लिग उपाधि होड त्रिकोणात्मक
![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/mastercreativegif900x100-0952024115624.gif)
काठमाडौँ — यसपल्ट सहिद स्मारक लिगको सबैभन्दा प्रमुख विशेषता हो, शीर्षस्थानमा उक्लेयता प्रत्येक टिमले राम्रो प्रदर्शनका लागि संघर्ष गर्नु । चर्च ब्वाइजको कथा पनि यही रह्यो । लिगको २१ औं चरण समाप्त हुँदा चर्च ब्वाइज नै पहिलो स्थानमा रहने छ । तर, टोलीले पछिल्ला दुई खेलमा लगातार दुई बराबरी खेलेको छ ।
![](https://assets-cdn.ekantipur.com/uploads/source/ads/900x100-1172024092759.gif)
![लिग उपाधि होड त्रिकोणात्मक](https://assets-cdn-api.ekantipur.com/thumb.php?src=https://assets-cdn.ekantipur.com/uploads/source/news/kantipur/2023/third-party/-2652023074933-1000x0.jpg&w=1001&h=0)
![](https://assets-cdn.ekantipur.com/uploads/source/ads/comp-900x100-1672024010950.gif)
बिहीबार मनाङ मर्स्याङ्दीबीचको खेल गोलरहित रह्यो । यो खेल जितेको भए चर्च ब्वाइजले ५ अंक अन्तरले अगाडि रहन सक्थ्यो ।
बराबरीले यो अग्रता फेरि तीनै अंकमात्र रह्यो । यो नतिजाले के स्पष्ट पारेको छ भने अब लिग उपाधि होड त्रिकोणात्मक भएको छ । त्यसमध्ये शीर्षमा रहेको चर्च ब्वाइज त भइहाल्यो, त्यसपछि दुईपल्टको डिफेन्डिङ च्याम्पियन मछिन्द्र र जावलाखेल युथ रहेका छन् । मछिन्द्रको ३५ अंक छ भने जावलाखेल एक अंकले पछाडि छ । बिहीबार अर्को खेलमा चौथोमा रहेको सातदोबाटो फ्रेन्ड्सको हातबाट नमीठोसँग पराजित रह्यो । टोलीको उपाधि चुनौती समाप्त जस्तै भएको छ ।
सातदोबाटोसँग २९ अंक छ । लिगमा ५ चरणका खेल बाँकी छँदा चर्च ब्वाइजले संकटा, एपीएफ, जावलाखेल, थ्रीस्टार र खुमलटारको सामना गर्नेछ । मछिन्द्रले आर्मी, सातदोबाटो, पुलिस, हिमालयन शेर्पा र मनाङको चुनौती बेहोर्ने छ । जावलाखेलले भने एपीएफ, आर्मी, चर्च ब्वाइज, सातदोबाटो र थ्रीस्टारविरुद्ध खेल्नेछ । लिगको नतिजा प्रवृत्ति अहिले जस्तै रहने हो भने उपाधि होड अन्तिम दिनको खेलसम्म चल्न सक्नेछ ।
‘हामी उपाधि हकदार छौं’
चर्च ब्वाइजका प्रशिक्षक बालगोपाल महर्जन एक अर्को बराबरीमा निराश रहे । तर, उनको दाबी थियो, ‘हामी उपाधिका लागि हकदार नै छौं र अन्त्यसम्म लिग जित्नका लागि प्रयासरत रहने छौं । मैले सुरुदेखि भन्दै गरे जस्तै चर्च ब्वाइजको आक्रमण अलि कमजोर छ र यसैले समस्या उत्पन्न गरिरहेको छ ।’ प्रशिक्षक महर्जनले फेरि एकपल्ट रेफ्रीको निर्णयबारे विरोध गरे । खेलका क्रममा प्रकाश नाथ र उनका सहायकको चर्च ब्वाइजको बेञ्चसँग दोहोरो तनाब जारी रह्यो ।
