चीनमा फैलियो कोरोना संक्रमण- विश्व - कान्तिपुर समाचार
कान्तिपुर वेबसाईट
AdvertisementAdvertisement

चीनमा फैलियो कोरोना संक्रमण

एजेन्सीहरू

बेइजिङ — कोरोना भाइरस नियन्त्रणका लागि जारी प्रतिबन्धहरू हटाइएको दुई सातामा चीनमा पुनः महामारी फैलिएको छ ।कोरोनाविरुद्ध ‘शून्य सहनशीलता नीति’ अख्तियार गर्दै आएको चीनले डिसेम्बर ८ देखि सावधानीका विकल्पसहित लचकता अपनाउन थालेको थियो ।

पश्चिमी चीनको उरुम्चीमा कडा प्रतिबन्ध जारी रहेका बेला एक अपार्टमेन्टमा फैलिएको आगलागीमा १० जनाको ज्यान गएपछि प्रदर्शन चर्केको थियो । भाइरससम्बन्धी कडा प्रतिबन्धका कारण उनीहरूको ज्यान गएको भन्दै स्थानीयले शून्य कोभिड नीतिको विरोधमा प्रदर्शन चर्काएका थिए । उरुम्चीबाट सुरु भएको प्रदर्शन बेइजिङ, सांघाई, नान्जिङ, गोङजाउ, गोङजाउ, चोङकिङलगायतका सहरमा फैलिएको थियो । विश्वका अधिकांश देशले कोरोना सँगसँगै बाँच्ने नीति अख्तियार गरेपनि चीनले प्रतिबन्धहरू नहटाएपछि प्रमुख सहरहरूमा विरोध प्रदर्शन चर्केको थियो । राष्ट्रपति सी चिनफिङको राजीनामा माग्दै प्रदर्शन चर्किएपछि चीन शून्य कोभिड नीतिबाट पछि हट्न बाध्य भएको थियो । करिब ३ वर्षदेखि कडा प्रतिबन्धहरू जारी गरेको चीनले लचिलो नीति लिएसँगै भाइरसको संक्रमण फैलिएको हो ।

तीन वर्षदेखि चीनले भाइरस परीक्षण र कडा लकडाउनमा जोड दिएको भए पनि त्यही रूपमा खोप लगाउने काम भने हुन सकेको छैन । खोप लगाउन सर्वसाधारणलाई अनिवार्य गरिएको छैन भने स्थानीयस्तरमा उत्पादित खोप लगाउनुपर्ने व्यवस्था गरिएको छ । तर विभिन्न अनुसन्धानले ती खोप अन्तर्राष्ट्रिय रूपमा उत्पादित अन्य खोपको तुलनामा कम प्रभावकारी भएको पुष्टि भइसकेको छ । जसका कारण करिब डेढ अर्ब मानिसको जीवनयापन कष्टकर बनिरहेको छ ।

तर पनि चीनले भाइरसको असरलाई सफलतापूर्वक निकै न्यून स्तरमा राख्न सफल भएको थियो । पछिल्लो दुई सातामा देखिएको नयाँ सब–भेरिएन्ट ‘बीएफ–७’ को तीव्र संक्रमणले भने चीन अफ्ट्यारोमा पर्ने देखिएको छ । विश्व स्वास्थ्य संगठन (डब्लूएचओ) ले पछिल्लो समय चीनका अस्पतालहरू संक्रमितले भरिन थालेका जनाएको छ । डब्लूएचओको आपत्कालीन विभागका प्रमुख माइकल र्‍यानले पछिल्लो समय चिनियाँ अस्पतालका सघन उपचार कक्ष (आईसीयू) भरिएका जस्तो देखिएको बताए । ‘चीनका आईसीयूमा निकै कम बिरामीहरू रहेका जनाइएको छ । तर आईसीयूहरू भरिँदै गएका छन्,’ उनले भनेका छन् ।

संक्रमणदर बढे पनि मृत्युदर भने बढेको छैन । सोमबार र मंगलबार भाइरसको संक्रमणका कारण ५ जनाको मृत्यु भएको थियो । बुधबार र बिहीबार भने कोरोनाका कारण चीनमा कसैको मृत्यु नभएको जनाइएको छ ।

प्रकाशित : पुस ८, २०७९ ०७:१४
प्रतिक्रिया
पठाउनुहोस्

तालिवान फौजको आक्रमणमा ७ पाकिस्तानीको मृत्यु

जवाफी आक्रमणमा एक तालिवान मारिए
पाकिस्तानी प्रधानमन्त्रीद्वारा घटनाको भर्त्सना
एजेन्सीहरू

इस्लामाबाद — अफगानिस्तानको तालिवान फौजले पाकिस्तानको सीमावर्ती सहर चमनमा आइतबार गरेको आक्रमणमा ७ जना पाकिस्तानी सर्वसाधारणको मृत्यु भएको छ । अधिकारीहरूका अनुसार बम तथा गोली प्रहारबाट १७ जना घाइते भएका छन् ।

आक्रमणपछि अफगानिस्तान र पाकिस्तानबीचको तनाव बढेको छ । पाकिस्तानी सेनाले घटनाको भर्त्सना गर्दै अफगान भूमिमा ‘अन्धाधुन्ध गोली प्रहार गरेको’ बीबीसीले जनाएको छ । पाकिस्तानले गरेको जवाफी आक्रमणमा एक जना सैनिकको ज्यान गएको र केही घाइते भएका जनाइएको छ ।

