इंग्लिस प्रिमियर लिग : वेस्ट ह्यामले म्यानचेस्टर सिटीलाई बराबरीमा रोक्यो- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

इंग्लिस प्रिमियर लिग : वेस्ट ह्यामले म्यानचेस्टर सिटीलाई बराबरीमा रोक्यो

एजेन्सी

लन्डन — इंग्लिस प्रिमियर लिगमा वेस्ट ह्याम युनाइटेडले म्यानचेस्टर सिटीलाई बराबरीमा रोक्दै एक अंक जोड्न सफल भएको छ ।

शनिबार लन्डन रंगशालामा भएको खेलमा वेस्ट ह्यामले सिटीलाई एक-एक गोलको बराबरीमा रोकेको हो । खेलको १८औं मिनेटमा मिचेल अन्टोनियोले गोल गर्दै वेस्ट ह्यामलाई अग्रता दिलाएका थिए ।

पहिलो हाफमा वेस्ट ह्याम एक-शून्यले अगाडि रहे पनि खेलको ५१औं मिनेटमा म्यानचेस्टर सिटीका लागि फिल फोडेनले बराबरी गोल फर्काए । त्यसपछि भने कुनै पनि टिमबाट गोल हुन सकेन ।

जितपछि वेस्ट ह्याम ८ अंकका साथ अंकतालिकाको १०औं स्थानमा उक्लेको छ । म्यानचेस्टर सिटी भने ८ अंकसहित नै ११औं स्थानमा रहेको छ । ५ खेलमा ४ जित र एक ड्र गरेको एभर्टन भने १३ अंकसहित जारी सिजनको अंकतालिकाको शीर्ष स्थानमा रहेको छ ।

प्रकाशित : कार्तिक ८, २०७७ १९:५७
प्रतिक्रिया
पठाउनुहोस्

आईपीएल : कोलकाताले दिल्लीलाई ५९ रनले हरायो

कान्तिपुर संवाददाता

काठमाडौँ — इन्डियन प्रिमियर लिगमा शनिबार कोलकाता नाइटराइडर्सले दिल्ली क्यापिटल्सलाई  ५९ रनले हराएको छ । 

यूएईको अबुधाबीमा भएको खेलमा कोलकाताले दिएको १९५ रनको लक्ष्य पछ्याएको दिल्लीले २० ओभरमा ९ विकेट गुमाउँदै मात्र १३५ रन बनाउन सफल भयो । दिल्लीका लागि कप्तान श्रेयस अय्यर बाहेक अरु ब्याट्सम्यानले खासै रन बनाउन सकेनन् । अय्यरले दिल्लीका लागि सर्वाधिक ४७ रन बनाए । ३८ बल सामना गरेका उनले ५ चौका प्रहार गरेका थिए ।

दिल्लीका ओपनिङ ब्याट्सम्यान अजिंक्य रहाणेलाई प्याट कमिन्सले पहिलो बलमै एलबीडबल्यूमार्फत आउट गराए । त्यस्तै दिल्लीका भरपर्दा ब्याट्सम्यान शिखर धवन पनि कमिन्सकै बलमा ६ रन बनाएको अवस्थामा बोल्ड भए । दिल्लीका लागि ऋषभ पन्तले २७, शिमरन हेटमेयरले १० तथा रविचन्द्रन आश्विनले १४ रन बनाए । दिल्लीका अरु ब्याट्सम्यानले दोहोरो अंकमा रन बनाउन सकेनन् ।

कोलकाताका लागि वरुण चक्रवर्तीले किफायती बलिङ गरे । उनले ४ ओभरमा २० रन मात्र खर्चिएर ५ विकेट लिए । त्यस्तै कोलकाताका लागि प्याट कमिन्सले ३ तथा लोकी फर्गुसनले एक विकेट लिए ।

त्यसअघि टस हारेर पहिले ब्याटिङको निम्तो पाएको कोलकाताले २० ओभरमा ६ विकेट गुमाउँदै १९४ रन बनाएको थियो । कोलकाताका लागि नितिश राणाले सर्वाधिक ८१ रन बनाए । उनले ५३ बल मा १ छक्का र १३ चौकामा उक्त योगफल तयार पारेका हुन् । त्यस्तै कोलकाताका लागि सुनिल नारायणले ६४ रन बनाए । ३२ बलको सामना गरेका उनले ४ छक्का र ६ चौका प्रहार गरेका थिए ।

दिल्लीका लागि एनरिच नोर्ट्जे, कागिसो रबाडा र मार्कस स्टोइनिसले समान २-२ विकेट लिए ।

शनिबारको खेलमा हार बेहोरे पनि रनरेटका आधारमा दिल्ली क्यापिटल्स अंकतालिकाको दोस्रो स्थानमै कायम रहेको छ । समान १४ अंक भए पनि रनरेटका आधारमा मुम्बई इन्डियन्स पहिलो र रोयल च्यालेन्जर्स बेंग्लोर तेस्रो स्थानमा रहेका छन् । जितपछि पनि कोलकाता भने १२ अंकसहित चौथो स्थानमा रहेको छ ।

प्रकाशित : कार्तिक ८, २०७७ १९:३२
पूरा पढ्नुहोस्
प्रतिक्रिया
पठाउनुहोस्
×