लेस्टरसँग आर्सनल पराजित- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

लेस्टरसँग आर्सनल पराजित

एएफपी

लन्डन — बेन्चबाट मैदान प्रवेश गर्दै जेमी भार्डीले गरेको निर्णायक गोलमा लेस्टरले आर्सनललाई उसकै घरेलु मैदानमा आइतबार १–० ले हराएको छ । लिगका पछिल्ला चार खेलमा आर्सनलको यो तेस्रो हार हो ।

चोटका कारण भार्डीले सुरुदेखि खेलेका थिएनन् । व्यवस्थापक ब्रेन्डन रोजर्सले उनलाई ३० मिनेटको खेल बाँकी छँदा मैदान पठाएका थिए । यस सिजनमा उनको यो छैटौं गोल हो ।

आर्सनलविरुद्ध अधिकांश समय निर्णायक साबित हुँदै आएका छन्, ३३ वर्षीय भार्डी । उनले आर्सनलविरुद्ध लिगका १२ खेलमा ११ गोल गरिसकेका छन् । यसअघि साउथह्याम्पटनले शीर्ष स्थानमा रहेको एभरटनलाई २–० ले हरायो ।

यससँगै एभरटनको लिगमा शतप्रतिशत सुरुआतमा पूर्णविराम लागेको छ । यस्तै अर्को खेलमा उल्भ्स र न्युकासलले १–१ को बराबरी खेलेका छन् ।

प्रकाशित : कार्तिक १०, २०७७ ०७:२२
प्रतिक्रिया
पठाउनुहोस्

सामाजिक दूरी कायम गरी दसैं मनाउन राष्ट्रपतिको आग्रह

रासस

काठमाडौँ — राष्ट्रपति विद्यादेवी भण्डारीले सामाजिक तथा भौतिक दूरी कायम गरी मौलिक चाडपर्वको संरक्षण एवं सम्वर्द्धन गर्न आह्वान गरेकी छन् ।

राष्ट्रपति भण्डारीले दसैं, २०७७ का अवसरमा स्वदेश तथा विदेशमा रहेका नेपालीमा सुख, शान्ति, समृद्धि, आरोग्य, दीर्घायु तथा प्रगतिका लागि शुभकामना व्यक्त गर्दै कोभिड –१९ को जोखिम विश्वभर बढेकाले नेपाल सरकारले लागू गरेको स्वास्थ्यसम्बन्धी सबै नियमको पालना गरेर दसैं मनाउन आग्रह गरेकी हुन् ।

'आफू र आफ्नो परिवारसमेत सचेत र सजग हुँदै सुरक्षाका उपायहरू अवलम्बन गर्नु सबैको दायित्व हुन आएको छ', शुभकामना सन्देशमा भनिएको छ, 'विजयादशमी, २०७७ ले हामी सबैमा नयाँ उत्साह, उमंग, जोश र जाँगर थप्ने विश्वासका साथ उत्तरोत्तर प्रगतिको कामना गर्दै मंगलमय शुभकामना व्यक्त गर्दछु ।'

यस पर्वले क्रोध, लोभ, अन्याय, अत्याचार, रोग, व्याधि तथा भोक र शोकले व्याप्त अनेक असत्यताको अन्त्य गर्दै सामाजिक एकता, आपसी सद्भाव र भ्रातृत्व अभिवृद्धिमा टेवा पुग्ने विश्वास राष्ट्रपतिले गरेकी छन् ।

विजयादशमीका दिन भगवतीले सत्य हासिल गरेका उपलक्ष्यमा नवदुर्गा भवानीको प्रसादस्वरूप मान्यजनबाट टीका, जमरा, फूलपाती र प्रसादसहित आशीर्वाद ग्रहण गरिन्छ । असत्यमाथि सत्य तथा अन्यायमाथि न्याय र अमानवीय तत्वमाथि मानवताको विजयको प्रतीकका रूपमा मनाइने यस पर्वमा घटस्थापनादेखि नवमीसम्म माता नवदुर्गाको पूजा गर्दै सप्तशती पाठ गरी विशेष अर्चना र आराधना गरिन्छ ।

प्रकाशित : कार्तिक १०, २०७७ ०७:१९
पूरा पढ्नुहोस्
प्रतिक्रिया
पठाउनुहोस्
×