‘बढी मारमा खेल पत्रकारिता’

बाह्रखरीडटकमका प्रधान सम्पादक प्रतीक प्रधानले कोभिड–१९ ले सबैभन्दा बढी असर खेल पत्रकारितामा पारेको बताए । उनले भने, ‘अहिले खेलकुद गतिविधि हुन सक्ने अवस्था छैन । यस्तो अवस्थामा पत्रकारले आफूलाई जोगाइराख्न भर्चुअल खेलकुदका विषय, अनुसन्धानमूलक लेखरचना, विषयवस्तुको गहिराइमा पुगेर लेखन क्षमता वृद्धि गर्ने मौका दिएको छ ।’

नेपाल पत्रकार महासंघका पूर्वअध्यक्ष एवं नेपाल टेलिभिजनका कार्यकारी अध्यक्ष डा. महेन्द्र विष्टले महामारीको समयमा खेलकुदसँगै समग्र पत्रकारितालाई अगाडि बढाउन ठूलो चुनौती पैदा भएको बताए । नेपाल पत्रकार महासंघका महासचिव रमेश विष्टले खेलकुद नभएको अवस्थामा कसरी खेलकुदका समाचार दिनहुँ आउँछ होला भन्ने जिज्ञासा भइरहेको स्मरण गराए ।

वरिष्ठ खेलकुद पत्रकार श्याम चित्रकार र राजु सिलवालले नेपाली खेलकुद पत्रकारिताले विगतको तुलनामा उल्लेख्य सफलता हात पारेको चर्चा गर्दै आफ्नो समयको भोगाइबारे सुनाएका थिए । नेपाल खेलकुद पत्रकार मञ्चका अध्यक्ष दुर्गानाथ सुवेदीले खेलकुद बिटमा काम गर्ने १० जनाभन्दा बढी पत्रकारले कोभिड–१९ का कारण रोजगारी गुमाउन बाध्य हुनु दु:खदायी भएको बताए ।

एआईपीएस एसियाका कोषाध्यक्ष नीरञ्जन राजवंशीले कोरोना महामारीमा पनि खेलकुद पत्रकारले प्रतियोगिता नभए पनि फरक ढंगका समाचार उत्पादनमा जोड दिएको बताए । सन् १९२४ मा पेरिस ओलम्पिक हुँदा जुलाई २ तारिखमा इन्टरनेसनल स्पोर्ट्स प्रेस एसोसिएसन स्थापना गरिएको थियो । सोही दिनलाई विश्व खेलकुद पत्रकार दिवसका रूपमा मनाउने गरिन्छ ।