मतदानस्थलमा खटिए कर्मचारी
कञ्चनपुर — प्रायः सुनसान रहने जिल्ला समन्वय समितिको प्रांगणमा मंगलबार निकै चहल पहल देखियो । मतपेटिका मिलाउनेदेखि ढुवानीको तयारी भइरहेको थियो । कतिपय निर्वाचन सामग्री बुझिरहेका छन् । कोही निर्वाचन सामग्री लिएर मतदानस्थलतर्फ जाँदै थिए ।
स्थानीय तहको निर्वाचनका लागि मतदान अधिकृत तथा अन्य कर्मचारीहरू निर्वाचन सामग्रीसहित मतदानस्थलमा जाने तयारी गरिरहेका थिए ।
मुख्य निर्वाचन अधिकृतको कार्यालयले मंगलबारदेखि निर्वाचन सामग्री पठाउन सुरु गरेको छ । मतदान स्थलमा खटिने कर्मचारीहरूलाई निर्वाचन सामग्री बुझाएर मतदान केन्द्रसम्म पठाउन थालिएको हो । मुख्य निर्वाचन अधिकृतको कार्यालयका अनुसार जिल्लाका ३४१ वटै मतदानस्थलका लागि मतपेटिका, मतपत्रलगायतका निर्वाचन सामग्री सम्बन्धिन मतदान अधिकृतलाई बुझाइसकिएको छ । ‘मंगलबारदेखि निर्वाचन सामग्री मतदान केन्द्रमा पठाउन सुरु भएको भएको छ,’ मुख्य निर्वाचन अधिकृत मदन बहादुर धामीले भने, ‘बुधबार साँझसम्म मतदान स्थलमा निर्वाचन सामग्री र कर्मचारीहरू पुग्छन् ।’
७ नगरपालिका र २ गाउँपालिका गरी ९ वटा स्थानीय तह रहेको कञ्चनपुरमा १३२ मतदान स्थल र ३४१ मततदान केन्द्र छन् । यसका लागि हरेक मतदान केन्द्रमा मतदान अधिकृत, सहायक मतदान अधिकृत सहित ५ कर्मचारी खटाइएको छ । जिल्लाभरिमा १७ सय ५ कर्मचारी खटाइएको मुख्य निर्वाचन अधिकृत धामीले बताए ।
निर्वाचन सुरक्षाकै लागि मंगलबार रातिदेखि नेपाल–भारत सीमा नाका पनि बन्द हुने भएको छ । मतदान सकिँदासम्म अत्यावश्यकबाहेकको कामका लागि आउजाउ पूर्ण रूपमा बन्द हुने जिल्ला प्रहरी कार्यालय कञ्चनपुरका एसपी श्यामसिंह चौधरीले बताए । उनका अनुसार मंगलबार राति १२ बजेदेखि सीमा नाका सिल गरिनेछ ।
जिल्लामा निर्वाचन सुरक्षाका लागि विभिन्न घेरामा सुरक्षाकर्मी परिचालय गरिएको छ । पहिलो घेरामा नेपाल प्रहरीले सुरक्षा दिनेछ । दोस्रोमा म्यादी प्रहरीले मतदातालाई सहजीकरणसँगै अपांगता भएका, ज्येष्ठ नागरिक र गर्भवती महिलाहरूलाई सहज रूपमा मतदान गर्न सहयोग पुर्याउनेछन् । तेस्रो घेरामा नेपाल प्रहरीका मोबाइल टोली, चौथोमा सशस्त्र प्रहरीको मोबाइल टोली, पाँचौंमा सादा पोसाकका प्रहरीसँगै राष्ट्रिय अनुसन्धानका कर्मचारी र छैटौंमा सेनाले सुरक्षा दिनेछ । उनले मतदान सकिएलगत्तै मतपेटिका ढुवानीका रणनीतिहरू बनिसकेको बताए ।
प्रकाशित : वैशाख २८, २०७९ ११:४४
