एप्रोन खरिदमा अनियमितता

बजारमा खुद्रामै प्रतिथान अधिकतम १ सय ६० रुपैयाँ पर्ने एप्रोन मन्त्रालयले प्रतिथान १ हजार ३८ रुपैयाँका दरले किनेको थियो । समिति सदस्य अमरबहादुर साउदका अनुसार समितिले झन्डै ९ महिना लगाएर अनुसन्धान गरेको हो । प्रतिवेदनअनुसार मन्त्रालयले ४ हजार ५ सय थान एप्रोन भ्याटबाहेक ४६ लाख ७१ हजार रुपैयाँमा जीएच मेडिहेल्थ कन्सर्न प्रालि भक्तपुरबाट खरिद गरी भुक्तानी दिएको थियो । ‘अधिकतम मूल्य १ सय ६० रुपैयाँका दरले खरिद गर्दा पनि ७ लाख २० हजार रुपैयाँ मात्रै पर्नेमा उक्त परिमाणको एप्रोनलाई झन्डै ७ गुणा बढी रकम भुक्तानी गरेको पाइएको छ,’ साउदले भने, ‘समितिको निर्णयअनुसार अख्तियार दुरुपयोग अनुसन्धान आयोग, मुख्यमन्त्री कार्यालय र सम्बन्धित मन्त्रालयलाई अनुसन्धान तथा कारबाहीका लागि आइतबार पत्राचार गरेका छौं ।’

साउदले मन्त्रालयका कर्मचारीहरूको अगुवाइमा उक्त खरिद कार्यमा सुरुदेखि नै योजनाबद्ध ढंगले आर्थिक अनिमितताको योजना बनेको जस्तो देखिएको दाबी गरे । ‘एप्रोन खरिदमा सार्वजनिक खरिद ऐनका प्रक्रियासमेत पूरा गरिएको देखिँदैन,’ उनले भने, ‘त्यससँगै अन्य केही सामग्री पनि खरिद गरिएको देखिएको छ । तर थोरैथारै परिमाणमा खरिद भएका अन्य सामग्रीको मूल्य भने त्यति अचाक्ली देखिन्न ।’ स्वास्थ्य सामग्री खरिदमा अनियमितता भएको उजुरीका आधारमा समितिले अनुसन्धान थालेको थियो । अध्ययनका क्रममा समितिले भूमि व्यवस्था, कृषि तथा सहकारीमन्त्री विनिता चौधरी र मन्त्रालयका सचिवसँग पनि बयान लिएको उनले बताए ।

मन्त्रालयले गत आर्थिक वर्ष ०७७/७८ मा वार्षिक स्वीकृत कार्यक्रमअन्तर्गतको बजेटलाई गत वर्षकै असोजमा लागत अनुमान स्वीकृत गरेको तर बोलपत्र आह्वानको प्रक्रिया भने त्रुटिपूर्ण भेटिएको समितिको ठहर छ । पहिलो पटक प्रकाशित सूचनाअनुसार टेन्डर नपरेपछि मन्त्रालयले १५ दिने सूचना पुनः मंसिर ४ मा प्रकाशन गरेर बोलपत्र मंसिर १९ मा खोल्नुपर्नेमा १८ मै खोलिएको पाइएको साउदले बताए ।