धनगढीमा निषेधाज्ञा जारी
धनगढी — धनगढीमा ग्रेडरले च्यापेर बिहीबार बिहान एक बालिकाको मृत्यु भएपछि सुरु भएको विरोध प्रदर्शनबाट शान्ति सुरक्षा अवस्था बिग्रिन सक्ने भन्दै जिल्ला प्रशासन कार्यालय कैलालीले धनगढीमा निषेधाज्ञा जारी गरेको छ । बिहीबार साँझ ७ बजेदेखि शुक्रबार साँझ ७ बजेसम्मका लागि निषेधाज्ञा जारी गरिएको प्रशासनद्वारा जारी विज्ञप्तिमा उल्लेख छ ।
ग्रेडरले कुल्चिएर हसनपुुरस्थित पञ्चोदय मावि कक्षा-८ मा अध्ययनरत बैतडी डिलासैनी गाउँपालिका ६ का गणेश साउदकी छोरी १५ वर्षीया छात्रा चेतनाको बिहीबार बिहान घटनास्थलमै मृत्य भएको थियो । घटनापछि धनगढीका विभिन्न ठाउँमा विद्यार्थीहरू आन्दोलित भएका छन् ।
उनीहरूले सडकमा टायर बाल्दै जिल्ला प्रहरी कार्यालय अगाडि पनि प्रदर्शन गरेका थिए । शान्ति सुरक्षाको अवस्था थप बिग्रन नदिन निषेधाज्ञा जारी भएको जिल्ला प्रहरी कार्यालयका प्रवक्ता वेदप्रकाश जोशीले बताए । निषेधाज्ञाको समयमा ५ जनाभन्दा बढी व्यक्तिहरू आवतजावत गर्न; भेला, प्रदर्शन, घुमफिर गर्न; सवारी साधन चलाउन निषेध गरिएको छ ।
हसनपुर पिपलचौतारा नजिक पानीपिच गरिरहेको ना १ क ९७५ नम्बरको कालिका कन्स्ट्रक्सनको ग्रेडरले लेबल मिलाउँदै ब्याक गर्ने क्रममा कुल्चिएर बालिकाको मृत्यु भएको थियो । चालक भने अहिले प्रहरी नियन्त्रणमा छन् ।
