राष्ट्रिय क्रिकेटका कप्तान पौडेल गृह नगरमा सम्मानित
नवलपरासी — आईसीसी विश्वकप लिग–२ प्रतियोगितामा सानदार नतिजा निकाल्दै विश्वकप छनोटमा प्रवेश गराउन सफल राष्ट्रिय क्रिकेट टोलीका कप्तान रोहितकुमार पौडेललाई बर्दघाट नगरपालिकाले सम्मान गरेको छ ।
नवलपरासी (बर्दघाट–सुस्ता पश्चिम) बर्दघाट–१४ बुद्धबस्तीका स्थायी बासिन्दा कप्तान रोहितकुमार पौडेललाई बर्दघाट नगरपालिकाले मंगलबार सम्मान गरेको हो।
पौडेललाई गृहजिल्लामा स्वागतसहित एक कार्यक्रम आयोजना गरी हौसलास्वरूप ५१ हजार र प्रमाणपत्रसहित नगरपालिकाले सम्मान गरेको हो । लिग २ को खेलमा उच्च प्रदर्शन गर्दै विश्वकप क्वालिफायरमा छनोट भई सिङ्गो राष्ट्रसहित बर्दघाट नगरपालिकालाई गौरवान्वित बनाउन सफल भएकामा बर्दघाट–१४ निवासी पौडेललाईसम्मान गरिएको नगरपालिकाले जनाएको छ ।
कार्यक्रममा कप्तान पौडेलले आगामी दिनमा समेत उत्कृष्ट खेल प्रदर्शन गरी नेपाललाई अन्तर्राष्ट्रिय जगतमा चिनाउन अहोरात्र खटिने प्रतिक्रिया दिए । मातृभूमिमा आफूलाई गरिएको सम्मानले थप ऊर्जा मिलेको उनको भनाइ थियो ।
गृहजिल्ला आइपुगेका पौडेललाई पश्चिम नवलपरासीमा रहेका विभिन्न सङ्घ/संस्था र स्थानीय तहले स्वागतसहित सम्मान गरेका छन् । नगरपालिका, जेसिज, खेलकुद विकास समिति, लायन्स क्लबलगायत संस्थाले विभिन्न कार्यक्रम गरी सम्मान गरेका हुन् ।
