ललितको उपचारमा सहयोग गर्न सीप्यानको अपिल- खेलकुद - कान्तिपुर समाचार

ललितको उपचारमा सहयोग गर्न सीप्यानको अपिल

कान्तिपुर संवाददाता

काठमाडौँ — क्रिकेट खेलाडी संघ नेपाल (सीप्यान) ले सडक दुर्घटनाबाट गम्भीर घाइते भएर उपचाररत राष्ट्रिय क्रिकेटर ललितसिंह भण्डारीका लागि आर्थिक सहयोग आह्वान गरेको छ ।

संघले मंगलबार विज्ञप्ति जारी गरी खेलाडीलाई संकट परेको समयमा पहलकदमी लिएको जनाउँदै ललितको उपचारका लागि आवश्यक आर्थिक सहयोग गर्न इच्छुकलाई सेन्चुरी बैंकमा रहेको संघको खातामा रकम जम्मा गर्न अनुरोध गरेको हो ।

अध्यक्ष मनीषराज पाण्डे र महासचिव पारस खड्काद्वारा हस्ताक्षरित विज्ञप्तिमा कञ्चनपुरदेखि काठमाडौंसम्म ललितको उपचारमा सहयोग गर्ने सबैलाई धन्यवाद दिइएको छ ।

सेन्चुरी बैंकको खाता नम्बर ०० १०००२५२९ सीएमा ललितका लागि उपलब्ध हुने आर्थिक सहयोग पारदर्शी राखिने संघले जनाएको छ । आइतबार साँझ क्रिकेटर ललित सवार म२प ४७०५ नम्बरको मोटरसाइकललाई से१ख १३२४ नम्बरको ट्रकले ठक्कर दिएको थियो । कोरोना महामारीका कारण खेल गतिविधि ठप्प भएपछि ललित शुल्लाफाँटा नगरपालिका १० स्थित घरमै थिए ।

उनको स्थानीय क्लिनिकमा प्राथमिक उपचारपछि धनगढीस्थित निसर्ग अस्पताल ल्याइएको थियो । धनगढीबाट बाँकेको नेपालगन्ज मेडिकल कलेज ल्याइएकोमा त्यहाँ पनि उपचार सम्भव नभएपछि सोमबार अपरान्ह काठमाडौंको ग्रान्डी अस्पताल भर्ना गरिएको छ । चिकित्सकका अनुसार उनको एक हात र एक खुट्टाको एकभन्दा बढी स्थानमा भाँच्चिएको छ । कलेजो र फोक्सोमा पनि चोट देखिएको छ ।

प्रकाशित : भाद्र ३१, २०७७ ०८:२०
प्रतिक्रिया
पठाउनुहोस्

भारतद्वारा २ हजार भाइल रेमडेसिभिर सहयोग

कान्तिपुर संवाददाता

काठमाडौँ — भारतले नेपाललाई कोभिड–१९ का बिरामीको उपचारमा प्रयोग गरिने दुई हजार भाइल रेमडेसिभिर सहयोग गरेको छ ।

भारत सरकारका तर्फबाट राजदूत विनय मोहन क्वात्राले परराष्ट्रमन्त्री प्रदीप ज्ञवालीलाई मंगलबार रेमडेसिभिर हस्तान्तरण गरेका हुन् ।

महामारीले निम्त्याएको चुनौती सामना गर्न भारत सरकारले नेपाललाई गरिरहेको सहयोगअनुरूप उक्त औषधि हस्तान्तरण गरिएको भारतीय दूतावासले जनाएको छ ।

भारतले यसअघि वैशाख १० मा पारासिटामोल, हाइड्रोक्लोरोक्विनलगायत अत्यावश्यक औषधि, जेठ ४ मा कोभिड टेस्ट किट र साउन २५ मा आईसीयू भेन्टिलेटरलगायत स्वास्थ्य सामग्री सहयोग गरेको थियो ।

प्रकाशित : भाद्र ३१, २०७७ ०७:५१
पूरा पढ्नुहोस्
प्रतिक्रिया
पठाउनुहोस्
×