‘ए’ डिभिजन लिग : एकै दिन ३ खेल, १३ गोल

सहिद स्मारक ‘ए’ डिभिजन लिगको अन्तिम चरण (१३ औं) बिहीबार सुरू भयो । सातदोबाटोस्थित एन्फा कम्प्लेक्समा तीन खेल सम्भव भए । गोलको कमी भएन । विशेषगरी सरस्वती युवा क्लबको बिदाइका लागि यो दिनलाई सम्झिइने छ । 
कान्तिपुर संवाददाता

काठमाडौँ — यो साता सहिद स्मारक ‘ए’ डिभिजन लिगमा बिहानै ८ः४५ बजे पनि खेल सुरु भइरहेको छ, जुन घरेलु फुटबलमै बिरलै हो । त्यसैले बिहानी खेललाई लिएर ‘ब्रेकफास्ट लिग’ पनि भन्न थालिएको छ यसपालिको संस्करणलाई । अन्तिम चरणको खेल बिहीबार सुरु भयो । यो दिन सातदोबाटोस्थित एन्फा कम्प्लेक्समा तीन खेल सम्भव भए । गोलको कमी भएन, निस्किए ३ खेलमा १३ गोल ।

अन्तिम अर्थात् १३ औं चरणको पहिलो दिनलाई विशेषगरी सरस्वती युवा क्लबको बिदाइका लागि सम्झिइने छ । एक खेल बाँकी छँदै दोस्रो डिभिजनमा झर्ने निश्चित भइसकेको सरस्वतीले औपचारिक बिदाइको प्रतिस्पर्धामा पनि अत्यासलाग्दो हार बेहोर्‍यो । ८ वर्षपछि घटुवा भएको सरस्वतीलाई संकटाले ६–२ ले पराजित गर्‍यो ।


संकटाले दुवै हाफमा तीन–तीन गोल गर्‍यो । अफ्रिकी मूलका खेलाडी मेसोके ओलोमोउले पाँचौं मिनेटमै गोलको खाता खोले । उनले नै ३५ औं मिनेटमा संकटाको अग्रता दोब्बर बनाए । सुभाष गुरुङले ३८ औं मिनेटमा गोल गरेपछि संकटा ३–० ले अघि बढ्यो । दोस्रो हाफमा टीकाराज गुरुङले ५६ र रोशन पहारीले ८३ औं मिनेटमा गोल थपे । सरस्वतीका पूर्णबहादुर श्रेष्ठले ६५ औं मिनेटमा आत्मघाती गोल गरेपछि यो लिगको एउटै खेलमा सर्वाधिक ६ गोल संकटाले पनि गर्‍यो ।


यसपालिको लिगमै पहिलोपल्ट एउटै खेलमा ८ गोल भएको दिनको अन्तिम प्रतिस्पर्धामा सरस्वतीका लागि दोस्रो हाफमा मैदान छिरेका काजिम बुसारीले ७९ औं मिनेटमा गरेको गोल सान्त्वना बन्यो । त्यसअघि संकटाका अर्नेस्ट टेम्पीको आत्मघाती गोल पनि बुसारीकै प्रयासमा भएको थियो । सरस्वती १३ खेलमा एक जित, एक बराबरी र ११ हारसँगै मात्र ४ अंक बनाएर पुछारमा रहँदै घटुवामा परेको हो । संकटा १८ अंक जोड्दै सातौं स्थानमा रहेको छ ।


यसअघि पुलिसका जुमनु राईले दोस्रो हाफमा मैदानमा प्रवेश गर्दै प्रहार गरेको ह्याट्रिकले पनि चर्चा पायो । फ्रेन्ड्सविरुद्ध पुलिसले हात पारेको ३–० को जितमा सबै गोल यी भेट्रान फरवार्डले गरे ।


जुमनुले हेमन्त थापामगरको स्थानमा ४६ औं मिनेटमा मैदान प्रवेश गर्ने अवसर पाएका थिए । त्यसको तीन मिनेटपछि नै उनले रिबाउन्ड बललाई पोस्टको दिशा दिँदै गोलको खाता खोले । उनले दोस्रो गोल ५६ औं मिनेटमा गरे । उनले कठिन कोणबाट दर्शनीय गोल गर्दै ८५ औं मिनेटमा पुलिसलाई ३–० को अग्रता दिलाएर ह्याट्रिक पूरा गरे ।


पुलिसलाई २०६६–६७ र २०६८ को लिग च्याम्पियन बनाउन उत्कृष्ट प्रदर्शन गरेका जुमनु यो सिजनको लिगमा ह्याट्रिक गर्ने दोस्रो खेलाडी हुन् । यसअघि थ्रीस्टारका संजोक राईले दसौं चरणमा सरस्वतीविरुद्ध ४–० को जितमा ह्याट्रिक गरेका थिए । जितसँगै पुलिस २० अंक बनाएर पाँचौं स्थानमा उक्लियो । फ्रेन्ड्स १४ अंकसहित दसौंमा छ ।दिनको दोस्रो खेलमा एपीएफले ब्रिगेड ब्वाइजसँग १–१ खेल्दै अंक बाँडे । आशिष लामाले ४४ औं मिनेटमा गोल गर्दै विभागीय टिमलाई अग्रता दिलाएपनि विजय गुरुङले इन्ज्युरी समयमा गोल गरेपछि ब्रिगेड ब्वाइजले अंक जोडेको हो । थ्रीस्टारका पूर्व खेलाडी विजयले ५ मिनेटको इन्ज्युरी समयको तेस्रो मिनेटमा गोल गर्दै ब्रिगेड ब्वाइजको हारको शृंखलालाई ५ खेलमा पूर्णविराम लगाइदिए ।


