शैलुङमा अल्ट्रा म्याराथन हुने
![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/mastercreativegif900x100-0952024115624.gif)
रामेछाप — पश्चिमी रामेछापको सुन्दर पर्यटकीय स्थान शैलुङमा पहिलो पटक अल्ट्रा म्याराथन प्रतियोगिता हुने भएको छ । प्रतियोगिताअन्तर्गत ५५ किलोमिटर लामो, २५ किलोमिटर र ५ किलोमिटर दुरीका बेग्लाबेग्लै प्रतिस्पर्धा गराइने छ ।
![](https://assets-cdn.ekantipur.com/uploads/source/ads/reward-900x100-pxl-2462024072414.gif)
![शैलुङमा अल्ट्रा म्याराथन हुने](https://assets-cdn-api.ekantipur.com/thumb.php?src=https://assets-cdn.ekantipur.com/uploads/source/news/kantipur/2023/third-party/sailung-myarathun-1822023042000-1000x0.jpg&w=1001&h=0)
![](https://assets-cdn.ekantipur.com/uploads/source/ads/sathi-deposit-900-100-1262024124333.gif)
शैलुङको पर्यटक प्रवर्द्धनका लागि राष्ट्रिय खेलकुद परिषद्को सहयोगमा जिल्ला खेलकुद विकास समितिले चैत ४ गते म्याराथन प्रतियोगिता गर्न लागेको हो । सुनापति गाउँपालिकाको हिलेदेवीस्थित साँदडाँडाबाट सुरु भएर खाँडादेवी मन्दिर, अग्लेश्वर, दोरम्बा, डाँडाकटेरी, राजभीर हुँदै शैलुङ पुग्ने ५५ किमि दुरीको अल्ट्रा म्याराथनमा प्रथम हुनेले ७५ हजार रुपैयाँ पुरस्कार पाउने छ । दोस्रोलाई ३५ हजार र तृतीयलाई ३० हजार रुपैयाँ पुरस्कार दिने आयोजना समितिले जनाएको छ ।
त्यसैगरी २५ किमि म्याराथन साँदडाँडाबाट दोरम्बा हुँदै शैलुङ पुग्ने र ५ किमि म्याराथुन शैलुङ परिसरमा आयोजना हुने जनाइएको छ । २५ किमि म्याराथन जित्नेले ४० हजार र ५ किमिमा प्रथम हुनेले १५ हजार रुपैयाँ पुरस्कार पाउनेछन् ।
रामेछापमा यति लामो दुरीको म्याराथन पहिलो पटक हुन लागेको हो । शैलुङ म्याराथनका क्रममा ऐतिहासिक खाँडादेवी मन्दिर, माओवादी द्वन्द्वकालमा इतिहास लेखाएको दोरम्बा र डाँडाकटेरी, बौद्ध धर्मावलम्बीहरुको ऐतिहासिक राजभीर गुम्बा र शैलुङ अवलोकन गराइने छ ।
दोलखासँग सीमा जोडिएको ३ हजार १ सय ४७ मिटर अग्लो शैलुङलगायत क्षेत्रलाई समेटेर नेपाल पर्यटन बोर्डले आदिवासी जनजाति पदमार्ग संचालनमा ल्याएको छ । प्रचार पुग्न नसक्दा काठमाडौंबाट नजिक भएर पनि शैलुङको पर्यटन प्रवर्द्धन हुन सकेको छैन । शैलुङबाट विभिन्न हिमश्रृंखला अवलोकन गर्न सकिन्छ । दोरम्बा शैलुङ गाउँपालिकाले शैलुङ क्षेत्र विकास गर्न भन्दै विभिन्न क्रियाकलाप गर्दै आएको छ ।
![](https://assets-cdn.ekantipur.com/uploads/source/ads/900-x-100-0172024023126.gif)