दार्चुलामा लास्कु खोलाको बाढीले १३ घर बगायो, पहिरोमा दुई जना बेपत्ता
धनगढी — दार्चुला सदरमुकाम नजिक लास्कु खोलामा शुक्रबार राति आएको बाढीले महाकाली नगरपालिकाको बांगाबगड र डुङरीसम्म खोला किनारको बस्तीका १३ घर बगाएको छ । राति ११ बजेतिर खोलामा आएको बाढी र जिल्लाकै नौगाड गाउँपालिकामा पहिरोमा परी २ जना बेपत्ता भएको जानकारी प्राप्त भएको जिल्ला प्रशासन कार्यालय दार्चुलाले जनाएको छ ।
दार्चुलाका प्रमुख जिल्ला अधिकारी दीर्घराज उपाध्यायका अनुसार सदरमुकाम नजिक महाकाली नदीमा मिसिने लास्कु खोलामा राति ११ बजेदेखि आएको बाढीले १२/१३ घर बगाएको हो । ‘राति २ बजेदेखि नै नेपाल प्रहरी, सशस्त्र र नेपाली सेनाको टोली परिचालन गरी उद्धार कार्यमा खटिएको छ,’ प्रजिअ उपाध्यायले भने, ‘बाढीबाट प्रभावित लास्कु खोला किनारको महाकाली नगरपालिकाको बांगाबगर र डुङरीमा १ जना बेपत्ता भएको जानकारी आएको छ ।’ साथै शुक्रबार राति नै नौगाड गाउँपालिका १ सल्लि भन्ने ठाउँमा पहिरोमा पुरिएर अन्य अन्य १ जना बेपत्ता भएको खबर प्राप्त भएको प्रजिअ उपाध्यायले बताए ।
वर्षासँगै रातिको समयमा एक्कासि लास्कु खोलामा आएको बाढीले खोला किनारमा घरहरु बगाउँदा भएको क्षतिको विवरण प्राप्त भएको छैन । तीनवटै सुरक्षा निकाय र स्थानीयवासी उद्धारकार्यमा खटिएका छन् । लास्कु खोला सदरमुकाम नजिक महाकाली नदीमा मिसिन्छ ।
