विद्यालयमा प्याड व्यवस्थापन समस्या- सुदूरपश्चिम - कान्तिपुर समाचार
कान्तिपुर वेबसाईट
AdvertisementAdvertisement

विद्यालयमा प्याड व्यवस्थापन समस्या

तृप्ति शाही

बैतडी — बैतडीका अधिकांश विद्यालयमा सेनेटरी प्याड व्यवस्थापन गर्ने ठाउँ नहुँदा किशोरीहलाई समस्या हुने गरेको छ । महिनावारी भएको समयमा विद्यालयले किशोरीलाई प्याड उपलब्ध गराउने भएपनि अधिकांश ठाउँमा प्याड व्यवस्थापनको समस्या किशोरीहरूले भोगिरहेका छन् ।


महिनावारी भएको समयमा विद्यालयबाट प्याड पाइने भए पनि प्रयोग गरेको प्याड व्यवस्थापन गर्ने ठाउँ नभएको डिलाशैनीस्थित सरस्वती मावि नानराकी छात्रा अनुष्का भट्टले बताइन् । ‘महिनावारीको बेला विद्यालयबाट प्याड पाइन्छ तर फेर्ने र फाल्ने ठाउँ नै हुदैन’ उनले भनिन्, ‘यसले हामीलाई सास्ती भएको छ ।’

प्रयोग गरेको सेनेटरी प्याड चार/ चार घण्टामा फेर्नुपर्ने भए पनि छात्रामैत्री शौचालय नहुँदा विद्यालयमा अध्ययन गर्ने किशोरीहरूलाई समस्या हुने गरेको छ । प्याड फेर्न र प्रयोग गरेको प्याडलाई व्यवस्थापन गर्न साह्रै समस्या हुने गरेको दुर्गा मावि सिमारकी छात्रा सुस्मिता बोहराले बताइन् । ‘छात्रा मैत्री शौचालयहरू विद्यालयमा छैनन् । शौचालयहरू फोहोरले भरिएका हुन्छन् । पानीसमेत हुँदैन, उनले भनिन्, ‘हामीलाई महिनावारी भएको बेला धेरै समस्या भोग्नुपर्छ । बीचमै विद्यालय छोडेर आउनुपर्ने अवस्था पनि छ ।’

प्याड व्यवस्थापनका लागि आवश्यक संरचना निर्माण नहुँदा छात्राहरूलाई समस्या हुने गरेको जगदम्बा मावि खलिगाडकी छात्रा सरिता जोशीले बताइन् । महिनावारी सरसफाइका विषयमा थाहा भए पनि प्याड व्यवस्थापन गर्ने ठाउँ नहुँदा समस्या भएको छ । उनले भनिन्, ‘महिनावारीको प्याड फेर्न र प्रयोग गरेको प्याड व्यवस्थापन गर्ने ठाउँ नहुँदा हामीहरूलाई समस्या छ । यसले पढाइमा बाधा पुग्ने गरेको छ ।’

अधिकांश विद्यालयमा छात्राहरूले यो समस्या भोगिरहेको वीरेन्द्र मावि शाहीले बैतडीकी शिक्षिका शान्ति चन्दले बताइन् । यसले छात्रालाई मात्र नभएर महिला शिक्षकहरूलाई पनि समस्या हुने गरेको उनले बताइन् । महिला शिक्षकहरू त जसरी तसरी व्यवस्थापन गर्ने भए पनि छात्राहरूले यसले धेरै समस्या भोगिरहेका उनको भनाइ छ । विद्यालय व्यवस्थापनको कमजोरीकले दुःख पाइरहेका उनले बताइन् ।

बैतडीका विभिन्न स्थानीय तहमा रूपान्तरण कक्षामार्फत महिनावारी सरसफाइका बिषयमा छलफल हुने गरेको छ । किशोरकिशोरी समूहमा हुने छलफलमार्फत सेनेटरी प्याडको प्रयोग र यसको व्यवस्थापनका विषयमा जानकारी दिने गरिएको सहजकर्ता हरू भट्टले बताइन् । यी कक्षाहरूमा हुने छलफलबाट आफूहरूले विद्यालयमा समेत आवाज उठाउने गरेको उनले बताइन् । उनले भनिन्, ‘अधिकांश विद्यालयमा प्याड व्यवस्थापनमा समस्या भएकोले व्यवस्थापन गर्ने ठाउँ बनाउन आग्रह गरेका छौं ।’ सेनेटरी प्याड व्यवस्थापनका लागि गाउँपालिकाभरिका विद्यालयहरूको अवस्थाका बारेमा जानकारी लिने र त्यसपछि आवश्यक योजना बनाउने डिलाशैनी गाउँपालिकाका प्रवक्ता यज्ञराज भट्टले बताए । ‘हामीले छात्राहरूको समस्या थाह पाएका छौं, उनले भने, ‘यो समस्या समाधानका लागि पहल गर्छौं ।’

