सुदूरपश्चिममा बढ्दै महोत्सव- सुदूरपश्चिम - कान्तिपुर समाचार

सुदूरपश्चिममा बढ्दै महोत्सव

सुदूरपश्चिम महोत्सव बिहीबारदेखि धनगढीमा सुरू
कान्तिपुर संवाददाता

धनगढी — कोरोनाले दुई वर्षदेखि ठप्प रहेका मेला महोत्सवहरू पुनः सुरु हुन थालेका छन् । १४औं संस्करण पूरा गरिसकेको सुदूरपश्चिम महोत्सव बिहीबारदेखि धनगढीमा सुरु भएको छ । यसअघि महोत्सव अत्तरियामा सम्पन्न भइसकेको छ । पहाडी जिल्ला डडेलधुरामा पनि महोत्सव चलिरहेको छ ।

सुदूरपश्चिमको आर्थिक विकासलाई उठान गर्दै यहाँको व्यापार व्यवसाय प्रवर्द्धन र सांस्कृतिक मनोरञ्जन प्रदान गर्ने उद्देश्यले हरेक वर्ष कैलाली उद्योग वाणिज्य संघले आयोजना गर्दै आएको सुदूरपश्चिम महोत्सवको १५औं संस्करण धनगढीमा बिहीबारदेखि सुरु भएको हो । विगतमा वर्षहरूमा महोत्सवको उद्घाटनमा आयोजकले सुदूरपश्चिमको विकासका सवालहरूमा केन्द्रीय सत्तासीन नेताहरूलाई बोलाएर विभिन्न मागहरू राख्ने गरेको भए पनि कुनै सुनुवाइ नै नहुने गरेको भन्दै यस वर्ष महोत्सवको उद्घाटन मुख्यमन्त्री त्रिलोचन भट्टमार्फत गराइएको आयोजकले बताएका छन् । उद्घाटनअघि विगतझैं यस वर्ष पनि धनगढी बजारमा सांस्कृतिक झाँकीसहित प्रभातफेरी गरिएको थियो ।

विगतमा संघीय प्रहरी कार्यालयको मैदानमा हुँदै आएको महोत्सव यस वर्ष भने धनगढीकै पशुपति टोलमा सञ्चालन गरेका छन् । दस दिनसम्म सञ्चालन हुने महोत्सवमा कृषि, जडिबुटी, हस्तकला, फर्निचर, अटोमोबाइल्स, गार्मेन्ट, इलेक्ट्रोनिकल, होटल र सूचना प्रविधि गरी झन्डै तीन सय स्टल राखिएको आयोजक संस्थाका अध्यक्ष पुष्पराज कुँवरले बताएका छन् । महोत्सवमा स्थानीय उत्पादन र महिला उद्यमीलाई प्रोत्साहन गरिएको छ भने करिब ४ लाखले अवलोकन गर्ने अनुमान आयोजकको छ । हरेक वर्ष मंसिर २२ देखि पुस २ गतेसम्म आयोजना हुने महोत्सव कोरोनाका कारण दुई वर्षदेखि हुन सकेको थिएन । महोत्सव सञ्चालनमा प्रदेश सरकार र धनगढी उपमहानगरपालिकाले सहयोग गरेको आयोजकले बताए ।

गत महिना कैलालीकै अत्तरियामा सुदूरपश्चिम प्रादेशिक महोत्सव भएको थियो । अत्तरिया उद्योग वाणिज्य संघको आयोजनामा भएको उक्त महोत्सवमा करिब ६५ हजार दर्शकले अवलोकन गरेका थिए । डेढ करोड बढीको कारोबार भएको संघका अध्यक्ष अशोक राज देवकोटाले बताए ।

यस्तै, डडेलधुराको अमरगढी नगरपालिकाको आयोजनामा मंगलबारदेखि टुँडिखेलमा तीनदिने डडेलधुरा महोत्सव आयोजना भएको थियो । प्रतिभा पहिचान तथा संस्कृति संरक्षणका लागि महोत्सवको आयोजना गरिएको नगर प्रमुख विश्वेश्वरप्रसाद ओझाले बताए । विभिन्न ठाउँमा सञ्चालन हुँदै आएका मेला महोत्सवले व्यवसाय बढाउने मात्रै नभएर यस क्षेत्रको कला, संस्कृति संरक्षण प्रवर्द्धन गर्ने उद्देश्य हुने भए पनि आयोजकले कला क्षेत्रका स्थानीय प्रतिभाहरूलाई ओझेलमा पारेर बाह्य कलाकारहरूलाई प्राथमिकता दिने गरेकोमा स्थानीय कलाकर्मीहरूले विरोध गरेका छन् ।

