघीय संसद्‌मा पुगेको छ । यस्तो विधेयकलाई अब के गर्नुपर्छ ?