एपीएफका फरवार्ड आशिष लामा अन्तिम खेलमा गोल गरेसँगै सर्वाधिक गोलकर्ताको सूचीमा २ गोलले अगाडि बढेका छन् । उनले ९ गोल गरेका छन् । उनीपछि च्यासलका सन्तोष साहुखल (७ गोल) छन् । आर्मीका नवयुग श्रेष्ठ, मनाङ मर्स्याङदीका विमल राना र अन्जन विष्टले ६–६ गोल गरेका छन् ।


कुल १४ क्लब सहभागी लिगमा रेलिगेसनमा परेको सरस्वतीभन्दा ५ अंकमाथि छन्, ब्रिगेड ब्वाइज र एपीएफ । दुवैले ९–९ अंक बटुले । एउटामात्रै टिम रेलिगेसनमा पर्ने व्यवस्था गरिएको यसपालिको लिग शनिबार सकिँदै छ । आर्मी र मछिन्द्रबीच हुने अन्तिम खेलले ‘ए’ डिभिजन लिगमा नयाँ च्याम्पियनको निर्णय गर्नेछ ।


आजका खेल

हिमालयन शेर्पाविरुद्ध एनआरटी

८:४५ बजे

थ्रीस्टारविरुद्ध च्यासल

१२:१५ बजे

जावलाखेलविरुद्ध मनाङ

१५:३० बजे

एन्फा कम्प्लेक्स, सातदोबाटो प्रकाशित : फाल्गुन २, २०७६ ०९:११

प्रतिक्रिया
पठाउनुहोस्

कोरोना प्रकोप : बिहीबार १२४ को मृत्यु, संक्रमित पुष्टि गर्न नयाँ विधि

एजेन्सी

बेइजिङ — नोवल कोरोना भाइरसका कारण बिहीबार चीनमा १२३ र जापानमा एक जनाको मृत्यु भएको छ । शुक्रबार बिहानसम्म कोरोना भाइरसका कारण मृत्यु हुनेको संख्या एक हजार ३ सय ८३ पुगेको छ । त्यसमध्ये हङकङ, फिलिपिन्स र जापानमा एक-एक जनाको मृत्यु भएको छ ।

बुधबारको तुलनामा भने बिहीबार मृत्यु हुने र संक्रमितको संख्यामा कमी आएको छ । बुधबार मात्रै डिसेम्बरमा संक्रमण देखिएयताकै सबैभन्दा धेरै २४२ जनाको मृत्यु भएको थियो भने करिब १५ हजार संक्रमित थपिएका थिए ।

त्यस्तै बिहीबार चीनमा मात्रै थप चार हजार ८ सय ५४ जनामा संक्रमण देखिएको छ । बिहीबार नै जापानमा ५०, सिंगापुरमा ८, हङकङमा ३, अमेरिकामा २ र मलेसिया र भियतनाममा १-१ जनामा संक्रमण देखिएको छ ।

शुक्रबार बिहानसम्म विश्‍वरभर संक्रमितको संख्या ६५ हजार २४७ पुगेको छ । उपचारमा नयाँ विधि लागू गरिएपछि थप संक्रमित पहिचान भएको स्वास्थ्य आयोगका प्रवक्ता मीले बताए । प्रयोगशालामा पुष्टि भएका मात्रै नभई लक्षण र जोखिमका आधारमा ‘क्लिनिकल्ली पुष्टि भएका’ लाई पनि संक्रमितमा राखिएकाले यो संख्या पुगेको उनको भनाइ छ ।

संक्रमित पुष्टि गर्न नयाँ विधि

चीनले नोवल कोरोना संक्रमित पुष्टि गर्न नयाँ विधि लागू गरेको छ । संक्रमितको अवस्था हेरेर वर्गीकरणको नयाँ प्रणाली लागू गरिएको चिनियाँ स्वास्थ्य आयोगले जनाएको छ ।

यसअघि ‘न्युक्लेइक एसिड’ परीक्षणका आधारमा संक्रमित पुष्टि गरिन्थ्यो । नयाँ विधिअनुसार संक्रमणका लक्षण तथा सीटी स्क्यान गर्दा फोक्सोमा असर देखिए मात्र रोग लागेको पुष्टि गरिनेछ । भाइरसको