प्रकाशित : मंसिर १४, २०७९ ०८:३७
प्रतिक्रिया
पठाउनुहोस्

गहुँलाई मल अभाव

अवधेशकुमार झा

राजविराज — गहुँ छर्ने सिजनमा मल अभाव भएको भन्दै सप्तरीका पालिका प्रमुखहरूले प्रमुख जिल्ला अधिकारीमार्फत प्रधानमन्त्रीलाई ज्ञापनपत्र बुझाएका छन् । आइतबार ज्ञापनपत्र बुझाउँदै १८ वटा पालिकाका प्रमुखहरूले आवश्यक मात्रामा रासायनिक मलको व्यवस्था गरिदिन माग गरेका छन् । 

सप्तरीमा ८१ हजार ६ सय ६८ हेक्टर जग्गा खेतीयोग्य छ । उक्त जग्गामा खेती गर्न वर्षभरिमा २३ हजार ८ सय ५७ दशमलब १५ मेट्रिक टन युरिया, १२ हजार ७ सय ८४ दशमलब १ मेट्रिक टन डीएपी, ९ हजार २४ मेट्रिक टन पोटास मल आवश्यक हुन्छ ।

तर पछिल्लो पटक कृषि सामग्री कम्पनी र साल्ट ट्रेडिङ लिमिटेडमा हिउँदेबालीका लागि ४ सय ९ दशमलब ६५ मेट्रिक टन डीएपी, २ सय ८३ दशमलब ७५ मेट्रिक टन युरिया र ८३ दशमलव ७ मेट्रिक टन युरिया आएको छ । जिल्लामा मौज्दात मलले किसानको आवश्यकता धान्न सक्ने अवस्था नरहेकाले तत्काल व्यवस्था गर्न प्रदेश र संघ सरकारलाई पालिका प्रमुखको आग्रह छ ।

मलको व्यवस्थापन हुन नसक्दा उत्पादनमा ह्रास भई किसानको लगानीसमेत उठ्न सक्ने अवस्था नरहेको ज्ञापनपत्रमा उल्लेख छ । आइतबार प्रशासनमा भएको बैठकमा पालिका प्रमुखहरूले रासायनिक मलको व्यवस्थापन स्थानीय सरकारले गर्न सक्ने अवस्था नरहेकाले सप्तरीमा खेतीयोग्य जग्गाको अनुपातमा मलको व्यवस्था गर्नुपर्ने बताए ।

‘अन्नको भण्डार सप्तरीमै रासायनिक मलको अभावमा उत्पादन घट्दै गएको छ,’ छिन्नमस्ता गाउँपालिकाका अध्यक्ष विद्यानन्द चौधरीले भने, ‘किसानको समस्याप्रति संघीय सरकार गम्भीर हुनुपर्छ ।’ हनुमाननगर कंकालिनी नगरपालिकाका प्रमुख वीरेन्द्र माझीले मल उपलब्ध नभएर खेती प्रभावित भए यसको जिम्मेवारी प्रदेश र संघ सरकारले लिनुपर्ने बताए ।

सप्तरीबाट नवनिर्वाचित प्रतिनिधिसभा सदस्य, प्रदेशसभा सदस्यहरू, पालिका प्रमुखहरू, स्थानीय प्रशासन र सरोकारवालाबीच बैठक भएको हो । मलको समस्या समाधानबारे छलफल गर्न आगामी दिनमा फेरि बैठक बस्ने जनप्रतिनिधिले जनाएका छन् ।

प्रकाशित : मंसिर १४, २०७९ ०८:३७
पूरा पढ्नुहोस्
प्रतिक्रिया
पठाउनुहोस्
×