भारतमाथि अस्ट्रेलियाको रबाफिलो जित
विशाखापट्टनम — मिचेल स्टार्कले घातक बलिङ गर्दै भारतीय ब्याटिङ क्रमलाई धराशायी बनाएपछि अस्ट्रेलिया दोस्रो डे/नाइट वान डेमा आइतबार १० विकेटले विजयी भएको छ ।
फास्ट बलर स्टार्कले ५३ रन दिएर पाँच विकेट लिए र भारत १ सय १७ रन मात्र बनाएर अलआउट भएको थियो । त्यसपछि ट्रेभिड हेड र मिचेल मार्स दुवैले आक्रामक ब्याटिङ गर्दै आ–आफ्नो अर्धशतक पूरा गरे र अस्ट्रेलियाले एकोहोरो जित निकाल्न सफल रह्यो ।
मार्सले ३६ बलमा ६६ रन बनाए । उनले चार चौका र छ छक्का प्रहार गरे । हेडले भने ३० बलमा ५१ रन बनाए । उनले १० चौका प्रहार गरे । अस्ट्रेलियाले जितसम्म पुग्न ११ ओभर मात्र खर्चेको थियो । विपक्षी टिम जितसम्म पुग्दा बाँकी रहेको बलका आधारमा यो भारतको सबैभन्दा ठूलो अन्तरको हार हो । अस्ट्रेलिया जितसम्म पुग्दा ३९ ओभर अर्थात् २ सय ३४ बल बाँकी रहेको थियो । अस्ट्रेलियाको यो जितपछि तीन खेलको सिरिज पनि १–१ को बराबरीमा पुगेको छ ।
‘हामी चाँडै जितसम्म पुग्यौं, ३७ ओभर बाँकी छँदै । यस्तो खेल प्रायः हुने गर्दैन । मेरो विचारमा हाम्रा बलरले निकै राम्रो बलिङ गरे,’ अस्ट्रेलियाली कप्तान स्टिभ स्मिथले भने, ‘विशेषतः स्टार्कले निकै धारिलो बलिङ गरे । त्यसपछि हेड र मार्सले टिमलाई सजिलै जितसम्म पुर्याए ।’ बलिङलाई मदत गरिरहेको पिचमा टस जितेर भारतलाई पहिले ब्याटिङको निम्तो दिएको थियो र त्यसमा घरेलु टिमले निकै खराब सुरुआत लिएको थियो ।
शुभमन गिल स्टार्कको पहिलो ओभरमै शून्यमा आउट भए । त्यसपछि १३ रन बनाएका रोहित शर्माले विराट कोहलीसँग दोस्रो विकेटका लागि २९ रनको साझेदारी गरे । यो नै सबैभन्दा ठूलो साझेदारी रह्यो । त्यसपछि भारतले एकपछि अर्को विकेट शृंखलाबद्ध रूपमा गुमाएको थियो । खेलले ९.२ ओभर छुँदा भारतले ४९ रन बनाएर पाँच विकेट गुमाइसकेको थियो । कोहलीले सर्वाधिक ३१ रन बनाए । त्यसबाहेक रवीन्द्र जडेजाले १६ र अक्षर पटेलले २९ रन बनाए ।
खेलपछि रोहितले पनि निराशा पोखे र भने, ‘यो हार निकै निराशाजन रह्यो । यसमा कुनै शंका छैन । हामीले सक्दो पनि खेलेनौं । यो पिचले बलरलाई मदत गर्ने निश्चित थियो, तर पनि यो पिच पक्कै पनि १ सय १७ रनको थिएन । स्टार्कले निकै राम्रो बलिङ गरे । उनलाई कसरी सामना गर्ने हो, अबका खेलमा हामीले ध्यान दिनुपर्ने हुन्छ ।’ अब तेस्रो, निर्णायक तथा अन्तिम खेल बुधबार चेन्नाईमा हुनेछ । मुम्बईमा भएको पहिलो खेलमा भारत पाँच विकेटले विजयी भएको थियो ।
प्रकाशित : चैत्र ५, २०७९ १९:११
