बास्केटबलमा नेपाल विजयी

असार १, २०८०कान्तिपुर संवाददाता

काठमाडौँ — नेपालले माल्दिभ्समा भइरहेको फाइभ नेसन्स बास्केटबल च्याम्पियनसिपमा पहिलो विजय हात पारेको छ । नेपालले बिहीबारको रोमाञ्चकपूर्ण खेलमा पाकिस्तानलाई ६६–६२ को स्कोरमा पराजित गर्‍यो ।

नेपाल पहिलो क्वाटरमा पाकिस्तानसँग ११–१५ ले पछाडि परेको थियो । दोस्रो क्वाटर पनि पाकिस्तानले अग्रता लिनेक्रममा नेपाललाई ३३–२८ ले पछाडि राख्यो । तेस्रो क्वाटरमा नेपालले अग्रता लिँदै पाकिस्तानलाई दबाबमा राख्न सुरु गरेको थियो । तेस्रो क्वाटरमा पुग्दा नेपाल ४९–४५ ले अगाडि रह्यो ।

चौथो तथा अन्तिम क्वाटरमा दुवै टोलीले समान १७ स्कोर गरेपछि नेपाल विजयी भएको हो । बुधबार नेपाल पहिलो खेलमा भुटानसँग ६६–५१ ले स्तब्ध भएको थियो । भुटानले उक्त खेलमा चारै क्वाटरमा नेपाललाई पछाडि राखेको थियो । नेपालले शनिबार बंगलादेशसँग खेल्नेछ ।