फरक परिस्थिति, फरक चुनौती

जतिबेला बार्सिलोना स्पेनी ला लिगाका लागि साँच्चै मैदानमा फर्कनेछ, त्यतिबेला यो समीकरण यस्तो हुने छैन । एक त लिग उपाधिको होडले कति बेला कस्तो मोड लिने हो, त्यो निश्चित छैन ।

त्यसमाथि बार्सिलोनाले युरोपकै सबैभन्दा ठूलो त्यस्तो रंगशालामा खेल्नेछ, जहाँ पटक्कै दर्शक हुने छैनन् । रियल म्याड्रिडले त झन् आफ्नो घरेलु मैदान नै फेरेको छ । स्पेनी फुटबलका दुई ठूलो प्रतिद्वन्द्वीबीच जम्माजम्मी २ अंकमात्र फरक छ । लिग आफैं भने बिहीबार सुरु हुनेछ । पहिलो दिन सेभिया र रियल बेटिसबीच खेल हुनेछ अनि यससँगै क्रमभंग हुनेछ ९३ दिनको फुटबलबिनाको स्पेन ।

ला लिगालाई फुटबल सुरु गर्न मात्र हतारो छैन, सकाउन पनि उत्तिकै चिन्ता छ । त्यसैले लिगका सबै बाँकी सबै खेल सकाउने उसको योजना छ । मार्चमा खेल रोकिएको थियो र त्यतिबेला रियलले शीर्षस्थान बार्सिलोनालाई सुम्पेको थियो । यसअघि रियलले सान्टियागो बेर्नाबाउमा बार्सिलोनालाई हराएको थियो । शीर्षस्थानको त्यो फेरबदल एक साता पनि पुरानो नहुँदै फुटबल नै रोकियो ।

सिजनमा ११ चरणका खेल हुन बाँकी छन् । यसबीचमा कुन टिम बलियो भएर अगाडि आउने हो, त्यसको न टुंगो छ, न अनुमान लगाउन सकिन्छ । अब सबैभन्दा निर्णायक तत्त्व हुनेछ, कुन टिमले कसरी नयाँ परिस्थितिमा आफूलाई अभ्यस्त राख्न सक्यो । रियलको घरेलु मैदानको क्षमता पनि ८१ हजारको छ, तर उसले अब बेर्नाबेउमा खेल्ने छैनन्, बरु खेल्नेछ त ६ हजार दर्शक क्षमताको अल्फ्रेडो डी स्टेफानो रंगशालामा ।

अरू बेला भए, यस रंगशालामा रियलको दोस्रो रोजाइको टिमले खेल्थ्यो, होइन भने यू– १८ टिमले । बार्सिलोनालाई पनि बानी थियो, आफ्ना अपार दर्शक अगाडि खेल्ने । अब यो सुविधा त हुने छैन नै । भर्खरै मात्र रियलका टोनी क्रुसले भनेका छन्, ‘हामी पहिलोपल्ट आफ्ना समर्थकबिना खेल्दैछौं । यो परिस्थितिमा जसले आफूलाई पहिले ढाल्न सक्छ, त्यही माथि हुनेछ ।’

^{नाेउ क्याम्प रंगशाला बार्सिलाेना}

रमाइलो के भने बार्सिलोनाका लागि यो पटक्कै पहिलो अनुभव पनि होइन । सन् २०१७ मा मेसीसँगै लुइस स्वारेज, सर्जियो बास्क्वेट, जेरार्ड पिके, सर्जियो रोबर्टो, जोडी अल्बा सबैले लास पाल्मासविरुद्ध घरमा बिनादर्शक खेलेका थिए । त्यतिबेला बार्सिलोनासामु रंगशाला खाली राख्नुको निहुँ पनि थियो, राजनीतिक तनावबीच लगातार विरोध कार्यक्रम ।

त्यो खेल बार्सिलोनाले ३–० ले जितेको थियो । यसपल्ट बार्सिलोनाले एक होइन, पाँच खेल घरमा दर्शकबिना खेल्नेछ, त्यसमध्ये एक खेल एट्लेटिको म्याड्रिडविरुद्ध छ । एट्लेटिकाका लागि त यो राहत नै हो । लेगानेस र इस्पान्योलले पनि नोउ क्याम्पमा खेल्नु छ र यी टिम रहेका छन्, अंकतालिकाको १९ र २० औं स्थानमा । बार्सिलानाकै आर्टुरो भिडाल भन्छन्, ‘स्थितिसँग भिज्नुबाहेक अरू विकल्प नै के छ र ?’

उनी भन्छन्, ‘समर्थकसहित खेल्नुको मज्जा नै अर्को । किनभने यसमा समर्थकसँग नजिकको सम्बन्ध कायम रहेको हुन्छ । तर हामी अबको नयाँ परिस्थितिलाई आफूअनुकूल बनाउनेछौं ।’ शनिबार मात्रै क्याम्प नोउमा पहिलोपल्ट पूरा अभ्याससत्र चलेको थियो । यता जिदानमाथि पनि आफ्ना खेलाडीलाई नयाँ मैदानमा अभ्यस्त राख्ने चुनौती हुनेछ ।

अल्फ्रेडो डी स्टेफानो रंगशालाको मैदान ठ्याक्कै त्यत्तिकै छ जति बेर्नाबेउको पनि छ । अहिले रियलका कर्मचारी त्यो मैदानलाई सम्हाल्न व्यस्त छन् । कम्तीमा जिदानका लागि यो सर्वथा नयाँ रंगशाला भने होइन । किनभने कुनै बेला उनी रियलको दोस्रो रोजाइको टिम कास्टिलामा प्रशिक्षक थिए । त्यो टिमले यही मैदानमा खेल्यो । अझ सन् २००६ मा रियलका लागि उनले अन्तिम पटक यही मैदानमा खेलेका थिए ।

अल्फ्रेडो डी स्टेफानो रंगशालाको मैदानमा हुर्केका भन्दा हुन्छ, डानियल कार्भाजल, सर्जियो रामोस, कासेमिरो, फेडे भाल्भरेडे, भिनिसिय जुनियर, लुकास भाज्क्वेज र रोड्रिगो । रियलले यस मैदानमा आइबर, भ्यालेन्सिया, मार्लोका, गेटाफे, एलाभेस र भिल्लारियलविरुद्ध खेल्नेछ । ती टिमका लागि यो मैदान एक प्रकारले तटस्थ भूमि जस्तै हुनेछ, किनभने यसले बेर्नाबेउको जस्तो गर्विलो इतिहासको बोझ बोकेको छैन ।

त्यसैले त रामोसले ठीकै भनेका छन्, ‘मलाई त बेर्नाबेउमै खेल्नु ठीक लाग्छ ।’ दर्शकबिना खेल्दा जुन आफ्नो मैदानको फाइदा हुन्छ, त्यो सबैभन्दा बढी गुमाउने टिम बार्सिलोना नै हुनेछ । यस सिजन उसले रियलको तुलनामा घरमा ९ अंक बढी बटुलेको छ । जे हो, अबको स्थिति सबैका लागि नयाँ हो । त्यो पनि विचित्रको । त्यसैले सबैसामु यस्तै हुनेछ भनेर केही पनि अनुमान गर्ने आधार नै छैन ।