गणेश थापाद्वारा पत्रकारमाथि दुर्व्यवहार
काठमाडौँ — अखिल नेपाल फुटबल संघ (एन्फा) का पूर्वअध्यक्ष गणेश थापाले समाचारको विषयलाई लिएर पत्रकारमाथि दुर्व्यवहार गरेका छन् ।
उनीहरुले हाम्रो खेलकुद डटकमका सम्पादक प्रकाश तिमल्सिनालाई बिहीबार गालीगलौज र अभद्र व्यवहार गरेका हुन् । सामाचारका लागि फोनमा वार्ता गर्ने क्रममा गणेश थापाले दुर्व्यवहार गरेका थिए भने उनका छोरा अभिषेकले उक्त अनलाइनको थापाथलीस्थित कार्यालय परिसरमै पुगेर दुर्व्यवहार गरेका थिए । ‘घटनाको जति निन्दा गरेपनि कम नपुग्ने’ भन्दै नेपाल खेलकुद पत्रकार मञ्चले विज्ञप्ति जारी गर्दै शुक्रबार भर्त्सना गरेको छ ।
दुई दशक बढी एक्लौटी रुपमा एन्फा चलाएका गणेश थापालाई अन्तर्राष्ट्रिय फुटबल महासंघ (फिफा) ले भ्रष्टाचारको अभियोगमा सन् २०१५ मा दश वर्षको लागि प्रतिबन्धसँगै २० हजार स्वीस फ्रयांक जरिवाना गरेको थियो । स्वदेशमै पनि उनलाई एन्फाको ५८ करोड रुपैयाँ बढीमा आर्थिक अनियमितता गरेको आरोप लागेको थियो । उजुरीलाई पछि अख्तियार दुरुपयोग अनुसन्धान आयोगले तामेलीमा राख्ने निर्णय गरेको थियो । बुबा एन्फाको अध्यक्ष हुँदा बंगलादेश फुटबल महासंघलाई दिएको १५ लाख रुपैयाँ पेस्की फछ्र्यौटको लागि अभिषेकले बुझाएका थिए ।
याे पनि पढ्नुहाेस् :