प्रकाशित : चैत्र १४, २०७८ १३:३२
प्रतिक्रिया
पठाउनुहोस्

घुम्ती पसलमा पेट्रोल बिक्री

शिव पुरी

रौतहट — रौतहटमा पूर्वपश्चिम राजमार्गबाट दक्षिण लागेपछि भित्री गाउँका घुम्ती र पान पसलमा बोतलमा पेट्रोल राखेर छ्यापछ्याप्ती बिक्री गरिरहेको पाइन्छ । सुरक्षाको दृष्टिकोणले संवेदनशील मानिने प्रज्वलनशील पदार्थ खुलेआम बोतलमा राखेर बिक्री गर्दा पनि नियमन हुन सकेको छैन ।

नेपाल आयल निगमबाट स्वीकृत लिएर खोलिएका पेट्रोल पम्पले मात्र बिक्री गर्न पाउने भए पनि ससाना पसलमा खुलेआम पेट्रोल बेच्ने गरेको पाइएको हो । नाकाबन्दीताका यसरी पान, किराना, साइकल र घुम्ती पसलमा लुकाएर झन्डै दोब्बर मूल्यमा पेट्रोल र डिजेल बेच्ने गरिन्थ्यो । त्यसै बेलादेखिको चलन अझै जारी छ । सदरमुकाम गौर जाने राजमार्गका पान पसलमा बाहिर देख्ने गरी खुलेआम बोतलमा पेट्रोल राख्ने गरिन्छ । पम्पहरूमा प्रतिलिटर १ सय ५५ रुपैयाँ लिटर पाइने पेट्रोल पान पसलेले २ सयदेखि २ सय ५० रुपैयाँसम्ममा बिक्री गर्छन् । यसरी राखिएका पेट्रोलमा मट्टीतेल मिसाइएको पाइएको छ । बाल्चनपुर, जंगलसैया खण्डमा पर्ने साना घुम्ती पसलहरूमा बोतलमा पेट्रोल राख्ने धेरै छन् ।

जंगलसैयाका घुम्ती पसले सरोजकुमार साहले नजिक पम्प नभएकाले ग्राहकको सुविधाका लागि बोतलमा पेट्रोल राखेको बताए । ‘ठुला ड्रममा राख्न स्वीकृत छैन । पैसा पनि धेरै लाग्छ । बोतलमा राखेर भए पनि सेवा दिएको छु,’ उनले भने, ‘कतिपय मानिसहरू मोटरसाइकलमा पेट्रोल सकेर गुँडाउँदै गरेका हुन्छन् । तिनीहरूलाई बोतलमा भए पनि राहत हुन्छ ।’ चन्द्रपुर ४ स्थित देव आयलका सञ्चालक देवेन्द्र चौधरीले बोतलमा आफ्नै प्रायोजनका लागि भरेर लैजाने र पछि पसलमा बोतल झुन्ड्याएर बेच्न थालेको बताए । ‘पान पसले साना घुम्ती पसलेहरूले जथाभावी पेट्रोल बिक्री गरेको देख्दा अचम्ममा परेको छु,’ उनले भने, ‘सम्बन्धित निकायले अनुगमन गरेर यस्ता कार्य बन्द गर्नुपर्छ ।’

निगमबाट प्रक्रिया पुर्‍याएर अनुमति पत्र लिएर मात्र पेट्रोलियम पदार्थ बिक्री गर्न पाइने पेट्रोल डिलर एसोसिएसन रौतहटका कोषाध्यक्ष शम्भुप्रसाद जैसवालले बताए । ‘जथाभावी घुम्तीमा र पान पसलमा पेट्रोल राख्न पाइँदैन । यो नियमविपरीत हो,’ उनले भने, ‘प्रशासनले अनुगमन गरेर नियन्त्रणमा लिनुपर्ने हो । जहाँ पम्प छैन । त्यहाँ राखेका होलान् । तर पनि यो अत्यन्तै जोखिमपूर्ण हुन्छ ।’ जिल्ला प्रशासन कार्यालयका प्रशासकीय अधिकृत पवल कायस्थले भित्री गाउँहरूका साना पसलमा नियमविपरीत बोतलमा पेट्रोल राख्ने गरेको बताए । ‘अनुगमनका क्रममा फेला पर्‍यो भने तत्कालै नियन्त्रणमा लिन्छौं,’ उनले भने ।

प्रकाशित : चैत्र १४, २०७८ १३:३२
पूरा पढ्नुहोस्
प्रतिक्रिया
पठाउनुहोस्
×