बलुचिस्तान प्रान्तको चमन दुई देशबीचको प्रमुख व्यापारिक नाका हो । उक्त नाकाबाट दैनिक हजारौं मानिस ओहोरदोहर गर्ने गर्छन् । घटनापछि बन्द भएको आवागमन वार्तापछि खुला गरिएको अधिकारीहरूले बताएका छन् । प्रमुख सीमा नाकामा भएको घटनाको कारण भने थाहा भइसकेको छैन ।

तालिवानले अफगानिस्तानको शासन सत्ता सम्हालेयता सुरक्षा मुद्दाका कारण दुई देशबीच तनाव जारी रहेका बेला यो पछिल्लो घटना भएको हो । पाकिस्तानी प्रधानमन्त्री शेहवाज सरिफले अफगान कदम ‘निकै भर्त्सनायोग्य’ भएको बताएका छन् । अफगान सुरक्षा स्रोतका अनुसार पाकिस्तानी पक्षले अफगान फौजलाई सीमा क्षेत्रमा आफ्नो भूभागतर्फ चेकपोस्ट बनाउन रोक लगाएपछि घटना भएको समाचार संस्था रोयटर्सले जनाएको छ । समाचार संस्था एएफपीले अफगान अधिकारीलाई उद्धृत गर्दै अफगान फौजले चेकपोस्ट बनाउन सीमा क्षेत्रको जाली काट्ने प्रयास गरेपछि तनाव बढेको उल्लेख गरेको छ ।

पाकिस्तानले सन् २०१७ यता अफगानिस्तानसँगको सीमामा तारजाली गर्दै आएको छ । अफगानिस्तानको त्यतिबेलाको सरकार र गतवर्ष सरकारमा आएको तालिवानले उक्त कार्यको विरोध गरेका थिए ।

घटनापछि लिइएका तस्बिरहरूमा तोप र गोली प्रहारबाट मानिसहरू घाइते भएका र गाडी तथा सडक ध्वस्त भएको देखिएको छ । ‘अकस्मात् एउटा मोर्टार प्रहार भयो र त्यसले निकै ठूलो आगो फैलियो । त्यसपछिको अवस्थाबारे केही थाहा छैन,’ घटनास्थलमा बेहोस भएपछि अस्पताल पुर्‍याइएका एक घाइतेले अल जजिरासँग भनेका छन् ।

चमनस्थित सरकारी अस्पतालका चिकित्सक अख्तर मोहम्मदले २७ जना घाइतेलाई उपचारका लागि अस्पतालमा ल्याइएको जनाएका छन् । तीमध्ये ७ जनाको अवस्था गम्भीर रहेको उनको भनाइ छ । पाकिस्तानी सेनाको सञ्चार शाखाले तालिवानी फौजको आक्रमणमा ६ जनाको घटनास्थलमा मृत्यु भएको र पछि मृतकको संख्या ७ पुगेको जनाएको छ । अफगानिस्तानको कान्दाहारका गभर्नरले एक जना तालिवान सदस्यको ज्यान गएको र १० जना घाइते भएको पुष्टि गरेका बीबीसीले जनाएको छ ।

चमनमा यसअघि पनि दुवै पक्षबीच पटकपटक झडप भएका थिए । गत महिना एक बन्दुकधारीको आक्रमणमा पाकिस्तानी सैनिकको ज्यान गएपछि ८ दिनसम्म उक्त सीमा बन्द गरिएको थियो ।

पाकिस्तानी अधिकारीले तालिवान सरकारमा आएपछि अफगानिस्तानबाट आफ्नो भूभागमा विद्रोही आक्रमणमा वृद्धि भएको जनाएका छन् । त्यस्ता समूहलाई तालिवानले आश्रय दिँदै आएको पाकिस्तानको आरोप छ । दुई साताअघि दुई बन्दुकधारीले अफगानिस्तानको राजधानी काबुलस्थित पाकिस्तानी दूतावासमा आक्रमण गरेका थिए । पाकिस्तानले त्यसलाई आफ्ना ‘उच्च कूटनीतिज्ञको हत्या प्रयास’ भनेको थियो ।

काबुलको होटलमा आक्रमण

काबुल – अफगानिस्तानको राजधानी काबुलस्थित चिनियाँ व्यवसायीहरूका लागि लोकप्रिय एक होटलमा सोमबार बन्दुकधारीले आक्रमण गरेका छन् । काबुल लोंगन होटलमा आक्रमण गर्ने तीन बन्दुकधारी अफगानिस्तानको सुरक्षा फौजको जवाफी आक्रमणमा मारिएका छन् ।

तालिवान सरकारका प्रवक्ताका अनुसार काबुलको केन्द्रमा रहेको काबुल लोंगन होटलमा सोमबार दिउँसो अपरिचित बन्दुकधारीले कैयौं विस्फोट गराएका र गोली प्रहार गरेका थिए । आक्रमणमा कुनै पनि विदेशीको ज्यान नगएको तर ज्यान बचाउन होटलको बाल्कोनीबाट हामफाल्दा दुई जना घाइते भएका प्रवक्ता जबिहुल्लाह मुजाहिदले जनाए । घटनालगत्तै तालिवान सुरक्षा बलले घटनास्थललाई नियन्त्रणमा लिएको थियो । गतवर्ष अगस्टमा सत्तामा आएयता तालिवानले सुरक्षामा सुधार गरेको दाबी गरे पनि अफगानिस्तानमा बम विस्फोट तथा गोली प्रहारका घटनामा वृद्धि भएको जनाइएको छ । ती आक्रमणमा इस्लामिक स्टेट समूहको हात रहेको तालिवानको दाबी छ ।

प्रकाशित : मंसिर २७, २०७९ ०७:५४
पूरा पढ्नुहोस्
प्रतिक्रिया
पठाउनुहोस्
×