चार क्रिकेटर सम्मानित
गण्डकी — राष्ट्रिय क्रिकेट टोलीका सदस्य करण केसीसहित यू–१९ का तीन खेलाडीलाई मंगलबार पोखरामा सम्मान गरिएको छ । नेपाल भूतपूर्व खेलाडी मञ्च र पोखरा क्रिकेट एकेडेमीले करणसहित सुवास भण्डारी, अर्जुन कुमाल र दीपकराज डुम्रेलाई सम्मान गरेको हो ।
करणलाई मञ्चले २० हजार रुपैयाँसहित सम्मान गर्यो भने यू–१९ का खेलाडीलाई जनही ५ हजार प्रदान गरिएको छ । एकेडेमीले चारै खेलाडीलाई जनही ५ हजार प्रदान गरेको थियो ।
आईसीसी विश्वकप लिग २ का खेलमा करणले कुल ५० विकेट लिँदै सानदार प्रदर्शन गरेका थिए । सन् २०२४ मा श्रीलंकामा हुने विश्वकपमा छनोट भएका यू–१९ का तीन खेलाडीले उत्कृष्ट प्रदर्शन गरेका थिए ।
उनीहरूलाई मञ्चका कार्यबाहक अध्यक्ष दिलबहादुर गुरुङ, निवर्तमान अध्यक्ष तेज गुरुङ, संस्थापक अध्यक्ष खड्गबहादुर रानाभाट, क्रिकेट एकेडेमीका अध्यक्ष बबिन कुँवर, उपाध्यक्ष सन्तोष श्रेष्ठलगायतले नगद र सम्मानपत्र प्रदान गरे ।
