आयोजना खारेजीको जोखिम- सुदूरपश्चिम - कान्तिपुर समाचार

आयोजना खारेजीको जोखिम

मोहन बुढाऐर

धनगढी — कैलालीको अत्तरियादेखि गोदावरीसम्मको ६ लेन सडक निर्माण आयोजना खारेज (फेज आउट) हुने जोखिम बढेको छ । आउँदो असारमा आयोजना सक्नुपर्ने भए पनि हाल काम नभइरहेकाले अन्तिम चरणमा रहे पनि आयोजना खारेजी हुने जोखिम बढेको हो । अत्तरिया–धनगढी भन्सारसम्मको १४.५ किलोमिटर सडकको काम करिब ७ प्रतिशत मात्रै बाँकी छ ।

६ लेन सडक आयोजना कार्यान्वयन इकाइ कार्यालयका सूचना अधिकारी इन्जिनियर भुवन खड्काले ३ नम्बर प्याकेजमा ७ र बाँकी १ र २ नम्बर प्याकेजमा ३ प्रतिशत मात्रै काम बाँकी रहेको बताए । उनका अनुसार निर्माण कम्पनीबाट फुटपाथमा ब्लकिङ, सर्भिस रोडमा ग्राबिलिङ, पेन्टिङ, रेलिङ, ट्राफिक संकेतलगायत काम गर्न मात्रै बाँकी छ ।

‘कामको गतिलाई बढाए निर्माण कम्पनीले तोकिएको समावधिभित्रै काम सम्पन्न गर्न सक्छन्,’ खड्काले भने, ‘दोस्रो चरणको अत्तरिया–गोदावरीसम्मको सडक खण्डको विस्तार ६ लेनमा पार्न सकिएन भने असारमा आयोजना फेज आउट हुन्छ ।’ उनले अत्तरिया–गोदावरी खण्डको ६ लेन विस्तारको दोस्रो चरणको कामका लागि डीपीआर तयार नभएको बताए ।

अत्तरिया–धनगढी ६ लेन सडक निर्माणको ३ प्याकेजको ठेक्का २०७४ जेठमा भएको थियो । ३ वर्षभित्र सम्पन्न नभएपछि ठेक्का सम्झौताको म्याद थप गरिएको थियो । निर्माणको ठेक्का लुम्बिनी, राजेन्द्र, डाँफे, लामा, शर्मा, नागार्जुन र अमर निर्माण कम्पनीले १ अर्ब ६० करोड रुपैयाँमा लिएका हुन् । सडकको क्षेत्राधिकारभित्र निर्माण भएका संरचना हटाउनमै ढिलाइ भएका कारण समयमा सम्पन्न नभएको र लकडाउनको कारण पनि योजना प्रभावित भएकोले तेस्रो पटक म्याद थप्नुपरेको आयोजना कार्यालयले जनाएको छ ।

यही खण्डमा पर्ने ३ वटा पुलको ठेक्का सम्झौता भई काम अघि बढेको आयोजनाका इन्जिनियर खड्काले बताए । सुनखोला पुल २०७७ माघमा राजेन्द्र निर्माण कम्पनीले करिब ३ करोड रुपैयाँमा ठेक्का लिएको हो । करिब २४ मिटर लम्बाइको सुनखोला पुलको निर्माणको काम अघि बढिसकेको उनले बताए । त्यस्तै, ६२ मिटर लम्बाइको मनहरा पुल उच्चाकोटी शनिदेव साजेन्द्रस्वर कम्पनीले ६ करोड ९९ लाख रुपैयाँमा ठेक्का लिएको छ । यसको काम पनि अघि बढिसकेको उनले बताए । भन्सार रोडमा पर्ने मोहना पुल निर्माण गर्न गत फागुन १६ मा रायमाझी कन्स्ट्रक्सनले १३ करोड १७ लाख रुपैयाँमा ठेक्का सम्झौता गरिसकेको छ ।

प्रकाशित : फाल्गुन २४, २०७८ १०:५६
प्रतिक्रिया
पठाउनुहोस्

रौतहट कांग्रेसमा यादव विजयी

शिव पुरी

रौतहट — कांग्रेस रौतहटको १४ औं अधिवेशनको क्रममा भएको मतदानमा सुनिलकुमार यादव विजयी भएका छन् । उनले १ हजार ३ सय ६२ मत प्राप्त गरेका थिए । निकटतम हृद्यनारायण यादवले १ हजार ६४ मत पाएका छन् ।

विजयी सुनिल देउवा पक्षका र हृद्यनारायण कोइराला पक्षका हुन् । जिल्ला कार्यसमितिको एक सचिव बाहेक सबै पदमा देउवा पक्षकै बर्चश्व कायम गरेको छ । सदस्यहरुको मतगणना भने जारी छ ।

निर्वाचन अधिकृत दिपकराज रेग्मीका अनुसार दुई उपसभापतिमा संस्थापन पक्षकै धिरेन्द्रकुमार सिहले १ हजार २ सय ८७ मत र रामलोचन प्रसाद कलवारले १ हजार ३ सय ८३ मत ल्याई विजयी भएका छन् । कोइराला पक्षका मोहम्मद महताब आलमले १ हजार १ सय ९१ र विनोद गुप्ताले ८ सय २५ मत पाए । दुई सचिवमा संस्थापन पक्षका राजेशकुमार चौधरीले १ हजार ३ सय ९ मत पाएर विजयी भए । सचिवमा भने कोइराला पक्षका रामचन्द्र गिरिले १ हजार १ सय ४२ मत पाएर विजयी भए । संस्थापन पक्षका सुभाष कोइरालालाई १० मतले पछि पार्दै गिरि विजयी भएका हुन् । दुई सहसचिवमा संस्थापन पक्षकै मोहम्मद फिरोज आलमले १ हजार ३ सय ८३ र सिकेन्द्रप्रसाद पटेलले १ हजार २ सय ४१ मत पाई विजयी भएका छन् । कोइराला पक्षका धर्मेन्द्र साहले १ हजार ५१ र बच्चा बाबुले ९ सय ७१ मत पाई पराजीत भए ।

वडाहरुका प्रतिनिधिलाई प्रमाणपत्र उपलब्ध नगराइएको र फर्जि मतदातालाई लाइनमा बसाएको भन्दै विवाद बढेपछि शनिबार बिहान हुने भनिएको निर्वाचन स्थगित भइ सोमबार भएको थियो । सदरमुकाम गौरस्थित जुद्ध माविमा मतदान भएको थियो । कांग्रेसको विधानमा दुई जना उप सभापति, सचिव र उपसचिव रहने प्रावधान छ । सभापति र पदाधिकारी सहित ९६ पदमा हुने निर्वाचनमा सचिव बाहेकका पदमा दुई–दुई जनाले उम्मेदवारी दिएका थिए । कांग्रेसको जिल्लामा २ हजार ५ सय ९० मतदाता रहेकोमा २ हजार ५ सय १८ मत खसेको निर्वाचन समितिले जनायो ।


प्रकाशित : फाल्गुन २४, २०७८ ०९:४०
पूरा पढ्नुहोस्
प्रतिक्रिया
पठाउनुहोस्
×