महर्जनले थपे, ‘रेफ्रीको निर्णयमा धेरै कमजोरी छन् र हामीले लगातार गुनासो गरिरहेका छौं । यसको पनि कारण भनेको त्यही हो, रेफ्रीले पनि लगातार खेलाइरहनुपरेको छ । यसले गर्दा उनीहरू थाकेका छन् । थकाइकै कारण रेफ्रीको निर्णयहरू कमजोर भइरहेका छन् ।’ मनाङका लागि यो बराबरी उत्तिकै नमीठो किन रह्यो भने टोलीको यो लगातार सातौं बराबरी हो । एक समय लगातार ६ खेल गुमाएको मनाङले त्यसलगत्तै एक खेल जितेको थियो । त्यसयता भने मनाङ जित निकाल्न संघर्षरत छ । टोलीले लगातार सात खेलबाट सातै अंकमात्र बटुल्न सकेको छ । ‘हामी जितको पूर्ण हकदार थियौं, तर ३ अंकबाट वञ्चित रह्यौं,’ मनाङका मुख्य प्रशिक्षक विष्णु गुरुङले भने ।
खेलमा मनाङकै वर्चस्व थियो । गोलको सबैभन्दा नजिक पनि मनाङ नै पुगेको थियो । दोस्रो हाफमा कोफी टिमोथीको प्रहार पोस्टमा लागेर फर्केको थियो र मनाङलाई भाग्यले साथ नदिएको नै देखियो ।
यससँगै मनाङ २५ अंकमै सीमित रह्यो । लिगले १५ औं चरण छुँदा मुख्य प्रशिक्षकमा गुरुङ आएका थिए । त्यसयता उनी पहिलो जितका लागि संघर्षरत छन् । उनले मनाङसँग दुई वर्षको अनुबन्ध गरेको छ । उनको नजर अर्को सिजनको लिगमा छ । उनले आफ्नो योजना सुनाए, ‘यसपल्ट टिम बनाउँदा केही समस्या भएको छ । अर्को सिजन यी सबै समस्या समाधान गर्नेछौं । क्लब व्यवस्थापनले राम्रो टिम बनाउने भनेको छ, अबको लिगमा हामी च्याम्पियन हुने टिम लिएर आउने छौं ।’
फ्रेन्ड्सको सानदार जित
रेलिगेसनबाट बच्न लगातार संघर्ष गरिरहेको फ्रेन्ड्सले बिहीबारको अर्को खेलमा सानदार जित निकालेको छ । यस क्रममा फ्रेन्ड्सको सिकार बनेको छ सातदोबाटो । सातदोबाटोमै भएको खेलमा फ्रेन्ड्सका लागि टोरिक जेब्रिनले दुई गोल गरे भने रफिक इमानु र प्रकाश बुढाथोकीको नाममा एक–एक गोल रह्यो । आफ्ना प्रमुख खेलाडी घाइते रहेको हुनाले सातदोबाटो समस्यामा छ । टोलीको यो लगातार दोस्रो हार हो । यो जितपछि फ्रेन्ड्सको २४ अंक भएको छ । टोली १२ औं स्थानमा उक्लेको छ ।
फ्रेन्ड्सले चार चरणपछि रेलिगेसन क्षेत्र छाडेको छ । संकटा भने पहिलो पटक रेलिगेसन क्षेत्रमा झरेको छ । संकटाको २३ अंक छ । टोलीमाथि चर्को दबाब सिर्जना भएको छ । खुमलटार अन्तिम स्थानमा छ । टोलीको खातामा २१ अंक छ । मनाङ मर्स्याङदीसम्म पनि रेलिगेसन तनावमा रहेको छ । मनाङ ११ औं स्थानमा छ । टोलीको पछाडि तीन टिममात्रै छन् । मनाङभन्दा अगाडि पुलिस छ । पुलिसको पनि समान २५ अंक छ ।
आजका खेल
पुलिसविरुद्ध खुमलटार
हिमालयनविरुद्ध थ्रीस्टार
![](https://assets-cdn.ekantipur.com/uploads/source/ads/900-x-100-0172024023126.gif)