दक्षिण एसियाका जैविक–प्रविधि वैज्ञानिक काठमाडौंमा भेला हुँदै- विज्ञान र प्रविधि - कान्तिपुर समाचार
कान्तिपुर वेबसाईट
AdvertisementAdvertisement

दक्षिण एसियाका जैविक–प्रविधि वैज्ञानिक काठमाडौंमा भेला हुँदै

कान्तिपुर संवाददाता

काठमाडौँ — जैविक-प्रविधिको क्षेत्रमा अध्ययन अनुसन्धान गरिरहेका नेपालसहित दक्षिण एसियाका वैज्ञानिकहरु काठमाडौंमा भेला हुँदैछन् ।

जैविक प्रविधि समाज नेपाल(बीएसएन)ले आयोजना गर्न लागेको दोस्रो अन्तर्राष्ट्रिय जैविक प्रविधि सम्मेलनमा भाग लिनका लागि उनीहरु पुस २ देखि ४ गतेसम्म काठमाडौंमा भेला हुन लागेका हुन् ।

दिगो प्रविधि र वातावरणका लागि जैविक-प्रविधि भन्ने नाराका साथ सुरु हुन लागेको यो सम्मेलनमा दक्षिण एसियाका वैज्ञानिकहरुले आफूले गरेका अध्ययन अनुसन्धानबारे छलफल र बहस गर्दैछन् ।

दिगो विकासका १७ वटा लक्ष्य हासिल गर्नका लागि जैविक प्रविधिले खेल्ने भूमिकामा केन्द्रीत भएर विभिन्न चारवटा सत्रमा वैज्ञानिकहरु छलफल गर्ने बीएसनका अध्यक्ष नविन नारायण मुनकर्मीले बताए ।

ऊर्जा र वातावरण, जैविक प्रविधि र कृषि, स्वास्थ्य र फार्मासिउटिकल,नवप्रवर्तन र इन्टरप्रेनरसिपमा गरी चारवटा विषयमा केन्द्रीत भएर अनुसन्धानकर्ताहरुले प्रस्तुति दिनेछन् । सम्मेलनमा अनुसन्धनात्मक पेपर र पोस्टर गरेर ६० भन्दा बढी प्रस्तुति रहने उनले बताए ।

दक्षिणी एसियाली जैविक प्रविधिका विज्ञ तथा अनुसन्धानकर्ताहरुबीच नविनत्म ज्ञान र जानकारी, अनुसन्धान, प्रविधि हस्तान्तरणलगायतका क्षेत्रमा ज्ञान आदनप्रदानका लागि यो सम्मेलनले भूमिका खेल्ने मुनकर्मीको भनाइ छ ।

नेपालका ३ वटा विश्वविद्यालयमा मात्रै जैविक प्रविधिको विषयमा अध्यायपन हुने गरेको छ । काठमाडौं विश्वविद्यालय र पूर्वाञ्चल विश्वविद्यालयले स्नातक र त्रिभुवन विश्वविद्यालयले स्नातकोत्तर विषय अध्यायपन गराउँदै आएको बीएसनले जनाएको छ ।

वातावरण, माइक्रोबायोलोजी, वनस्पति विज्ञान, जीव विज्ञान,रसायनशास्त्र अध्ययन गरेका विद्यार्थीहरुले पनि जैविक प्रविधिमा स्नातकोत्तर गर्न पाउँछन् । अस्पताल, खाद्य उद्योग, फार्मासिउटिकलको क्षेत्रलगायत विभिन्न प्रयोगशाला तथा अनुसन्धनात्मक क्षेत्रमा बायोटेक्नोलोजीको प्रयोग हुँदै आएको छ ।

नेपालको जैविक प्रविधि क्षेत्रमा लागेका अनुसन्धानकर्ताहरुको साझा संस्था समेत रहेको बीएसएनले सन् २०१०देखि नेपाल जर्नल अफ बायाटेक्नोलोजी नियमित रुपमा प्रकाशन गर्दै आएको छ ।

प्रकाशित : मंसिर २०, २०७९ १९:३४
प्रतिक्रिया
पठाउनुहोस्

१८ वर्षपछि वीरगन्जमा ‘जोगले भेट भएपछि...’

शंंकर आचार्य

पर्सा — वीरगन्जको आदर्शनगर खेल मैदान सोमबार साँझ दर्शकले भरिभराउ थियो । मानवता प्रवद्र्धन तथा मानव सेवाका लागि मानव सेवा आश्रमद्वारा आयोजित ‘नेपथ्य लाइभ कन्सर्ट’ ले सबै उमेर समूहका दर्शकलाई आकर्षित गरेको थियो ।

कडा सुरक्षा व्यवस्थाबीच साँझ ४ बजे सुरु भएको कन्सर्टमा सूर्यास्तपछि गोधुली साँझमा ६ बजे मञ्चमा उदाए नेपथ्य ब्यान्डका गायक अमृत गुरुङ ।

अमृतको जोशिलो गायन र प्रस्तुतिले २ घण्टाको अवधिमा वीरगन्जेली दर्शकलाई नचाए । ‘भेडाको उनजस्तो....’ र ‘छेक्यो छेक्यो देउराली डाँडा हुस्सु र कुहिरोले....’ जस्ता आफ्ना कालजयी गीत गाएर माहोल बनाइसकेका अमृतले त्यसपछि दर्शकसँग संवाद थालेका थिए । दर्शक पनि उनीसँग संवाद गर्थे र उनको सबै गीतमा सँगै नाच्ने र गाउने गरे ।

त्यसपछि अमृतले ‘आजभोलि के भयो..’, ‘चरी मर्‍यो सिसैको गोलीले...’, ‘जोमसोमै बजारमा ...’ जस्ता चर्चित गीत सुनाए । दर्शकलाई देश दर्शन गर्न र राष्ट्रलाई माया गर्न पटक–पटक आग्रह गरेका अमृतले यसबीच सोमबार नै पुण्यतिथि परेको स्वरसम्राट नारायण गोपाललाई मञ्चबाटै सम्झन भ्याए ।

‘शीरफूल सिरैमा..’ ‘नैनताल..’, ‘साँइली मोरीलाई’ आदि गीत गाएर दर्शक झुमाएका अमृतले त्यसपछि ‘जीवन हो घाम छाँया...’ गाउँदा दर्शक उनलाई साथ दिँदै थिए । ‘गाउँ गाउँबाट उठ बस्ती बस्तीबाट उठ...’ गाएर उनले दर्शकको मनमा जोश भरेका थिए । ‘जोगले हुन्छ भेट...’ गाएपछि अमृतले वीरगन्जेली दर्शकसँग १८ वर्षपछि भेट भएको बताए ।

मै नाचे छमछम...’ गाएपछि अमृतले अन्त्यतिर दर्शकबाट बहुप्रतिक्षित गीत ‘रेशम...’ सुनाए । ‘तालको पानी माछीले खानी....’ गाएपछि अमृतले अन्त्यमा ‘रातो र चन्द्र सूर्य जंगी निशान हाम्रो....’ गाउँदा युवा दर्शक जोसिए ।

प्रकाशित : मंसिर २०, २०७९ १९:३४
पूरा पढ्नुहोस्
प्रतिक्रिया
पठाउनुहोस्
×