प्रदर्शनकारीले ढुंगामुढा प्रहार गर्दा १२ प्रहरी घाइते- सुदूरपश्चिम - कान्तिपुर समाचार
विनोद शाही मृत्यु प्रकरण

प्रदर्शनकारीले ढुंगामुढा प्रहार गर्दा १२ प्रहरी घाइते

मेनुका ढुंगाना

अछाम — अछामको पञ्चदेवल विनायक–४ का १५ वर्षीय विनोद शाहीको मुत्यु प्रकरणलाई लिएर भएको प्रदर्शनका कारण अछाम तनावग्रस्त बनेको छ । विनोद शाहीको न्यायको लागि सदरमुकाम मंगलसेनमा सोमबार पर्दशन भएको हो ।

यस क्रममा प्रर्दशनकारीहरूले सरकारी वकिल कार्यालय र जिल्ला अदालत अछाममा ढुंगामुढा प्रहार गर्दा १२ जनाभन्दा बढी प्रहरी घाइते भएको जिल्ला प्रहरी कार्यालय अछामका सूचना अधिकारी प्रहरी निरीक्षक कैलाश विष्टले बताए ।

‘दुई प्रहरी निरीक्षक, महिला प्रहरीलगायत गरी १२ जना प्रहरीलाई गम्भीर चोट लागेको छ । स्थिति नियन्त्रणमा लिन प्रहरीले १२ सेल अश्रुग्याससमेत प्रहार गरेको हो’ उनले भने ,‘अदालत र सरकारी वकिल कार्यालयमासमेत ढुंगामुढा प्रहार भएका छन् । अहिले स्थिति नियन्त्रण गर्ने प्रयास भइरहेको छ ।’

जिल्लामा शान्ति सुरक्षा कायम गर्न अन्य जिल्लाबाट समेत ठूलो संख्यामा सुरक्षाकर्मी मगाएको उनले बताए । प्रर्दशनकारीले आइतबारदेखि सडकसमेत बन्द गरेकोमा प्रहरीले सडक भने खुलाएको छ ।

गत वैशाख १७ गते बेपत्ता भएका विनोद शाही २० गते मृत अवस्थामा भेटिएका थिए । शाहीको मृत्यु घटनामा अनुसन्धानका लागि प्रहरीलाई सहयोग गर्ने भन्दै आरोपित पञ्चदेवल नगरपालिकाकी मेयर अम्बिका चलाउने शनिबार प्रहरी कार्यालयमा उपस्थित भएकी थिइन्। अछाम जिल्ला प्रहरी कार्यालयका प्रमुख डीएसपी नारायण डाँगीका अनुसार चलाउनेसँगै अर्का एक आरोपित शनिबार साँझ प्रहरीकहाँ स्वयं उपस्थित भएका हुन् ।

‘हामी घटनाको अनुसन्धाको क्रममै छौं । पन्चदेवल विनायक नगरपालिकाकी मेयर अम्बिका चलाउने आफैं हाम्रो सम्पर्कमा आएकी हुन्,’ अछाम प्रहरी प्रमुख डीएसपी डांगीले भने । अहिले मेयर चलाउनेलगायतको बयानको क्रम जारी रहेको प्रहरीले जनाएको छ ।

उक्त मुद्दामा प्रहरीले यसअघि नै पाँच जनालाई पक्राउ गरिसकेको थियो । आइतबार चलाउनेसहित सात जनालाई अदालतबाट २ दिनको म्याद थप गरी हिरासतमा राखेको छ । बाँकी सात जनाको पनि खोजी कार्य जारी रहेको डाँगीले बताए । जेठ २६ गते शाहीका परिवार र आफन्तले नवनिर्वाचित मेयर चलाउनेसहित १३ जनाविरुद्ध किटानी जाहेरी दिएका थिए ।