उद्गमस्थल हुबेई प्रान्तमा लागू गरिएको विधिले संक्रमण निदानको दायरा फराकिलो बनाउने दाबी छ । भाइरस प्रकोप नियन्त्रणमा उचित कार्य गर्न नसकेको भन्दै हुबेई र वुहानका उच्च अधिकारी हटाइएकै दिन मंगलबार संक्रमण पहिचानका लागि नयाँ विधि लागू गर्ने घोषणा गरिएको थियो । संक्रमण नियन्त्रणमा काम गर्न नसकेको भन्दै व्यापक आलोचना भएपछि ती अधिकारी बर्खास्तमा परेका थिए ।

हुबेईले संक्रमितको पहिचान र उपचारलाई तीव्रता दिन संशोधित निदान र उपचार योजना अपनाएको चिनियाँ राष्ट्रिय स्वास्थ्य आयोगका प्रवक्ता मी फेङले बताएका छन् । निमोनिया भएका संदिग्धको पहिचान गर्न ‘क्लिनिकल डाइग्नोसिस केस’ नयाँ उपचार प्रणालीमा राखिएकाले जतिसक्दो चाँडो बिरामीबारे जानकारी हुने र संक्रमण पुष्टि भए उपचार गर्न सकिने उनले बताए । नयाँ प्रक्रियाले बिरामीको संख्या र मृत्युदर घटाउन सहयोग पुग्ने प्रवक्ता मीको भनाइ छ ।

वुहानस्थित दुई अस्पतालमा उपचाररत बिरामीको उपचार गर्ने जिम्मेवारीसहित थप दुई हजार ६०० सैन्य स्वास्थ्य अधिकारी पनि खटाइएको चिनियाँ स्वास्थ्य अधिकारीले जानकारी दिएका छन् । यसबाहेक चीनका अन्य सहरबाट १८९ स्वास्थ्य टोलीमा रहेका २१ हजार ५६९ अधिकारी पनि हुबेई पठाइएको स्वास्थ्य आयोगले उल्लेख गरेको छ । थप सहयोगका लागि १७ प्रान्तबाट एक हजार चिकित्सक, एक हजार ६८१ नर्स र २१३ विज्ञ बुधबार वुहान पुगेका छन् । त्यसैगरी तीनटा मोबाइल पी थ्री प्रयोगशाला पनि वुहान पुर्‍याइएको छ ।

पर्यटकका गतिविधि नियाल्दै इन्डोनेसिया

इन्डोनेसियाले कोरोना भाइरस संक्रमण भएको हुन सक्ने भन्दै चिनियाँ पर्यटकका गतिविधि नियाल्ने भएको छ ।

स्वास्थ्य मन्त्रालयका अधिकारीले बिहीबार जनाएअनुसार रिसोर्ट टापु बालीबाट फर्कने सबै चिनियाँ पर्यटक निगरानीमा हुनेछन् । २६ करोड जनसंख्या रहेको विश्वकै चौथो ठूलो देश इन्डानेसिया चिनियाँ पर्यटकका लागि लोकप्रिय गन्तव्य हो । इन्डोनेसियामा हालसम्म कोरोना संक्रमित व्यक्ति भेटिएका छैनन् ।

चिनियाँ पर्यटक गएका होटल र अन्य गन्तव्यमा भाइरस परीक्षण भइरहेको तर हालसम्म कही पनि संक्रमणका लक्षण नपाइएको स्वास्थ्य मन्त्रालयले जनाएको छ ।

विश्व स्वास्थ्य संगठनले चीनमा देखापरेको भाइरस प्रकोपलाई अति सावधानीपूर्वक लिनुपर्ने धारणा राखेको छ । स्विट्जरल्यान्डको जेनेभामा आयोजित एक कार्यक्रममा संगठनका प्रमुख टेड्रोस एड्हानोम घेब्रेयसुसले कोरोना भाइरसबारे भ्रम फैलाइँदा त्यसले प्रकोप न्यूनीकरणमा असर पर्ने भन्दै सावधानीपूर्वक लिन सबैमा आग्रह गरेका हुन् ।

कहाँ कति संक्रमित?

चीन – १३८३ मृत्यु, ६४,६५८ संक्रमित

हङकङ – १ मृत्यु, ५३ संक्रमित

फिलिपिन्स – १ मृत्यु, ३ संक्रमित

जापान - १ मृत्यु, २५२ संक्रमित

संक्रमित मात्रै

सिंगापुर – ५८

थाइल्याण्ड – ३३

दक्षिण कोरिया – २८

ताइवान – १८

अस्ट्रेलिया – १५

मलेसिया – १९

जर्मनी – १६

भियतनाम – १६

अमेरिका – १५

फ्रान्स – ११

मकाओ – १०

बेलायत – ९

क्यानडा – ७

यूएई – ८

इटाली – ३

भारत – ३

रुस – २

श्रीलंका – १

कम्बोडिया – १

फिनल्याण्ड – १

नेपाल – १

स्विडेन – १

स्पेन – १

बेल्जियम – १


प्रकाशित : फाल्गुन २, २०७६ ०८:५९
पूरा पढ्नुहोस्
प्रतिक्रिया
पठाउनुहोस्
×