प्रकाशित : असार २०, २०७९ १४:०४
प्रतिक्रिया
पठाउनुहोस्

कूटनीतिक मर्यादाविपरीत दूतावासलाई सेनाको पत्राचार

प्रधानमन्त्री र रक्षामन्त्रीलाई अवगत पनि गराइएन
कान्तिपुर संवाददाता

काठमाडौँ — प्रमुख प्रतिपक्षी दलका नेता केपी शर्मा ओलीले अमेरिकी स्टेट पार्टनरसीप प्रोग्राम (एसपीपी)मा काठमाडौंस्थित अमेरिकी दूतावासलाई पत्राचार गर्दा सेनालाई तत्कालीन प्रधानमन्त्री तथा रक्षामन्त्रीलाई जानकारी नदिएको बताएका छन् । 

प्रतिनिधिसभामा सोमाबर आफ्ना धारणा राख्दै ओलीले एसपीपीमा पत्राचारबारे आफूलाई अवगत नगराइएको बताए । '२०७२ साल कातिक १० गते त्यही निर्णय तत्कालीन प्रधानसेनापतिबाट अमेरिकी दूतावासमार्फत पत्राचार भएको देखिन्छ । त्यस सम्बन्धमा सरकार परिवर्तित भएको र त्यो सरकारलाई नयाँ गठित सरकारलाई जानकारी नगराइएको,' उनले भने, 'सेनाले सोझै विदेशी दूतावाससँग पत्राचार गर्ने र सेनाले दूतावाससँग कुरा गर्ने कूटनीतिक मर्यादा, प्रचलनअनुसार भएन । त्यतिबेला प्रधानमन्त्री, रक्षामन्त्रीलाई अवगत पनि गराइएन ।'

सत्तारुढ दल नेकपा माओवादी केन्द्रका अध्यक्ष पुष्पकमल दाहालले एसपीपी नेकपा एमालेका अध्यक्ष केपी शर्मा ओलीको पालामा भएको र अहिलेको सरकारले रद्ध गरेको भनी दिएको अभिव्यक्तिको पनि संसद्‌मा ओलीले आलोचना गरेका छन् । उनले भने, 'राज्यले र राज्यमा बसेका नेताहरूले यस्तो गर्न पाइँदैन । चुनौतिका साथ भन्न चाहन्छु २०७२ भदौ २४ गते कहाँकहाँबाट के के कुरा भयो हामीलाई थाहा छैन । २०७२ साल भदौ २४ गते संविधान जारी हुनुभन्दा १० दिन अगाडि नेपाली सेनाले एसपीपी सम्बन्धमा पत्राचार गरेको रहेछ । नेपाली सेनालाई रक्षा मन्त्रालयको प्रतिनिधिसमेत मनोनयन गर्ने गरी सहमति दिने निर्णय भएको थियो, २०७२ असोज ६ गते । २०७२ असोज १३ गते संविधान जारी भएको १० दिनपछि रक्षा मन्त्रालयबाट त्यससम्बन्धमा नेपाली सेनालाई पत्र पठाइएको थियो ।'

तत्कालीन रक्षा सचिवले पत्राचारबारे प्रधानमन्त्री तथा रक्षामन्त्रीलाई जानकारी दिइएको भनेर दिएको अभिव्यक्तिलाई पनि ओलीले नकारेका छन् । 'संविधान जारी भएको तीन दिनपछि मन्त्रीस्तरीय निर्णय गर्दा प्रधाानमन्त्री या रक्षामन्त्री को हुनुहुन्थ्यो ? टिप्पणी फाइलमा कसको हस्ताक्षर थियो । कसले सदर गरेको थियो र तत्कालीन सचिव त्यतिबेलाका सचिव अहिले कता हुनुहुन्छ ? उहाँलाई जानकारी होला,' उनले भने, 'अहिले त उहाँ तत्कालीन प्रधानमन्त्री र रक्षामन्त्रीलाई जानकारी गराइएको थियो भन्नुहुन्छ । तत्कालीन प्रधानमन्त्रीलाई जानकारी गराइएको थियो भन्ने झुट कुरा गर्नुहुन्छ । सेनाबारे लेखेको पत्रबारे उहाँको बयानले के भन्नुहुन्छ भने उहाँ जानकार हुनुहुन्छ ।'

प्रकाशित : असार २०, २०७९ १४:००
पूरा पढ्नुहोस्
प्रतिक्रिया
पठाउनुहोस्
×